ভাৰত নহয়, নিজৰ সেনা আৰু নেতাইহে ধ্বংস কৰিছে পাকিস্তানক: ছিংগাপুৰৰ প্ৰাক্তন ৰাষ্ট্ৰদূতৰ বিস্ফোৰক মন্তব্য

আমেৰিকা আৰু ইৰানৰ যুদ্ধত মধ্যস্থতা কৰি পাকিস্তানে বিশ্বত নিজৰ ভাৱমূৰ্তি হয়তো অলপ ভাল কৰিছে, কিন্তু দেশখনৰ ভিতৰৰ অৱস্থা অতি শোচনীয়। ছিংগাপুৰৰ প্ৰাক্তন ৰাষ্ট্ৰদূত বিলাহাৰী কৌছিকানে এখন গোলকীয় সন্মিলনত অংশগ্ৰহণ কৰি এইদৰে স্পষ্ট মত প্ৰকাশ কৰিছে। তেওঁৰ মতে পাকিস্তান বৰ্তমান ধ্বংসৰ গৰাহত পৰিছে। তেওঁ এই কথাও স্পষ্ট কৰি দিয়ে যে পাকিস্তানৰ মূল সমস্যা ভাৰত বা আফগানিস্তান নহয়, বৰঞ্চ তেওঁলোকৰ নিজৰ ৰাজনীতিবিদ আৰু সামৰিক বাহিনীহে দেশখনৰ এই দুৰৱস্থাৰ বাবে ঘাইকৈ দায়ী।

কৌছিকানে কয় যে পাকিস্তানে আমেৰিকা আৰু ইৰানৰ চুক্তিত কূটনীতিৰ সুন্দৰ প্ৰয়োগ কৰিছে যদিও এইটোৱে পাকিস্তানৰ জনসাধাৰণক ভোকৰ পৰা ৰক্ষা কৰিব নোৱাৰে। বিশ্ব বেংক আৰু আই এম এফৰ পৰা ঋণ লৈ চলি থকা দেশখনত বৰ্তমান তীব্ৰ অৰ্থনৈতিক আৰু খাদ্য সংকট চলি আছে। এক প্ৰতিবেদন অনুসৰি তীব্ৰ খাদ্য সংকটৰ সন্মুখীন হোৱা বিশ্বৰ শীৰ্ষ দহখন দেশৰ ভিতৰত পাকিস্তান অন্যতম। প্ৰাক্তন ৰাষ্ট্ৰদূতগৰাকীয়ে কয় যে কূটনৈতিক সফলতাই দেশখনৰ এই ভয়াৱহ বাস্তৱিক অৱস্থা সলনি কৰিব নোৱাৰে। তেওঁ লগতে কয় যে আমেৰিকাই কেতিয়াও পাকিস্তানৰ ওপৰত থকা সকলো নিষেধাজ্ঞা একেবাৰে প্ৰত্যাহাৰ নকৰে আৰু শেহতীয়াকৈ ডনাল্ড ট্ৰাম্প প্ৰশাসনে পাকিস্তানী নাগৰিকৰ ভিছা প্ৰক্ৰিয়াও বন্ধ কৰি ৰাখিছে।

সন্মিলনখনত এগৰাকী পাকিস্তানী সাংবাদিকে ভাৰত আৰু আফগানিস্তানৰ সীমান্তৰ বাবে পাকিস্তানৰ সমস্যা হৈছে বুলি দাবী কৰাত কৌছিকানে ইয়াক কেৱল এক অজুহাত বুলি আখ্যা দিয়ে। তেওঁ কয় যে ভৌগোলিক অৱস্থানক সকলো কথাতে দোষ দিব নোৱাৰি। তেওঁৰ মতে জন্মৰে পৰা পাকিস্তানক অতি বেয়া ধৰণে পৰিচালনা কৰা হৈছে আৰু ইয়াৰ কোনো সমাধান তেওঁ নেদেখে। পাকিস্তানৰ সকলো দলৰ ৰাজনীতিবিদক তেওঁ সময়ৰ অপচয় বুলি কয় আৰু সামৰিক বাহিনীক দেশখনৰ আটাইতকৈ ডাঙৰ সমস্যা বুলি অভিহিত কৰে। উল্লেখযোগ্য যে পাকিস্তানৰ ইতিহাসৰ প্ৰায় আধা সময় সামৰিক বাহিনীয়েই প্ৰত্যক্ষভাৱে দেশখন শাসন কৰি আহিছে আৰু সাধাৰণ চৰকাৰৰ সময়তো তেওঁলোকৰ প্ৰভাৱ আৰু নিয়ন্ত্ৰণ স্পষ্টভাৱে দেখা যায়।