মৈদামলৈ বিশ্ব ঐতিহ্য ক্ষেত্ৰৰ স্বীকৃতি আনন্দৰ খবৰ : চিপিআই(এম)

নতুন দিল্লীত অনুষ্ঠিত  বিশ্ব ঐতিহ্য সমিতিৰ ৪৬ সংখ্যক বৈঠকে মৈদামক ইউনেস্কোৰ বিশ্ব ঐতিহ্য ক্ষেত্ৰৰ তালিকাত অন্তৰ্ভুক্ত কৰাৰ বাবে লোৱা সিদ্ধান্ত অৱশ্যে আদৰণীয়। চৰাইদেউৰ মৈদাম হ’ল বিশ্ব ঐতিহ্য ক্ষেত্ৰৰ তালিকাত স্থান পোৱা ভাৰতৰ ৪৩ সংখ্যক আৰু অসমৰ তৃতীয় ঐতিহ্য ক্ষেত্ৰ। – আজি এক এক প্ৰেছ বিবৃত্তিযোগে এই কথা প্ৰকাশ কৰিছে চিপিআই(এম)-এ।

বিবৃত্তিটোত দলটোৱে কয় যে পূৰ্বতে অসমৰ কাজিৰঙা ৰাষ্ট্ৰীয় উদ্যান আৰু মানস অভয়াৰণ্যই প্ৰাকৃতিক শিতানত বিশ্ব ঐতিহ্য ক্ষেত্ৰৰ স্বীকৃতি লাভ কৰিছিল। এতিয়া সাংস্কৃতিক সম্পদ শিতানত মৈদামে স্বীকৃতি লাভ কৰাটো ৰাজ্যবাসীৰ বাবে এটা আনন্দৰ বতৰা।

আহোম স্বৰ্গদেউ,ৰাজৰাণীৰ সমাধি ক্ষেত্ৰ মৈদাম সমূহক বিশ্ব ঐতিহ্য ক্ষেত্ৰ হিচাপে চিহ্নিত কৰাৰ বাবে ৰাজ্যখনত প্ৰচেষ্টা দীৰ্ঘদিনীয়া। অৱশেষত অসমৰ জনসাধাৰণৰ এই হাবিয়াসে আন্তৰ্জাতিক স্বীকৃতি লাভ কৰিলে।

চিপিআই(এম)অসম ৰাজ্যিক কমিটিয়ে চৰাইদেউৰ মৈদামক বিশ্ব ঐতিহ্য ক্ষেত্ৰ হিচাপে স্বীকৃতি দিয়াত সন্তোষ প্ৰকাশ কৰাৰ লগতে মৈদামসমূহৰ উপযুক্ত সংৰক্ষণ নিশ্চিত কৰিবলৈ চৰকাৰৰ প্ৰতি আহ্বান জনাইছে।