ট্ৰাম্পক মোক্ষম আঘাত: আমেৰিকাত জন্মসূত্ৰে পোৱা নাগৰিকত্বৰ অধিকাৰ বাহাল ৰাখিলে উচ্চতম ন্যায়ালয়ে

আমেৰিকা যুক্তৰাষ্ট্ৰৰ উচ্চতম ন্যায়ালয়ে মঙলবাৰে ৰাষ্ট্ৰপতি ডনাল্ড ট্ৰাম্পৰ এক গুৰুত্বপূৰ্ণ কাৰ্যবাহী আদেশ খাৰিজ কৰিছে। এই আদেশটোৰ জৰিয়তে জন্মসূত্ৰে পোৱা নাগৰিকত্বৰ অধিকাৰ সীমিত কৰিবলৈ বিচৰা হৈছিল। ইয়াৰ ফলত আমেৰিকাৰ মাটিতে জন্মগ্ৰহণ কৰা প্ৰায় সকলো শিশুৱে নাগৰিকত্ব লাভ কৰিব বুলি থকা চতুৰ্দশ সংশোধনীৰ দীৰ্ঘদিনীয়া নিয়মটো পুনৰ বাহাল থাকিল। এই ঐতিহাসিক ৰায়ে দেশখনৰ অনুপ্ৰৱেশ নীতি আৰু সাংবিধানিক আইনৰ ক্ষেত্ৰত এক সুদূৰপ্ৰসাৰী প্ৰভাৱ পেলাব।

২০২৫ চনৰ জানুৱাৰী মাহত পুনৰ শাসনভাৰ গ্ৰহণ কৰাৰ প্ৰথম দিনাই ট্ৰাম্পে এই নিৰ্দেশটোত স্বাক্ষৰ কৰিছিল। ইয়াৰ উদ্দেশ্য আছিল আমেৰিকাত অবৈধভাৱে থকা বা অস্থায়ী ভিছাত থকা পিতৃ-মাতৃৰ সন্তানক স্বয়ংক্ৰিয় নাগৰিকত্ব দিয়াৰ পৰা বঞ্চিত কৰা। এই ব্যৱস্থাটোৱে কেৱল আমেৰিকাৰ নাগৰিক বা স্থায়ী বাসিন্দাৰ সন্তানকহে নাগৰিকত্ব দিয়াৰ কথা কৈছিল। কিন্তু ৬-৩ জন বিচাৰপতিৰ সন্মতিত উচ্চতম ন্যায়ালয়ে নামনি আদালতৰ ৰায়টোকে বাহাল ৰাখে আৰু ট্ৰাম্পৰ এই অনুপ্ৰৱেশ নীতিৰ বিৰুদ্ধে এক বৃহৎ আঘাত হানে।

আমেৰিকাৰ সংবিধানৰ চতুৰ্দশ সংশোধনীৰ নাগৰিকত্ব ধাৰাটোৰ ওপৰতে এই গোচৰটো কেন্দ্ৰিত আছিল। যোৱা ১৫০ বছৰ ধৰি এই ধাৰাটোৱে আমেৰিকাত জন্মগ্ৰহণ কৰা যিকোনো শিশুক নাগৰিকত্ব প্ৰদান কৰি আহিছে। কিন্তু চৰকাৰী পক্ষৰ উকীলসকলে যুক্তি দিছিল যে এই ধাৰাটো কেৱল সেইসকল লোকৰ বাবেহে প্ৰযোজ্য যিসকলৰ প্ৰধান আনুগত্য আমেৰিকাৰ প্ৰতি আছে। চৰকাৰৰ ফালৰ পৰা বিদেশী লোকসকলে কেৱল সন্তানক নাগৰিকত্ব দিয়াৰ উদ্দেশ্যৰে আমেৰিকালৈ অহা বুলিও অভিযোগ কৰা হৈছিল যদিও ইয়াৰ কোনো সঠিক পৰিসংখ্যা তেওঁলোকে দিব নোৱাৰিলে। বিপৰীতে বিৰোধী পক্ষই দাবী কৰিছিল যে আমেৰিকাৰ সংবিধান আৰু শতিকাজোৰা আইনী প্ৰক্ৰিয়াই জন্মসূত্ৰে পোৱা নাগৰিকত্বক সম্পূৰ্ণ সমৰ্থন কৰে।

নিউ হেম্পছায়াৰত একাংশ পিতৃ-মাতৃ আৰু সন্তানে দাখিল কৰা এখন গোচৰৰ পৰাই এই বিচাৰ প্ৰক্ৰিয়া আৰম্ভ হৈছিল। আইন বিশেষজ্ঞসকলৰ মতে, যদি ট্ৰাম্পৰ এই নিৰ্দেশ কাৰ্যকৰী হ‘লহেঁতেন, তেন্তে প্ৰতি বছৰে প্ৰায় আঢ়ৈ লাখ নৱজাতক প্ৰভাৱিত হ‘লহেঁতেন আৰু লাখ লাখ পৰিয়ালে নিজৰ সন্তানৰ নাগৰিকত্ব প্ৰমাণ কৰিবলগীয়া হ‘লহেঁতেন। উল্লেখযোগ্য যে এই গোচৰৰ শুনানিত স্বয়ং ৰাষ্ট্ৰপতি ট্ৰাম্প উপস্থিত আছিল, যিটো আমেৰিকাৰ ইতিহাসত এক বিৰল ঘটনা। চলিত বৰ্ষত উচ্চতম ন্যায়ালয়ে ট্ৰাম্পৰ ডাঙৰ নীতি বাতিল কৰা এইটো দ্বিতীয়টো ঘটনা, ইয়াৰ পূৰ্বে ফেব্ৰুৱাৰী মাহত তেওঁৰ গোলকীয় শুল্ক নীতিও ন্যায়ালয়ে বাতিল কৰিছিল।