SIRত নাম কৰ্তন হোৱাসকলে নাপাব চৰকাৰী আঁচনিৰ সুবিধাঃ ঘোষণা বংগ আৰু বিহাৰ চৰকাৰৰ

নিৰ্বাচন আয়োগৰ বিশেষ কঠোৰসংশোধনী (এছ আই আৰ) প্ৰক্ৰিয়াৰ জৰিয়তে ভোটাৰ তালিকাৰ পৰা মৃত, ভুৱা বা অযোগ্য ভোটাৰৰ নাম কৰ্তন কৰা হৈছিল। এতিয়া এই প্ৰক্ৰিয়া কেৱল নিৰ্বাচনতে সীমাবদ্ধ হৈ থকা নাই। পশ্চিমবংগ আৰু বিহাৰ চৰকাৰে এই তালিকাৰ ভিত্তিত চৰকাৰী কল্যাণমূলক আঁচনিসমূহৰ পৰা অযোগ্য হিতাধিকাৰীসকলক বাদ দিয়াৰ সিদ্ধান্ত লৈছে। এই পদক্ষেপৰ জৰিয়তে দুয়োখন ৰাজ্যই চৰকাৰী ধনৰ অপচয় ৰোধ কৰিব বিচাৰিছে।

পশ্চিমবংগত মুখ্যমন্ত্ৰী শুভেন্দু অধিকাৰীৰ নেতৃত্বত বিজেপি চৰকাৰ গঠন হোৱাৰ পিছতেই প্ৰশাসনে স্পষ্ট কৰি দিছে যে ভোটাৰ তালিকাৰ পৰা যিসকলৰ নাম বাদ পৰিছে, তেওঁলোকে চৰকাৰী আঁচনিৰ সুবিধা লাভ নকৰিব। একেদৰে বিহাৰতো মুখ্যমন্ত্ৰী সম্ৰাট চৌধুৰীৰ নেতৃত্বাধীন এন ডি এ চৰকাৰে ভোটাৰ তালিকাৰ পৰা নাম কৰ্তন হোৱা লোকসকলক ৰেচন আৰু অন্যান্য চৰকাৰী আঁচনিৰ পৰা বাদ দিয়াৰ প্ৰক্ৰিয়া আৰম্ভ কৰিছে।

২০২৫ চনৰ বিহাৰ আৰু ২০২৬ চনৰ পশ্চিমবংগ বিধানসভা নিৰ্বাচনৰ পূৰ্বে ভোটাৰ তালিকা নিকা কৰাৰ উদ্দেশ্যে এই এছ আই আৰ প্ৰক্ৰিয়া আৰম্ভ কৰা হৈছিল। ইয়াৰ জৰিয়তে বিহাৰত প্ৰায় ৬৫ লাখ আৰু পশ্চিমবংগত প্ৰায় ৯১ লাখ নাম কৰ্তন কৰা হৈছিল। পশ্চিমবংগত বাদ পৰা ৯১ লাখৰ ভিতৰত ২৭ লাখৰো অধিক লোকে শেহতীয়া বিধানসভা নিৰ্বাচনত ভোটদান কৰিব পৰা নাছিল। চৰকাৰৰ মতে, আধাৰ আৰু বেংকৰ সংযোগ সম্পূৰ্ণ নোহোৱা, ভুৱা হিতাধিকাৰী আদি সমস্যাসমূহ দূৰ কৰি আঁচনিসমূহ সঠিকভাৱে ৰূপায়ণ কৰিবলৈ এই নতুন তথ্য ব্যৱহাৰ কৰা হ’ব।

পশ্চিমবংগৰ মহিলা আৰু শিশু কল্যাণ মন্ত্ৰী অগ্নিমিত্ৰা পালৰ মতে, অহা এক জুনৰ পৰা ৰাজ্যখনত তৃণমূল কংগ্ৰেছৰ লক্ষ্মীৰ ভাণ্ডাৰ আঁচনিৰ সলনি বিজেপিৰ অন্নপূৰ্ণা ভাণ্ডাৰ আঁচনি আৰম্ভ কৰা হ’ব। ইয়াৰ অধীনত মহিলাসকলে প্ৰতিমাহে ৩০০০ টকাকৈ লাভ কৰিব। কিন্তু ভোটাৰ তালিকাৰ পৰা নাম বাদ পৰা বা বৰ্তমানেও ট্ৰাইবুনেলত গোচৰ চলি থকা লোকসকলক এই সুবিধাৰ পৰা বঞ্চিত কৰা হ’ব। মুখ্যমন্ত্ৰী শুভেন্দু অধিকাৰীয়ে জানিবলৈ দিছে যে কোনো পুৰণি চৰকাৰী আঁচনি বন্ধ কৰা নহয়, কিন্তু মৃত ব্যক্তি, অবৈধ অনুপ্ৰৱেশকাৰী বা অনা-ভাৰতীয় লোকে যাতে চৰকাৰী সুবিধা নাপায় সেয়া নিশ্চিত কৰা হ’ব। আনহাতে এই সমগ্ৰ প্ৰক্ৰিয়াক লৈ সংখ্যালঘু আৰু প্ৰব্ৰজনকাৰী অধ্যুষিত অঞ্চলসমূহত তৃণমূল কংগ্ৰেছে তীব্ৰ বিৰোধিতা কৰিছে।

আনহাতে বিহাৰতো একেই কঠোৰ পদক্ষেপ গ্ৰহণ কৰা হৈছে। মুখ্যমন্ত্ৰী সম্ৰাট চৌধুৰীয়ে সংবাদ মাধ্যমৰ আগত প্ৰকাশ কৰিছে যে ভোটাৰ তালিকাৰ পৰা নাম কটা যোৱা লোকসকল চৰকাৰী আঁচনিৰ বাবে অযোগ্য হ’ব আৰু তেওঁলোকৰ বেংক পাছবুকসমূহো পৰৱৰ্তী সময়ত বাতিল কৰা হ’ব পাৰে। ৰাজ্যখনৰ খাদ্য আৰু গ্ৰাহক সুৰক্ষা মন্ত্ৰী অশোক চৌধুৰীয়ে জানিবলৈ দিয়া মতে, ইতিমধ্যেই প্ৰায় পাঁচ লাখ লোকৰ নাম ৰেচন কাৰ্ডৰ তালিকাৰ পৰা কৰ্তন কৰা হৈছে।

কংগ্ৰেছৰ জ্যেষ্ঠ নেতা তথা সাংসদ পি চিদাম্বৰমে দুয়োখন ৰাজ্যৰ এই সিদ্ধান্তক তীব্ৰ সমালোচনা কৰিছে। নাগৰিকত্বৰ ভিত্তিত ভোটাৰ তালিকাত নাম অন্তৰ্ভুক্ত হয় নে ভোটাৰ তালিকাত নাম থকাটোৱেই নাগৰিকত্বৰ ভিত্তি, সেই গুৰুত্বপূৰ্ণ প্ৰশ্ন উত্থাপন কৰি তেওঁ উচ্চতম ন্যায়ালয়ক এই বিষয়ত চিন্তা কৰিবলৈ আহ্বান জনাইছে। দুয়োখন ৰাজ্যৰ এই সিদ্ধান্তই ভৱিষ্যতে চৰকাৰী আঁচনিসমূহৰ বিতৰণ ব্যৱস্থাত এক ডাঙৰ পৰিৱৰ্তন অনাৰ ইংগিত দিছে।