নগাঁৱৰ ড০ জগন্নাথ বিশ্বকৰ্মাক ব্ৰিটেইনৰ পৰিৱেশ, খাদ্য আৰু গ্ৰাম্য পৰিক্ৰমা বিভাগৰ জ্যেষ্ঠ বিজ্ঞান বিষয়াৰ দায়িত্ব অৰ্পণ

অসম তথা নগাঁও জিলালৈ এক ডাঙৰ গৌৰৱ কঢ়িয়াই আনিছে ড০ জগন্নাথ বিশ্বকৰ্মাই। পৰিৱেশ বিজ্ঞানী ড০ বিশ্বকৰ্মাক ব্ৰিটেইনৰ পৰিৱেশ, খাদ্য আৰু গ্ৰাম্য পৰিক্ৰমা বিভাগৰ এক গুৰুত্বপূৰ্ণ দায়িত্ব অৰ্পণ কৰা হৈছে। তেওঁ এতিয়াৰে পৰা ব্ৰিটেইনৰ পৰিৱেশ আৰু জলসম্পদ সংলগ্ন অসামৰিক সেৱাৰ জ্যেষ্ঠ বিজ্ঞান বিষয়া হিচাপে কাৰ্যনিৰ্বাহ কৰিব। এই খবৰে সমগ্ৰ অসমলৈ আনন্দৰ বতৰা কঢ়িয়াই আনিছে।

ড০ বিশ্বকৰ্মাই যোৱা প্ৰায় দুটা দশক ধৰি পৰিৱেশ বিজ্ঞান আৰু জলসম্পদৰ ওপৰত গভীৰ গৱেষণা কৰি আহিছে। তেওঁ কেৱল ভাৰততে নহয়, জাপান আৰু ছুইজাৰলেণ্ডৰ দৰে উন্নত দেশতো নিজৰ গৱেষণা চলাইছে। বৰ্তমান তেওঁ ভাৰতৰ আই আই টি হায়দৰাবাদত অতিথি অধ্যাপক হিচাপে জড়িত থকাৰ লগতে অসমৰ কেইবাখনো বিশ্ববিদ্যালয়ৰ সৈতেও বিভিন্ন গৱেষণা প্ৰকল্পৰ কাম কৰি আছে।

পানীৰ প্ৰদূষণ ৰোধ কৰা আৰু পানী পৰিশোধন কৰাই হৈছে তেওঁৰ গৱেষণাৰ মূল বিষয়। ইয়াৰ উপৰিও কৃষি, জলসিঞ্চন আৰু প্ৰদূষিত পানীৰ পৰা খনিজ পদাৰ্থ উদ্ধাৰ কৰা বিষয়তো তেওঁ কাম কৰে। বিশেষকৈ মাটিৰ তলৰ পানীত থকা আৰ্ছেনিকৰ দৰে বিষাক্ত পদাৰ্থই কেনেকৈ বিস্তাৰ লাভ কৰে আৰু মানুহৰ স্বাস্থ্যত কেনেকুৱা বেয়া প্ৰভাৱ পেলায়, সেই সম্পৰ্কে তেওঁ বহু দিন ধৰি গৱেষণা কৰি আহিছে। গৱেষণাৰ উপৰিও তেওঁ আন্তঃৰাষ্ট্ৰীয় পৰ্যায়ত বৈজ্ঞানিক সহযোগিতা আৰু পৰিৱেশ সম্পৰ্কীয় নীতি নিৰ্ধাৰণৰ ক্ষেত্ৰতো সক্ৰিয়ভাৱে অংশগ্ৰহণ কৰিছে।

বিজ্ঞানৰ সমান্তৰালভাৱে তেওঁ অসমীয়া ভাষা-সাহিত্যৰ লগতো ওতপ্ৰোতভাৱে জড়িত। তেওঁ অসম সাহিত্য সভাৰ আজীৱন সদস্য আৰু নগাঁও জিলা সাহিত্য সভাৰ প্ৰবাসী অসমীয়া উপ-সমিতিৰ কাৰ্যকৰী সভাপতিৰ দায়িত্বতো আছে। বিদেশৰ মাটিত নিজৰ প্ৰতিভাৰে অসমৰ নাম জিলিকোৱা ড০ জগন্নাথ বিশ্বকৰ্মাৰ এই সফলতাত এতিয়া বিভিন্ন মহলে তেওঁক আন্তৰিক শুভেচ্ছা আৰু অভিনন্দন জ্ঞাপন কৰিছে।