টিনৰ চালিৰ সৈতে ৫০ ফুট উৰুৱাই নি পেলাই দিলে ধুমুহাই! তথাপি প্ৰাণ ৰক্ষা পৰিল নানহে মিঞাৰ

উত্তৰ প্ৰদেশৰ বাৰেলী জিলাত দেখা গ’ল প্ৰকৃতিৰ এক ৰুদ্ৰমূৰ্তি, যিয়ে আনকি হলিউডৰ কাল্পনিক দুৰ্যোগৰ দৃশ্যকো পৰাজিত কৰিব। বুধবাৰৰ ভয়ংকৰ ধুমুহাত এখন টিনৰ চালি উৰি যাবলৈ ওলাইছিল। সেই চালিখন বচাবলৈ বাৰেলিৰ নানহে মিঞাই ৰছীত ধৰি ওলমি আছিল। কিন্তু বতাহৰ বল ইমানেই প্ৰবল আছিল যে সেই টিনৰ চালিখনৰ সৈতে তেওঁক প্ৰায় ৫০ ফুট বতাহত উৰুৱাই নি পেলাই দিছিল।

বাৰেলীৰ ভামৰা থানা এলেকাৰ বামিয়ানা গাঁৱৰ এই শিহৰণকাৰী ভিডিঅ’ এতিয়া ছ’চিয়েল মিডিয়াত ভাইৰেল হৈছে। মৃত্যুৰ মুখৰ পৰা উভতি আহিছে নানহে মিঞা। কিন্তু শূন্যা পৰা মাটিত আফালি পৰাৰ ফলত তেওঁৰ হাত-ভৰি ভাঙি যায়। বৰ্তমান তেওঁ চিকিৎসালয়ত চিকিৎসাধীন হৈ আছে।

চিকিৎসালয়ৰ বিচনাত পৰি যন্ত্ৰণাত ভুগি থকা নানহে মিঞাই ভয়ংকৰ অভিজ্ঞতাটোৰ কথা ক’লে। এনডিটিভিৰ সৈতে হোৱা এক সাক্ষাৎকাৰত তেওঁ কয়, ‘মই কমেও ৩০-৪০ ফুট ওপৰলৈকে উঠি গৈছিলো। ক’ত পৰিলোঁ নাজানো।মই ভাবো কমেও ৫০ ফুট দূৰত ছিটিকি পৰিলোঁ।

তেওঁ লগতে কয় যে ধুমুহাবতাহত যাতে চালিখন উৰি নাযায় তাৰ বাবে ৰছীডাল জোৰেৰে ধৰি ৰাখিছিল। ভাবিছিল যে যদি ৰছীডালত ধৰি থাকে তেন্তে তেওঁ নিৰাপদ হ’ব। কিন্তু প্ৰচণ্ড বতাহে ৰছীডাল ছিঙি পেলালে আৰু তেওঁ নিয়ন্ত্ৰণ হেৰুৱাই টিনৰ চালিখনৰ লগতে উৰিবলৈ আৰম্ভ কৰে।

চৰকাৰী বিষয়াসকলে চিকিৎসালয়খনত নানহে মিঞাক দেখা কৰে। তেওঁলোকে মানুহজনৰ লগত কথা পাতি তেওঁৰ চিকিৎসাৰ বাবে সকলো খৰচ আৰু প্ৰয়োজনীয় সহায়ৰ আশ্বাস দিয়ে।

বাৰেলীৰ এই কাণ্ডটো আচলতে সমগ্ৰ উত্তৰ প্ৰদেশত সংঘটিত হোৱা এক বৃহৎ প্ৰাকৃতিক দুৰ্যোগৰ এটা সৰু অংশ মাত্ৰ। বুধবাৰৰ পৰা আৰম্ভ হোৱা বৰষুণ আৰু ধুমুহাৰ ফলত সমগ্ৰ ৰাজ্যখন কাৰ্যতঃ বিধ্বস্ত হৈ পৰিছে। সৰ্বভাৰতীয় সংবাদ মাধ্যমৰ তথ্য অনুসৰি সমগ্ৰ ৰাজ্যতে এই দুৰ্যোগত কমেও ৮৯ জন লোকৰ মৃত্যু হৈছে। ৫৩ জন লোক আহত হৈছে। ধুমুহাত ৮৭টা ঘৰ ধ্বংস হোৱাৰ লগতে ১১৪টা গৰু মৃত্যুমুখত পৰিছে। প্ৰয়াগৰাজ, ভাদোহী, ফতেহপুৰ আৰু সোণভদ্ৰ জিলাৰ পৰা ব্যাপক ক্ষয়-ক্ষতিৰ খবৰ আহিছে।

পৰিস্থিতিৰ সৈতে মোকাবিলা কৰাৰ দায়িত্ব লৈছে উত্তৰ প্ৰদেশ প্ৰশাসনে। মুখ্যমন্ত্রী যোগী আদিত্যনাথে ৰাজ্যৰ প্রতিখন জিলাক প্রতি ৩ ঘণ্টাৰ মূৰে মূৰে ধুমুহা, বৰষুণ আৰু বজ্ৰপাতৰ ফলত হোৱা ক্ষয়-ক্ষতিৰ শেহতীয়া তথ্য আপডেট কৰিবলৈ নির্দেশ দিছে৷ লগতে ছ’চিয়েল মিডিয়াত প্ৰচাৰ হৈ থকা উদ্ধাৰ কাম আৰু অন্যান্য সাহায্য সম্পৰ্কীয় তথ্যৰ প্ৰতিও গুৰুত্ব দিবলৈ কয়। প্ৰশাসনে ক্ষিপ্ৰতাৰে সকাহ দিবলৈ কাম কৰি আছে।

অৱশ্যে ৫০ ফুটৰ ওপৰৰ পৰা পৰি নানহে মিঞা যিদৰে বাচি থাকিল, এতিয়া স্থানীয় বাসিন্দাসকলে বাৰেলীৰ আটাইতকৈ ডাঙৰ ‘অলৌকিক’ ঘটনা বুলি গণ্য কৰে।