ম্যানমাৰত বিদ্ৰোহী অধ্যুষিত অঞ্চলত হোৱা প্ৰচণ্ড বিস্ফোৰণত কমেও ৫৫ জন লোকৰ মৃত্যু, আহত বহু লোক

জেলিগনাইট ভৰ্তি এটা গুদামত সংঘটিত বিস্ফোৰণত কমেও ৫৫ জন লোকৰ মৃত্যু ঘটিছে। বহু আহত হয়। ম্যানমাৰৰ শ্বান ৰাজ্যৰ কাউংটুপ গাঁৱত দেওবাৰে সংঘটিত এই ঘটনাই তীব্ৰ চাঞ্চল্যৰ সৃষ্টি কৰিছে। ধ্বংসাৱশেষৰ তলত আবদ্ধ হৈ পৰিছে বহু লোক। ফলত মৃতকৰ সংখ্যা আৰু বৃদ্ধি পাব পাৰে বুলি অনুমান কৰা হৈছে। এতিয়াও চলি আছে উদ্ধাৰৰ কাম। স্থানীয় প্ৰশাসনে বিস্ফোৰণ কেনেদৰে সংঘটিত হ’ল তাৰ তদন্ত অব্যাহত ৰাখিছে।

বিবিচিৰ এক প্ৰতিবেদন অনুসৰি কাউংটুপ গাঁৱৰ কাষতে নামখাম টাউনশ্বিপ। সমগ্ৰ অঞ্চলটো জনবসতিপূৰ্ণ। ইয়াত এটা ডাঙৰ শিলৰ কুৱেৰী ​​আছে। ইয়াৰ কাষতে এটা গুদাম। তাত শিল ভাঙিবলৈ বৃহৎ পৰিমাণৰ জেলিগনাইট বিস্ফোৰক জমা কৰি ৰখা হৈছিল। দুপৰীয়াৰ সময়ত হঠাতে সংঘটিত হয় এই বিস্ফোৰণ। প্ৰথমে এটা জুইৰ গোলক ছিটিকি পৰে। ইয়াৰ পিছতে এক প্ৰচণ্ড শব্দত সমগ্ৰ অঞ্চলটো কঁপি উঠে। নিমিষতে চৌপাশৰ অঞ্চলটো ক’লা ধোঁৱাই আৱৰি ধৰে।

বিস্ফোৰণৰ ফলত কাষৰ বহু ঘৰ-দুৱাৰ ভাঙি যায়। কেইবাটাও চুবুৰী একেবাৰে ধ্বংসাৱশেষলৈ পৰিণত হয়। স্থানীয় সংবাদ মাধ্যমৰ সূত্ৰই প্ৰকাশ কৰা অনুসৰি সন্ধিয়ালৈকে শতাধিক গাঁওবাসীক উদ্ধাৰ কৰা হৈছে।

ম্যানমাৰৰ কেইবাটাও সংবাদ মাধ্যমৰ খবৰ অনুসৰি বিস্ফোৰণৰ তীব্ৰতা ইমানেই বেছি আছিল যে গাঁওবাসীয়ে ভাবিছিল যে বিমান আক্ৰমণ হৈছে। লগে লগে আত্মীয়ক উদ্ধাৰৰ বাবে ততাতৈয়াকৈ আগবাঢ়ি যায়।

চৌদিশে ধ্বংসপ্ৰাপ্ত ঘৰ, তেজৰ ডোঙা আৰু মৃতদেহ। এনে ভয়ংকৰ পৰিস্থিতি দেখি বহু লোকে আতংকিত হৈ ভাগি পৰে। কিছু সময়ৰ ভিতৰতে দুৰ্যোগ সঁহাৰি বাহিনী ঘটনাস্থলীত উপস্থিত হয়। উদ্ধাৰৰ কাম আৰম্ভ কৰে।

স্থানীয় সংবাদ মাধ্যমৰ তথ্য অনুসৰি নিহতসকলৰ ভিতৰত ২৫গৰাকী মহিলা আৰু ৩০জন পুৰুষ আছে। এতিয়াও চলি আছে উদ্ধাৰৰ কাম। প্ৰাথমিক অনুসন্ধানৰ পৰা দেখা গৈছে যে জেলিগনাইট দীৰ্ঘদিন ধৰি ৰখাৰ ফলত হোৱা ৰাসায়নিক বিক্ৰিয়াৰ ফলতে এই বিস্ফোৰণ ঘটিছিল।

বৰ্তমান কাউংটুপ গাঁওখন টা-আউং ৰাষ্ট্ৰীয় মুক্তি সেনাৰ নিয়ন্ত্ৰণত আছে। ২০২১ চনত সামৰিক জুন্টাই আউং ছান ছু কিক উৎখাত কৰিছিল। তেতিয়াৰ পৰা সমগ্ৰ দেশখন বাস্তৱিকতে গৃহযুদ্ধত লিপ্ত হৈছে।

২০২৩ চনৰ শেষৰ ফালে টা-আউং নেচনেল লিবাৰেশ্যন আৰ্মীয়ে পুনৰ ম্যানমাৰৰ সেনাবাহিনীৰ বিৰুদ্ধে যুঁজ দি নামখামকে ধৰি আশে-পাশে থকা কেইবাটাও অঞ্চল নিয়ন্ত্ৰণ কৰে। পিছত দুয়োপক্ষই চীনৰ মধ্যস্থতাত যুদ্ধবিৰতিৰ বাবে সন্মতি প্ৰকাশ কৰে যদিও উত্তেজনা সম্পূৰ্ণৰূপে হ্ৰাস পোৱা নাই।