‘ছোৱালীয়ে পঢ়া-শুনা কৰি কি কৰিব?’ ঘৰতে থাকি কামবন কৰাৰ পৰামৰ্শ বিজেপি নেতৃত্বাধীন চৰকাৰৰ শিক্ষামন্ত্ৰীৰ

‘বেটি বচাও, বেটি পঢ়াও’ শ্লোগানেৰে কেন্দ্ৰীয় চৰকাৰে নাৰী শিক্ষা আৰু সবলীকৰণৰ ওপৰত গুৰুত্ব আৰোপ কৰি অহাৰ সময়তে এনডিএ শাসিত বিহাৰৰ নৱনিযুক্ত শিক্ষামন্ত্ৰীৰ এক মন্তব্যই সমগ্ৰ দেশজুৰি তীব্ৰ চাঞ্চল্যৰ সৃষ্টি কৰিছে।

বিহাৰৰ নতুন শিক্ষামন্ত্ৰী মিথিলেশ তিৱাৰীয়ে সংবাদ মাধ্যমৰ সন্মুখত স্পষ্টকৈ কয় যে ছোৱালীয়ে পঢ়া-শুনা কৰাৰ কোনো প্ৰয়োজন নাই। তেওঁলোকৰ স্থান ঘৰৰ চাৰিবেৰৰ ভিতৰতহে। ঘৰত থাকি তেওঁলোকে ঘৰুৱা কামবনত সহায় কৰক।

বিহাৰৰ বিজেপি নেতৃত্বাধীন এনডিএ চৰকাৰৰ শিক্ষামন্ত্ৰীৰ এনে নীচ মন্তব্যই দেশজুৰি বিতৰ্কৰ সৃষ্টি কৰিছে।  

গোপালগঞ্জ জিলাৰ বৈকুণ্ঠপুৰ সমষ্টিৰ বিজেপি বিধায়ক মিথিলেশ তিৱাৰীয়ে নতুনকৈ সালসলনি ঘটা বিহাৰ মন্ত্ৰীসভাত শিক্ষামন্ত্ৰীৰ দায়িত্ব লাভ কৰিছে।

শেহতীয়াকৈ এক সাক্ষাৎকাৰত তেওঁ কয়, “ছোৱালীয়ে ইমান পঢ়া-শুনা কৰি কি কৰিব? আমাৰ ঘৰৰ ছোৱালীবোৰ আমাৰ শক্তি আৰু সমৃদ্ধিৰ আধাৰ। তেওঁলোক ঘৰতে থকা উচিত আৰু ঘৰুৱা কামত সহায় কৰিব লাগে। ৰাজপথত ওলাই প্ৰতিবাদ কৰা বা জনসমাগমলৈ যোৱাৰ তেওঁলোকৰ কোনো প্ৰয়োজন নাই।”

যেতিয়া সাংবাদিকে তেওঁক নাৰীৰ শিক্ষাৰ অধিকাৰৰ কথা সোঁৱৰাই দিয়ে, তেতিয়া তেওঁ অতি দায়িত্বজ্ঞানহীনভাৱে উত্তৰ দিয়ে যে, “আপোনালোকে আপোনালোকৰ অধিকাৰ এনেয়েই পাব।”

উল্লেখ্য যে, ৰাজনীতিত ভৰি দিয়াৰ পূৰ্বে মিথিলেশ তিৱাৰী নিজে এজন শিক্ষক আছিল। অৰ্থনীতিৰ স্নাতক ডিগ্ৰীধাৰী তিৱাৰীয়ে দীৰ্ঘদিন ধৰি পাটনাত এটা কোচিং চেণ্টাৰো চলাইছিল। এজন প্ৰাক্তন শিক্ষক হৈও শিক্ষামন্ত্ৰীৰ আসনত বহি নাৰী শিক্ষাৰ বিৰুদ্ধে এনে মন্তব্য কৰা কাৰ্যই সকলোকে স্তম্ভিত কৰি তুলিছে।

ছচিয়েল মিডিয়াত এই মন্তব্যৰ ভিডিঅ’ ভাইৰেল হোৱাৰ লগে লগে নেটিজেনসকলে মন্ত্ৰীগৰাকীক তীব্ৰ সমালোচনা কৰিছে। বহুতৰে মতে, সংবিধানৰ ২১(এ) অনুচ্ছেদ অনুসৰি শিক্ষা প্ৰত্যেকৰে মৌলিক অধিকাৰ। এনেস্থলত এগৰাকী দায়িত্বশীল মন্ত্ৰীৰ মুখত এনে ‘মধ্যযুগীয়’ চিন্তা-ধাৰা কোনোমতেই গ্ৰহণযোগ্য নহয়।

বিৰোধী দলসমূহেও এই ঘটনাক লৈ বিজেপি তথা বিহাৰ চৰকাৰক লক্ষ্য কৰি লৈছে। অৱশ্যে কোনো কোনোৱে মন্ত্ৰীগৰাকীৰ ভাষ্যৰ ভুল ব্যাখ্যা হোৱা বুলিও দাবী কৰে।