ভাৰতীয় ষ্টেট বেংকে দুই চাফাই কৰ্মীক দিব লাগিব ৪০ লাখ টকা : আদালতৰ ঐতিহাসিক ৰায়

ষ্টেট বেংক অব ইণ্ডিয়াত বিগত তিনিটা দশকতকৈও অধিক সময় ধৰি দিনহাজিৰা হিচাপে কাম কৰা দুজন চাফাই কৰ্মীক ৪০ লাখ টকাৰ এককালীন ক্ষতিপূৰণ দিবলৈ ওড়িছা উচ্চ ন্যায়ালয়ে এক ঐতিহাসিক নিৰ্দেশ দিছে। বৰ্তমানৰ এই আধুনিক প্ৰযুক্তি আৰু এআই অৰ্থাৎ কৃত্ৰিম বুদ্ধিমত্তাৰ যুগত এই বয়সত তেওঁলোকৰ বাবে নতুন কোনো কাম বিচাৰি পোৱাটো অসম্ভৱ বুলি বিবেচনা কৰি আদালতে এই মানৱীয় ৰায় প্ৰদান কৰে।

আদালতৰ নিৰ্দেশ অনুসৰি বেংক কৰ্তৃপক্ষই তেওঁলোকৰ চাকৰি নিয়মীয়া কৰাৰ পৰিৱৰ্তে দুয়োকে ২০ লাখ টকাকৈ মুঠ ৪০ লাখ টকা এককালীন ক্ষতিপূৰণ দিব লাগিব।

গত ২৩ জুনত ন্যায়াধীশ কৃষ্ণ এছ দীক্ষিত আৰু ন্যায়াধীশ চিত্তৰঞ্জন দাসৰ খণ্ড বিচাৰপীঠে এই গুৰুত্বপূৰ্ণ ৰায়টো ঘোষণা কৰে। ইয়াৰ পূৰ্বে ২০২৫ চনৰ ২০ জুনত উচ্চ ন্যায়ালয়ৰে এজনীয়া বিচাৰপীঠে মায়াধৰ নায়ক আৰু বাইনা নায়ক নামৰ এই কৰ্মী দুজনৰ চাকৰি নিয়মীয়া কৰা, বোনাচ আৰু বাকী থকা পইচাৰ দাবী খাৰিজ কৰিছিল। একক বিচাৰপীঠৰ সেই ৰায়টোক প্ৰত্যাহ্বান জনাই তেওঁলোকে খণ্ড বিচাৰপীঠৰ দ্বাৰস্থ হৈছিল।

এই গোচৰৰ শুনানিৰ সময়ত ষ্টেট বেংক কৰ্তৃপক্ষই এই দুই কৰ্মীক এককালীন নিষ্পত্তি হিচাপে ৫ লাখ টকাকৈ দিবলৈ প্ৰস্তাৱ আগবঢ়াইছিল। কিন্তু আদালতে বেংকৰ এই প্ৰস্তাবটোক অতি সামান্য ক্ষতিপূৰণ বুলি অভিহিত কৰি নাকচ কৰে। খণ্ড বিচাৰপীঠে মন্তব্য কৰে যে বেংকে দিব বিচৰা ৫ লাখ টকাৰ ক্ষতিপূৰণৰ প্ৰস্তাৱটো ইমানেই কম যে ই উল্লেখ কৰাৰ যোগ্যই নহয়। বৰ্তমানৰ সময়ত যিহেতু টকাৰ মূল্য ক্ৰমান্বয়ে হ্ৰাস পাইছে, গতিকে এই সামান্য ধনেৰে একো কৰিব নোৱাৰি।

ন্যায়ালয়ে লগতে কয় যে আবেদনকাৰী দুজনে বেংকৰ বাবে বহু বছৰ ধৰি কষ্ট কৰিছে। এই বয়সত তেওঁলোকে আন কতো ভাল চাকৰিও নাপাব। এআই বা কৃত্ৰিম বুদ্ধিমত্তাৰ এই যুগত ইমান দিনে যিটো কামৰ বাবে তেওঁলোকে ইমান সময় দিলে, এতিয়া তেওঁলোকে কেনেকৈ নিজৰ জীৱিকা নিৰ্বাহ কৰিব সেই লৈ আদালত নিশ্চিত নহয়।

উল্লেখ্য যে এই বিবাদৰ আৰম্ভণি হৈছিল নব্বৈৰ दशकৰ মাজভাগত। ১৯৯৪ চনত মায়াধৰ নায়ক আৰু ১৯৯৫ চনত বাইনা নায়ক ভুৱনেশ্বৰত থকা ষ্টেট বেংকৰ চৰকাৰী ট্ৰেজেৰী শাখাত দৈনিক মজুৰিৰ ভিত্তিত চাফাই কৰ্মী হিচাপে নিযুক্ত হৈছিল। দীৰ্ঘ সময় কাম কৰাৰ পিছতেও চাকৰি স্থায়ী নোহোৱাৰ বাবে ১৯৯৯ চনত তেওঁলোকে প্ৰথমবাৰৰ বাবে উচ্চ ন্যায়ালয়ৰ কাষ চাপিছিল। ইয়াৰ পিছত ২০০৭ চনৰ পৰা তেওঁলোকৰ এই দীৰ্ঘদিনীয়া আইনী যুঁজ চলি আছিল।