জুনৰ আৰম্ভণিতে বৃদ্ধি পালে ৰন্ধন গেছৰ চিলিণ্ডাৰৰ দাম! গুৱাহাটীত কিমান হ’ল দাম?

বাণিজ্যিক এল পি জি চিলিণ্ডাৰৰ দাম পুনৰ বৃদ্ধি পালে। সেইমতে, ব্যৱসায়িক ৰন্ধন গেছৰ চিলিণ্ডাৰৰ মূল্য দিল্লীত ৪২ টকা, কলকাতাত ৫৩.৫০ টকা আৰু গুৱাহাটীত ৫৪ টকা বৃদ্ধি পাইছে। এই বৃদ্ধিৰ বাবে এই গুৱাহাটীত বাণিজ্যিক এল পি জি চিলিণ্ডাৰৰ মূল্য আজি  ৩,৩৪৭.০০ টকালৈ বৃদ্ধি পাইছে।

তদুপৰি ৫ কেজিৰ ‘ফ্ৰী ট্ৰেড এল পি জি’ (AeTL) চিলিণ্ডাৰৰ মূল্যও ১১ টকাকৈ বৃদ্ধি কৰা হৈছে।কিন্তু ঘৰুৱা কামত ব্যৱহাৰ কৰা এল পি জি চিলিণ্ডাৰৰ মূল্যৰ কোনো পৰিৱৰ্তন হোৱা নাই।

এই মূল্যবৃদ্ধিয়ে ৰেষ্টুৰেণ্ট, হোটেল, কেটাৰিং প্ৰতিষ্ঠান আৰু অন্যান্য বাণিজ্যিক খণ্ডত প্ৰভাৱ পেলাব। এই খণ্ডসমূহ দৈনন্দিন কাম-কাজৰ বাবে বাণিজ্যিক এল পি জি চিলিণ্ডাৰৰ ওপৰত বহু পৰিমাণে নিৰ্ভৰশীল।

সমগ্ৰ দেশতে শক্তি সুৰক্ষা শক্তিশালী কৰাৰ লগতে পেট্ৰলিয়াম সামগ্ৰীৰ নিৰৱচ্ছিন্ন যোগান বজাই ৰখাৰ বাবে চৰকাৰে প্ৰচেষ্টা অব্যাহত ৰখা দাবীৰ মাজতে ঘটিছে এই মূল্যবৃদ্ধি।

২৯ মে’ত পেট্ৰলিয়াম আৰু প্ৰাকৃতিক গেছ মন্ত্ৰালয়ৰ যুটীয়া সচিব সুজাতা শৰ্মাই আন্তঃমন্ত্ৰালয়ৰ ব্রিফিঙত জনাইছিল যে চৰকাৰে এল পি জি আৰু খাৰুৱা তেল উভয়ৰে কৌশলগত মজুত বৃদ্ধিৰ কাম কৰি আছে৷ শৰ্মাই কয়, “যিমান দূৰলৈকে কৌশলগত মজুতৰ কথা, আমি বৰ্তমান মজুত বৃদ্ধিৰ কাম কৰি আছো। আমি তেল বিপণন কোম্পানীসমূহক নিৰ্দেশ দিছো যে তেওঁলোকৰ হাতত যাতে কমেও ৩০ দিনৰ এল পি জিৰ মজুত থকাটো নিশ্চিত কৰে।

তেওঁ লগতে আশ্বাস দিয়ে যে দেশত ইন্ধন সামগ্ৰীৰ অভাৱ নাই আৰু কিছুমান অঞ্চলত আতংকিত হৈ ক্ৰয় আৰু মজুত কৰাৰ খবৰ পোৱাৰ পিছতো সামগ্ৰিকভাৱে ইন্ধন যোগান মসৃণ হৈ আছে।

শৰ্মাই কয়, ‘আমাৰ হাতত পেট্ৰ’ল, ডিজেল, এল পি জি আৰু প্ৰাকৃতিক গেছৰ পৰ্যাপ্ত মজুত আছে। আমাৰ ইন্ধনৰ মজুতৰো অৱস্থা ভাল।বৰ্তমান আমাৰ সকলো তেল শোধনাগাৰে সম্পূৰ্ণ ক্ষমতা বা অনুকূল স্তৰত কাম কৰি আছে আৰু এল পি জি উৎপাদন বৰ্তমান সৰ্বকালৰ সৰ্বোচ্চ স্তৰত প্ৰায় ৯০ ডি এম টি প্ৰতিদিনে। এতিয়ালৈকে এল পি জি বিতৰণ কেন্দ্ৰসমূহত ইন্ধন শেষ হৈ যোৱা বা ‘ড্ৰাই-আউট’ৰ কোনো ঘটনাৰ খবৰ পোৱা নাই।”

মন্ত্ৰালয়ে পৰ্যবেক্ষণ কৰিছে যে দেশৰ একাংশ জিলাত ইন্ধনৰ বিক্ৰী অস্বাভাৱিকভাৱে বৃদ্ধি পাইছে। ইয়াৰ কাৰণ আংশিকভাৱে কৃষি খণ্ডৰ চাহিদা বৃদ্ধি আৰু বৃহৎ পৰিমাণৰ ক্ৰয়ৰ বাবেই হৈছে।

শৰ্মাৰ মতে, সামগ্ৰিকভাৱে ইন্ধনৰ বিক্ৰী ৩০ শতাংশতকৈ অধিক বৃদ্ধিৰ সাক্ষী হৈ আছে। ইয়াৰে ১৪খন জিলাত পেট্ৰ’লৰ বিক্ৰী ১০০ শতাংশতকৈও অধিক বৃদ্ধি পাইছে। এই সামগ্ৰীৰ অবৈধ সৰবৰাহ আৰু মজুত ৰোধৰ বাবে সতৰ্কতা আৰু অভিযান তীব্ৰতৰ কৰা হৈছে।

শৰ্মাই কয় যে বিগত চাৰিদিনত এল পি জি সম্পৰ্কীয় কাম-কাজত ৬৫০০ৰো অধিক অভিযান চলোৱা হৈছে। ইয়াৰ ফলত ৫খন এফআইআৰ দাখিল কৰা হৈছে আৰু দুজনক গ্ৰেপ্তাৰ কৰা হৈছে।

তদুপৰি বিগত দুদিনত খুচুৰা ইন্ধনৰ বিপণীসমূহত ৯০০টা অভিযান চলোৱা হয়। এই অভিযানসমূহত ৪১৭ লিটাৰ পেট্ৰ’ল আৰু ৭৫,৭১৫ লিটাৰ ডিজেল জব্দ কৰাৰ বিপৰীতে ১২খন এফআইআৰ দাখিল কৰি ১৫জন লোকক গ্ৰেপ্তাৰ কৰা হয়। তেওঁ লগতে উল্লেখ কৰে যে ইন্ধনৰ মূল্য সুস্থিৰ কৰি ৰাখিবলৈ চৰকাৰে বিভিন্ন পদক্ষেপ গ্ৰহণ কৰিছে। ইয়াৰ ভিতৰত পেট্ৰ’ল আৰু ডিজেলৰ আবকাৰী শুল্ক হ্ৰাস কৰাও অন্তৰ্ভুক্ত।

উৰাবাতৰিৰ প্ৰতি গুৰুত্ব নিদিবলৈ শৰ্মাই নাগৰিকক আহ্বান জনাই দায়িত্বশীলভাৱে ইন্ধন ব্যৱহাৰ কৰিবলৈ অনুৰোধ জনায়। একে সময়তে তেওঁ আশ্বাস দিয়ে যে সমগ্ৰ দেশতে এল পি জি চিলিণ্ডাৰ আৰু অন্যান্য ইন্ধন সামগ্ৰীৰ নিৰৱচ্ছিন্ন উপলব্ধতা আৰু সুচাৰুৰূপে যোগান ধৰাৰ বাবে চৰকাৰে অক্লান্তভাৱে কাম কৰি আছে।