যৌতুক নে উপহাৰ? কন্যা ঘৰৰ ৭১ লাখ টকা লৈ বিপদত ইউটিউবাৰ অৰুণ পানৱাৰ

জনপ্ৰিয় ইউটিউবাৰ অৰুণ পানৱাৰৰ বিয়াক কেন্দ্ৰ কৰি বৰ্তমান ছচিয়েল মিডিয়াত এক তীব্ৰ বিতৰ্কৰ সৃষ্টি হৈছে। অৰুণ পানৱাৰে শেহতীয়াকৈ ড° তিথিৰ সৈতে বিবাহপাশত আৱদ্ধ হৈছিল আৰু তেওঁলোকৰ বিয়াৰ এটা ভিডিঅ’ ভাইৰেল হোৱাৰ পিছতে এই বিতৰ্কৰ সূত্ৰপাত ঘটে।

সেই ভিডিঅ’টোত দেখা গৈছে যে অৰুণে তেওঁৰ পত্নীৰ পৰিয়ালৰ পৰা উপহাৰ হিচাপে নগদ ৭১ লাখ টকা আৰু ২১ তোলা সোণ গ্ৰহণ কৰিছে। ভাৰতীয় পৰম্পৰাগত ৰীতি-নীতি অনুসৰি ইয়াক দান বুলি কোৱা হৈছে যদিও বহু লোকে ইয়াক যৌতুক হিচাপে অভিহিত কৰিছে যিটো দেশৰ আইন অনুসৰি অবৈধ।

এই সমালোচনাৰ উত্তৰ দি অৰুণ পানৱাৰে এটা স্পষ্টীকৰণ ভিডিঅ’ মুকলি কৰিছে। তেওঁ কয় যে এই ধনৰাশি তেওঁ কেতিয়াও দাবী কৰা নাছিল আৰু এইটো তেওঁৰ বাবে এক ডাঙৰ চাৰপ্ৰাইজ আছিল। অৰুণৰ মতে তেওঁৰ পত্নীৰ পৰিয়াল যথেষ্ট চহকী আৰু তেওঁলোকৰ বাবে ৭১ লাখ টকাটো কোনো ডাঙৰ কথা নহয়। তেওঁ যুক্তি দিছে যে বৰ্তমান সময়ত মানুহে গাড়ী বা গহনা কিনিবলৈ ইয়াতকৈ বেছি টকা খৰচ কৰে গতিকে ইয়াক লৈ ইমান হুলস্থুল কৰাৰ কোনো প্ৰয়োজন নাই। তেওঁ লগতে কৈছে যে এগৰাকী ডাক্তৰ পত্নীয়ে তেওঁৰ দৰে এজন ইউটিউবাৰক বিয়া কৰাইছে যিটোৱে প্ৰমাণ কৰে যে ইয়াত কোনো লেনদেনৰ কথা নাছিল।

অৰুণৰ পত্নী ড° তিথিয়েও একেই সুৰতে কথা কৈছে। তেওঁ জনাইছে যে বিয়াৰ এটা ধৰ্মীয় অনুষ্ঠানৰ সময়ত হঠাতে এই নগদ ধনখিনি আগবঢ়োৱা হৈছিল আৰু তেওঁলোকে ভবা নাছিল যে ইমান বেছি সমালোচনাৰ সন্মুখীন হ’ব লাগিব। তেওঁলোকে এই গোটেই বিষয়টোক কেৱল এটা উপহাৰ বুলিহে অভিহিত কৰিছে। অৰুণ পানৱাৰে লগতে কৈছে যে তেওঁ নিজে মাহে ২০ৰ পৰা ২৫ লাখ টকা উপাৰ্জন কৰে গতিকে তেওঁক যৌতুকৰ কোনো প্ৰয়োজন নাই। কিন্তু তেওঁলোকৰ এই যুক্তিৰ পাছতো নেটিজেনসকল শান্ত হোৱা নাই।

ছচিয়েল মিডিয়াত বহুতে কৈছে যে যৌতুকক উপহাৰ বা দানৰ নাম দিলেও ইয়াৰ প্ৰভাৱ একেই থাকে। এনেধৰণৰ ৰাজহুৱা প্ৰদৰ্শনে সমাজত এক ভুল বাৰ্তা প্ৰেৰণ কৰে যিয়ে মধ্যবিত্ত পৰিয়ালসমূহৰ ওপৰত বিয়াৰ নামত হেঁচাৰ সৃষ্টি কৰিব পাৰে। ইয়াৰ উপৰিও ১০ লাখতকৈ অধিক নগদ ধনৰ লেনদেনৰ ক্ষেত্ৰত আয়কৰ বিভাগৰ নিয়ম আৰু আইনী দিশসমূহৰ কথা উল্লেখ কৰি বহুত লোকে প্ৰশ্ন উত্থাপন কৰিছে। একাংশ লোকে আনকি ইয়াক ক’লা ধন বগা কৰাৰ এক মাধ্যম বুলিও সন্দেহ প্ৰকাশ কৰিছে। মুঠৰ ওপৰত এই বিয়াখনক লৈ এতিয়াও দেশজুৰি চৰ্চা অব্যাহত আছে।