চাৰধাম যাত্ৰাত ৩৭ লাখৰো অধিক তীৰ্থযাত্ৰীৰ ভিৰ : আনহাতে প্ৰাণ হেৰুৱালে ১৯৮ গৰাকী ভক্তই

যোৱা এপ্ৰিল মাহৰ পৰা আৰম্ভ হোৱা উত্তৰাখণ্ডৰ চাৰ ধাম যাত্ৰালৈ এইপৰ্যন্ত ৩৭ লাখৰো অধিক তীৰ্থযাত্ৰীৰ আগমন ঘটিছে। ইয়াৰ সমান্তৰালভাৱে, চলিত তীৰ্থযাত্ৰাৰ বতৰত এইপৰ্যন্ত ১৯৮ গৰাকী ভক্তই প্ৰাণ হেৰুৱাইছে বুলি চৰকাৰী তথ্যত প্ৰকাশ পাইছে।

ৰাজ্যিক জৰুৰীকালীন সঞ্চালন কেন্দ্ৰৰ শেহতীয়া প্ৰতিবেদন অনুসৰি, বৃহস্পতিবাৰলৈকে মুঠ ৩৭.৩৫ লাখ তীৰ্থযাত্ৰীয়ে এই পৱিত্ৰ স্থানসমূহ দৰ্শন কৰিছে।

তথ্য অনুসৰি, যোৱা ২২ এপ্ৰিলত মুকলি হোৱাৰ পিছৰে পৰা কেদাৰনাথ ধামত সৰ্বাধিক ১২.৬১ লাখ দৰ্শনাৰ্থীৰ ভিৰ পৰিলক্ষিত হৈছে। ইয়াৰ পিছতে ২৩ এপ্ৰিলৰ পৰা বদ্ৰীনাথ ধামত ১১.৬৭ লাখ তীৰ্থযাত্ৰী উপস্থিত হৈছে। একেদৰে গংগোত্ৰী মন্দিৰত ৬.১৭ লাখ, যমুনোত্ৰী মন্দিৰত ৫.৮৩ লাখ আৰু শ্ৰী হেমকুণ্ড চাহিবত ১.০৫ লাখ ভক্তই দৰ্শন কৰিছে। ইয়াৰ উপৰিও মুঠ ৫,৭৯৫ গৰাকী তীৰ্থযাত্ৰীয়ে গোমুখ হিমবাহলৈ খোজকাঢ়ি যাত্ৰা কৰিছে। কেৱল বৃহস্পতিবাৰৰ দিনটোতেই ৪২,৯২১ গৰাকী তীৰ্থযাত্ৰী আৰু ৪,৯৮৪ খন বাহন এই তীৰ্থস্থানসমূহত উপস্থিত হৈছে। বিষয়াসকলে জানিবলৈ দিয়া অনুসৰি, যাত্ৰা আৰম্ভ হোৱাৰ পৰা বৰ্তমানলৈকে মুঠ ৩.৫৪ লাখ বাহনে যাত্ৰাৰ পথসমূহ ব্যৱহাৰ কৰিছে।

আনহাতে, যোৱা ১৯ এপ্ৰিলৰ পৰা তীৰ্থযাত্ৰীসকলৰ মাজত মুঠ ১৯৮ গৰাকী লোকৰ মৃত্যু হোৱা বুলি ৰাজ্য চৰকাৰে প্ৰকাশ কৰিছে।

চৰকাৰী তথ্য অনুসৰি, ইয়াৰে ১৯‌৫ গৰাকী লোকৰ মৃত্যু বেয়া স্বাস্থ্য আৰু চিকিৎসা জনিত সমস্যাৰ বাবে হৈছে, আনহাতে ৩ গৰাকী লোকৰ প্ৰাকৃতিক কাৰণত মৃত্যু হৈছে।

তীৰ্থযাত্ৰাৰ সময়ত কেদাৰনাথত সৰ্বাধিক ৯৫ গৰাকী লোকৰ মৃত্যু হোৱাৰ বিপৰীতে বদ্ৰীনাথত ৫৯ গৰাকী, যমুনোত্ৰীত ২৬ গৰাকী আৰু গংগোত্ৰীত ১৮ গৰাকী তীৰ্থযাত্ৰীয়ে প্ৰাণ হেৰুৱাইছে।