শিৱসাগৰৰ দীঘলিহাবিত বন্যহস্তীয়ে ভাঙিলে দুটাকৈ বাসগৃহ

শিৱসাগৰ ৰাজহ চক্ৰ তথা শিৱসাগৰ বন সংমণ্ডল কাৰ্যালয়ৰ অধীনৰ শান্তিপুৰ গাওঁ পঞ্চায়তৰ দীঘলিহাবি গাওঁত বন্যহস্তীয়ে শুকুৰবাৰে দুটা বাসগৃহ ভাঙি চুৰমাৰ কৰিছে।

জানিব পৰা মতে ৭০-৮০ টা মান বনৰীয়া হাতীৰ এটা জাকে গাওঁখনত প্ৰৱেশ কৰি ভানু গগৈ আৰু মহেন্দ্ৰ বৰাৰ বাসগৃহ দুটা ভাঙি পোলায়। বনৰীয়া হাতীৰ জাকটোৱে লগতে পৰিয়ালটোৰ খাদ্য শস্য, ধান আৰু আন খাদ্য সামগ্ৰীও ধ্বংস কৰে।

ইয়াৰ আগেয়েও প্ৰায়েই অফলা,গৰভাঙা, তাঁতীপথাৰ, চেনিমৰা,জগৰাহাবি আৰু লাৰাপুটা গাওঁত খাদ্যৰ সন্ধানত, বিশেষকৈ খেতি চপোৱাৰ সময়ত বনৰীয়া হাতী আহে।

স্থানীয় লোকে অভিযোগ কৰে যে বন বিভাগে ফটকা ফুটোৱাৰ বাহিৰে বনৰীয়া হাতীৰ সঘন বিচৰণ তথা উপদ্ৰৱ প্ৰতিৰোধ কৰাৰ বাবে কোনো পদক্ষেপ গ্ৰহণ কৰা নাই।

স্থানীয় লোকসকলে জানিব দিয়ে যে তেওঁলোকে বনৰীয়া হাতীৰ সম্ভাৱ্য উপদ্ৰৱৰ শংকাত নিদ্ৰাহীন নিশা যাপন কৰিবলগীয়া হৈছে।