নতুন অধ্যায় আৰম্ভ! সামৰিক শক্তি বৃদ্ধিৰ বাবে ভাৰতত ৩ হাজাৰ ৰাছিয়ান সৈন্য

ভাৰত আৰু ৰাছিয়াৰ মাজত আৰম্ভ হৈছে এক নতুন অধ্যায়। দুয়োখন দেশৰ মাজত এক ঐতিহাসিক প্ৰতিৰক্ষা চুক্তি স্বাক্ষৰিত হৈছে, য’ত ইখনে সিখনৰ ভূখণ্ডত ৩০০০ পৰ্যন্ত সৈন্য, সীমিত সংখ্যক যুদ্ধজাহাজ আৰু বিমান নিয়োগ কৰিব পাৰিব।

এই চুক্তিয়ে দুয়োখন দেশৰ দীৰ্ঘদিনীয়া কৌশলগত অংশীদাৰিত্বক গভীৰ আৰু বাস্তৱিক কৰি তুলিছে। বিগত বৰ্ষৰ ফেব্ৰুৱাৰী মাহত স্বাক্ষৰিত এই চুক্তি চলিত বৰ্ষৰ ১২ জানুৱাৰীৰ পৰা কাৰ্যকৰী হয়।

শেহতীয়াকৈ ৰাছিয়াৰ চৰকাৰী আইনী তথ্য পৰ্টেলত প্ৰকাশিত নথি অনুসৰি এখন দেশৰ সেনাবাহিনীৰ সৰ্বাধিক ৩০০০ সদস্য, ১০খন সামৰিক বিমান আৰু ৫খন যুদ্ধজাহাজ একেলগে আনখন দেশৰ ভূখণ্ডত স্থাপন কৰিব পৰা যাব।

এই ব্যৱস্থা পাঁচ বছৰৰ বাবে বৈধ আৰু দুয়োপক্ষৰ সন্মতি সাপেক্ষে আৰু পাঁচ বছৰলৈ বৃদ্ধি কৰিব পাৰি। এই চুক্তিৰ নাম হৈছে ইণ্ডো-ৰাছিয়ান ৰেচিপ্ৰ’কেল এক্সচেঞ্জ অৱ লজিষ্টিকছ ছাপৰ্ট (RELOS)।

ই কেৱল সৈন্য নিয়োগৰ অনুমতি দিয়াই নহয়, যৌথ সামৰিক অনুশীলন, প্ৰশিক্ষণ, মানৱীয় সাহায্য, প্ৰাকৃতিক আৰু মানৱসৃষ্ট দুৰ্যোগৰ সৈতে মোকাবিলা কৰাত সহযোগিতাৰ বাবেও এক সম্পূৰ্ণ পৰিকাঠামো সৃষ্টি কৰে। ইয়াৰ উপৰিও সৈন্য, জাহাজ আৰু বিমানৰ লজিষ্টিক, কাৰিকৰী আৰু কাৰ্য্যকৰী সহায়ৰ বাবে বিশদ নিয়মসমূহ স্পষ্ট কৰা হৈছে। দুয়োখন দেশৰ মাজত এনে ব্যৱস্থা আগতে নাছিল। এতিয়ালৈকে যৌথ অনুশীলন অনুষ্ঠিত হৈছিল যদিও ইখনে সিখন দেশত স্থায়ী বা দীৰ্ঘম্যাদী থকাৰ সুযোগ সীমিত আছিল।

এতিয়া সেই সীমাবদ্ধতা অতিক্ৰম কৰি দুয়োখন দেশে ইখনে সিখনৰ মাটিত পোনপটীয়াকৈ সহযোগিতা আগবঢ়াব পাৰিব। বিশেষজ্ঞসকলে কয় যে ইয়াৰ ফলত কেৱল প্ৰতিৰক্ষা খণ্ডতে নহয়, দুয়োখন দেশৰ মাজত এক নতুন মাত্ৰাৰ আস্থাৰ সৃষ্টি কৰিছে। ভাৰত আৰু ৰাছিয়াৰ মাজত দীৰ্ঘদিনীয়া সম্পৰ্ক আছে। স্বাধীনতাৰ পিছৰে পৰা ৰাছিয়া (তেতিয়াৰ ছোভিয়েট ইউনিয়ন) ভাৰতৰ অন্যতম প্ৰধান প্ৰতিৰক্ষা যোগানকাৰী দেশ। ভাৰতে ৰাছিয়াৰ পৰা ব্ৰাহ্মছ মিছাইল, এছ-৪০০ এয়াৰ ডিফেন্স চিষ্টেম, ছু-৩০ যুঁজাৰু বিমানকে ধৰি অসংখ্য আধুনিক অস্ত্ৰ লাভ কৰিছে।

এতিয়া এই চুক্তিৰ জৰিয়তে কেৱল ক্ৰয়-বিক্ৰয়ৰ বাবেই নহয়, যৌথ পৰিচালনা আৰু প্ৰশিক্ষণৰ বাবেও দুৱাৰ মুকলি কৰা হৈছে। বিশ্বৰ সাম্প্ৰতিক জটিল ভূ-ৰাজনৈতিক পৰিস্থিতিত এই পদক্ষেপক বহুতে স্পষ্ট বাৰ্তা হিচাপে দেখিছে।

যদিও পশ্চিমৰ সৈতে ভাৰতৰ সুসম্পৰ্ক আছে, তথাপিও ভাৰতে ৰাছিয়াৰ সৈতে থকা ঐতিহাসিক বন্ধুত্ব কেতিয়াও পৰিত্যাগ কৰা নাই। একেদৰে ৰাছিয়াই ভাৰতক নিজৰ আটাইতকৈ নিৰ্ভৰযোগ্য অংশীদাৰ বুলি গণ্য কৰে। এই চুক্তিয়ে সেই সম্পৰ্কক আৰু অধিক মজবুত কৰিব।