পুনৰ যাত্ৰীবাহী ৰে’লত ভয়ংকৰ অগ্নিকাণ্ড; ষ্টেচনত আতংকিত হৈ দৌৰাদৌৰি যাত্ৰীৰ

মধ্যপ্ৰদেশৰ ৰাজধানী এক্সপ্ৰেছৰ পিছত এইবাৰ বিহাৰত এখন যাত্ৰীবাহী ৰে’লত সংঘটিত হৈছে ভয়ংকৰ অগ্নিকাণ্ডৰ ঘটনা। সোমবাৰে পুৱা বিহাৰৰ ৰোহতাছ জিলাৰ চাচাৰাম ষ্টেচনত যাত্ৰীবাহী ৰে’লৰ দবাত অগ্নিকাণ্ড সংঘটিত হয়। দুৰ্ঘটনা সংঘটিত হোৱাৰ সময়ত ৰে’লখনত বহু যাত্ৰী আছিল।

অৱশ্যে অগ্নিকাণ্ড সংঘটিত হোৱাৰ কিছু সময়ৰ পাছতে তেওঁলোক ৰে’লৰ পৰা নামিবলৈ সক্ষম হয়। ফলত এই ঘটনাত কোনো লোক হতাহত হোৱা নাই বুলি জানিব পৰা গৈছে।

আৰক্ষীৰ সূত্ৰ অনুসৰি চাচাৰামৰ পৰা পাটনা অভিমুখী এই যাত্ৰীবাহী ৰে’লখন ৬ নং প্লেটফৰ্মত ৰখি আছিল। সেই সময়তে হঠাতে ৰে’লখনত জুই লাগে। কথাটো লক্ষ্য কৰাৰ লগে লগে যাত্ৰীসকলে খৰখেদাকৈ ৰে’লৰ পৰা নামিবলৈ ধৰে।

নিমিষতে জুইয়ে বিধ্বংসী ৰূপ লয়। ৰে’ল ডবা জ্বলিবলৈ ধৰে। যাত্ৰীসকলৰ আতংকিত চিঞৰ-বাখৰৰ মাজতে আৰ পি এফ আৰু ৰে’লৱে কৰ্মীসকলে ততাতৈয়াকৈ সেই স্থানত উপস্থিত হয়। তেওঁলোকে বহু চেষ্টাৰ অন্তত জুই নিয়ন্ত্ৰণ কৰিবলৈ সক্ষম হয়। ৰে’লৱেৰ সূত্ৰ অনুসৰি এই অগ্নিকাণ্ডত এটা ডবা সম্পূৰ্ণৰূপে ধ্বংস হয়। আন এটা ডবাৰো ক্ষতিসাধন হয়।

প্ৰাৰম্ভিক তদন্তত ৰে’লৱেই অনুমান কৰিছে যে শ্বৰ্ট চাৰ্কিটৰ বাবে জুইৰ সূত্ৰপাত হ’ব পাৰে। অৱশ্যে দুৰ্ঘটনাৰ সঠিক কাৰণ জানিবলৈ ৰে’ল কৰ্তৃপক্ষই তদন্ত আৰম্ভ কৰিছে। ৰে’ল কৰ্তৃপক্ষৰ মতে, ঘটনাৰ পিছতে যাত্ৰীসকলক তাৰ পৰা শীঘ্ৰে উলিয়াই নিনিলে পৰিস্থিতি ভয়াৱহ হ’লহেঁতেন।

উল্লেখ্য যে দেওবাৰে পুৱা তিৰুৱনন্তপুৰম-নতুন দিল্লী ৰাজধানী এক্সপ্ৰেছৰ এ চি ডবাত ভয়ংকৰ অগ্নিকাণ্ড সংঘটিত হয়। মধ্যপ্ৰদেশৰ লুনি ৰিচা আৰু বিক্ৰমগড় আলোট ষ্টেচনৰ মাজত সংঘটিত হৈছে এই ঘটনা। তীব্ৰ অগ্নিকাণ্ডৰ ফলত ৰে’লৰ ভিতৰত উত্তেজনা বিয়পি পৰে। একাংশ যাত্ৰীয়ে খৰখেদাকৈ চলন্ত ৰে’লৰ পৰা জপিয়াই যাবলৈ চেষ্টা কৰিছিল।

ৰে’লৰ গাৰ্ডে ততাতয়াকৈ লোকো পাইলটক খবৰ দিয়ে। ইয়াৰ পিছত জৰুৰীকালীন ভিত্তিত ৰে’লখন ৰখাই দিয়া হয়। যুদ্ধকালীনভাৱে উদ্ধাৰৰ কাম আৰম্ভ হয়। সেই ঘটনাৰ পিছত ৰে’লত আন এক অগ্নিকাণ্ডৰ ঘটনাই যাত্ৰী নিৰাপত্তাৰ ওপৰত প্ৰশ্ন উত্থাপন কৰিছে।