বহু আলৈ-আথানিৰ পিছত দোষমুক্ত কেজৰিৱাল আৰু মনীষ চিছ’দিয়া; প্ৰশ্নৰ সন্মুখীন ইডি-চিবিআই

দিল্লীৰ বহু চৰ্চিত আবকাৰী বা সুৰা নীতিৰ গোচৰত আম আদমী পাৰ্টিৰ দুই শীৰ্ষ নেতাই ডাঙৰ সকাহ পালে। নতুন দিল্লীৰ ৰাউজ এভিনিউ আদালতে আজি প্রাক্তন মুখ্যমন্ত্রী অৰবিন্দ কেজৰিৱাল আৰু প্রাক্তন উপ-মুখ্যমন্ত্রী মনীষ চিছ’দিয়া দুয়োজনকে দোষমুক্ত কৰাৰ নির্দেশ দিয়ে৷

আদালতৰ পৰ্যবেক্ষণ আছিল যে দিল্লীৰ আবকাৰী নীতি প্ৰণয়নত কোনো সামগ্ৰিক ষড়যন্ত্ৰ বা অপৰাধমূলক উদ্দেশ্যৰ প্ৰমাণ নাছিল। ন্যায়াধীশগৰাকীৰ স্পষ্ট মন্তব্য আছিল যে নীতিগত সিদ্ধান্তক কেন্দ্ৰ কৰি দুৰ্নীতিৰ অভিযোগ উত্থাপন কৰিবলৈ তদন্তকাৰী সংস্থাসমূহে আদালতত উপযুক্ত তথ্য বা প্ৰমাণ দাখিল কৰিব নোৱাৰিলে।

দিল্লীত ২০২৫ চনৰ বিধানসভা নিৰ্বাচনৰ পূৰ্বে এই আবকাৰী গোচৰৰ তদন্ত কৰি কেন্দ্ৰীয় তদন্তকাৰী সংস্থাই আম আদমী পাৰ্টিক বিপৰ্যস্ত কৰিছিল। প্ৰথমে উপ-মুখ্যমন্ত্ৰী মনীষ ছিছ’দিয়াক গ্ৰেপ্তাৰ কৰি তিহাৰ জেলত ৰখা হৈছিল। ইয়াৰ পিছতে অৰবিন্দ কেজৰিৱালক গ্ৰেপ্তাৰ কৰা হয়। জামিন মঞ্জুৰ হ’লেও তেওঁ মুখ্যমন্ত্ৰীৰ পদত বহিব নোৱাৰিব বুলি আদালতে নিৰ্দেশ দিয়ে।

কেন্দ্ৰীয় তদন্তকাৰী সংস্থাৰ এই গোচৰটো আগত ৰাখি বিজেপিয়ে কেজৰিৱালক দুৰ্নীতিগ্ৰস্ত বুলি তুলি ধৰিছিল। নিৰ্বাচনত ইয়াক লৈ প্ৰচাৰ চলাইছিল। এসময়ত দুৰ্নীতিৰ বিৰুদ্ধে যুঁজ দিয়া কেজৰিৱাল নিজেই কিমান ফান্দত ডুবি গ’ল সেয়া দেখুৱাবলৈ অমিত শ্বাহ বাহিনীৰ প্ৰচাৰ চলিছিল।

ইয়াৰ পিছত দিল্লীৰ নিৰ্বাচনত আম আদমী পাৰ্টি বেয়াকৈ পৰাস্ত হয়। কিন্তু শুকুৰবাৰে আদালতে স্পষ্ট কৰি দিয়ে যে ইডি বা চিবিআইয়েও দুৰ্নীতিৰ অভিযোগৰ সমৰ্থনত কোনো প্ৰমাণ দিব নোৱাৰিলে।

এই ৰায়ক ৰাজনৈতিক মহলে আম আদমী পাৰ্টিৰ বাবে এক ডাঙৰ ৰাজনৈতিক সকাহ বুলি গণ্য কৰিছে। একে সময়তে দিল্লীৰ ৰাজনীতিত সুৰা নীতিৰ বিতৰ্কত ই এক গুৰুত্বপূৰ্ণ টাৰ্নিং পইণ্ট হিচাপে বিবেচিত হৈছে।