আনখন অন্ত নপৰা যুদ্ধৰ খবৰ! ইউক্ৰেইনত ৰাছিয়াৰ আক্ৰমণত নিহত ১৭ জন

ইউক্ৰেইনৰ ৰাজধানী কিয়েভ আৰু অন্যান্য চহৰত ৰাছিয়াই চলিত বৰ্ষৰ আটাইতকৈ মাৰাত্মক আক্ৰমণ সংঘটিত কৰিছে। এই আক্ৰমণত এজন ১২ বছৰীয়া শিশুকে ধৰি কমেও ১৭ জন লোক নিহত হৈছে।

বৃহস্পতিবাৰে পুৱতি নিশা চলোৱা এই ড্ৰ’ন আৰু মিছাইল আক্ৰমণত আৰু কেইবাজনো লোক আহত হোৱা বুলি বিষয়াসকলে জনায়।

ৰাজধানী কিয়েভত এটা শিশুসহ চাৰিজন লোকৰ মৃত্যু হোৱা বুলি মেয়ৰ ভিটালি ক্লিচ্কোৱে জনায়। পুৱাৰ ভাগত ১৮ মহলীয়া অট্টালিকা এটাত মধ্যম উচ্চতাৰে উৰি অহা এটা ড্ৰ’নে আঘাত হানে।

সমগ্ৰ কিয়েভত সংঘটিত হোৱা এই আক্ৰমণত কমেও ৬০ জন লোক আহত হোৱা বুলি বিষয়াসকলে জনায়। আহতসকলৰ ভিতৰত চাৰিজন জৰুৰীকালীন কৰ্মী আৰু দুজন আৰক্ষী বিষয়াও আছে।

সংবাদ সংস্থা ৰয়টাৰে প্ৰকাশ কৰা অনুসৰি কিয়েভৰ কেইবাটাও অঞ্চলত এই আক্ৰমণৰ পিছত নিশা অগ্নিকাণ্ড সংঘটিত হয় আৰু আকাশ ডাঠ ক’লা ধোঁৱাৰে আৱৰি ধৰে। ৰাতিপুৱা উদ্ধাৰ অভিযান অব্যাহত থকাৰ সময়তে পোৰা গোন্ধ বিয়পি আছিল।

দক্ষিণৰ কৃষ্ণ সাগৰৰ বন্দৰ চহৰ অডেছাত একেলগে সংঘটিত আক্ৰমণত ৮ জন লোক নিহত হোৱাৰ লগতে ২৬ জন আহত হয়। ইয়াত এটা উচ্চ আৱাসিক অট্টালিকা বেয়াকৈ ক্ষতিগ্ৰস্ত হৈছে বুলি বিষয়াসকলে জনায়।

আঞ্চলিক গৱৰ্ণৰে কয় যে এই আক্ৰমণৰ ফলত অডেছা বন্দৰ আৰু চহৰখনৰ আন কেইবাটাও গুৰুত্বপূৰ্ণ অট্টালিকাও ক্ষতিগ্ৰস্ত হৈছে। পুৱা এখন বজাৰত আন এক আক্ৰমণত আন তিনিজন লোক আহত হয়।

বুধবাৰে সন্ধিয়া আৰু পিছলৈ নিশা ড্নিপ্ৰ’ চহৰত সংঘটিত আক্ৰমণত চাৰিজন লোকৰ মৃত্যু হোৱাৰ লগতে ৩০ জন লোক আহত হয় বুলি জানিবলৈ দিয়ে ড্নিপ্ৰ’ৰ আঞ্চলিক গৱৰ্ণৰ অলেক্সেণ্ড্ৰ হানজাই। এই আক্ৰমণৰ ফলত আৱাসিক অট্টালিকাত জুই জ্বলি উঠে। অঞ্চলটোত আন এক আক্ৰমণত এজন লোকৰ মৃত্যু হয়।

ইউক্ৰেইনৰ উত্তৰ-পূবৰ দ্বিতীয় বৃহত্তম চহৰ খাৰকিভত ড্ৰ’ন আক্ৰমণত দুজন লোক আহত হোৱা বুলি বিষয়াসকলে জানিবলৈ দিয়ে।

ইউক্ৰেইনৰ উপ-প্ৰধানমন্ত্ৰী অলেকচি কুলেবাই কয় যে উদ্ধাৰ অভিযান চলি আছে আৰু মৃত্যুৰ সংখ্যা বৃদ্ধি পাব পাৰে।

মস্কোৱে কয় যে ইউক্ৰেইনৰ বাহিনীয়ে ব্যৱহাৰ কৰা বিদ্যুৎ কেন্দ্ৰ, ক্ৰুজ মিছাইল আৰু ড্ৰ’ন উৎপাদনৰ সুবিধাসমূহত তেওঁলোকে  “ব্যাপক” আক্ৰমণ চলাইছে।

ইউক্ৰেইনৰ ড্ৰ’ন বাহিনীৰ অধিনায়কগৰাকীয়ে কয় যে ইউক্ৰেইনৰ বাহিনীয়ে ৰাছিয়াৰ দখলত থকা ক্ৰিমিয়া আৰু দক্ষিণৰ টুয়াপছে বন্দৰত লক্ষ্যত আঘাত কৰিছে।

ৰাছিয়াৰ সংবাদ মাধ্যম আৰু বিষয়াসকলে জনোৱা মতে, ইউক্ৰেইনৰ ড্ৰ’ন আক্ৰমণত এগৰাকী ১৪ বছৰীয়া কিশোৰীকে ধৰি দুজন লোক নিহত হোৱাৰ লগতে আন সাতজন লোক আহত হয়। সেই স্থানত বৃহৎ অগ্নিকাণ্ডও সংঘটিত হয়।

টুয়াপছে ৰাছিয়াৰ মূল তেল শোধনাগাৰ অঞ্চল আৰু এই বন্দৰেৰে দেশখনে তেল, কয়লা আৰু সাৰ ৰপ্তানি কৰে।