‘গুণ্ডা কৰ’ৰ বাবেই অসমত কণীৰ দাম ১০ টকা : মন্ত্ৰী আৰু বিটিচি প্ৰধানক লক্ষ্য কৰি অখিল গগৈৰ বিস্ফোৰক অভিযোগ

বৃহস্পতিবাৰে শিৱসাগৰৰ বিধায়ক অখিল গগৈয়ে এক গুৰুতৰ অভিযোগ উত্থাপন কৰিছে। তেওঁৰ মতে, অসম আৰু পশ্চিমবঙ্গৰ সীমান্তত থকা প্ৰৱেশদ্বাৰসমূহত অবৈধভাৱে সংগ্ৰহ কৰা ‘ছিণ্ডিকেট কৰ’ বা ‘গুণ্ডা কৰ’ৰ বাবেই ৰাজ্যখনত কণী আৰু অন্যান্য অত্যাৱশ্যকীয় সামগ্ৰীৰ মূল্য অস্বাভাৱিকভাৱে বৃদ্ধি পাইছে। তেওঁ এই অবৈধ চক্ৰটো শীঘ্ৰে বন্ধ কৰাৰ বাবে চৰকাৰক দাবী জনাইছে।

বিধানসভাৰ সমীপত এক প্ৰতিবাদী কাৰ্যসূচীত সাংবাদিকৰ আগত গগৈয়ে কয় যে গুৱাহাটীত বৰ্তমান এটা কণীৰ দাম ৮.৫০ টকাৰ পৰা ১০ টকা লৈকে হৈছেগৈ। কিন্তু ৰাষ্ট্ৰীয় কণী সমন্বয় সমিতিৰ নিৰ্ধাৰিত মূল্য অনুসৰি এটা কণীৰ দাম ৫.৭৫ টকাতকৈ বেছি হ’ব নালাগে।

তেওঁ অভিযোগ কৰে যে শ্ৰীৰামপুৰ আৰু বকচিৰহাট গেটৰ মাজেৰে অসমলৈ সামগ্ৰী কঢ়িয়াই অনা ট্ৰাকসমূহক জোৰকৈ অবৈধ কৰ দিবলৈ বাধ্য কৰোৱা হয়। প্ৰতিটো কণীৰ বিপৰীতে ৩ টকাকৈ ছিণ্ডিকেটৰ নামত সংগ্ৰহ কৰা হয় বুলি তেওঁ প্ৰকাশ কৰে, যাৰ ফলত সাধাৰণ গ্ৰাহকে অতিৰিক্ত মূল্য ভৰিবলগীয়া হৈছে।

ৰাইজৰ দলৰ নেতাজনে লগতে অসমৰ কেবিনেট মন্ত্ৰী জয়ন্ত মল্ল বৰুৱা আৰু বিটিচি প্ৰধানক এই ছিণ্ডিকেটক পৃষ্ঠপোষকতা কৰা বুলি অভিযোগ উত্থাপন কৰিছে। অৱশ্যে এই পৰ্যন্ত দুয়োগৰাকী নেতাৰ পৰা কোনো ধৰণৰ প্ৰতিক্ৰিয়া জানিব পৰা হোৱা নাই। গগৈয়ে কয় যে কেৱল কণীয়েই নহয়, ব্ৰইলাৰ মুৰ্গী, মাছ, ফল-মূল, চাউল, দাইল আদি অত্যাৱশ্যকীয় সামগ্ৰীৰ ক্ষেত্ৰতো এই অবৈধ ধন সংগ্ৰহ চলি আছে। আনকি অসমৰ পৰা বাহিৰলৈ যোৱা শুকান তামোলৰ পৰাও প্ৰতি কিলোগ্ৰামত ৬০ টকাকৈ অবৈধ কৰ লোৱা হয় বুলি তেওঁ দাবী কৰে।

দিল্লীৰ বজাৰৰ সৈতে তুলনা কৰি বিধায়কগৰাকীয়ে কয় যে ৰাজধানী দিল্লীত এটা কণীৰ দাম প্ৰায় ৬.৫০ টকা, কিন্তু অসমৰ গ্ৰাহকে ইয়াৰ বাবে প্ৰায় ১০ টকা ভৰিবলগীয়া হৈছে। এই ছিণ্ডিকেট ব্যৱস্থাটোৰ জৰিয়তেই প্ৰতিটো কণীত ৩ টকাকৈ লোৱাৰ বাবেই এনে হৈছে বুলি তেওঁ মন্তব্য কৰে। অত্যাৱশ্যকীয় সামগ্ৰীৰ মূল্য হ্ৰাস কৰিবলৈ এই অবৈধ ছিণ্ডিকেট ব্যৱস্থাটো সম্পূৰ্ণৰূপে ধ্বংস কৰিব লাগিব বুলি অখিল গগৈয়ে দাবী জনায়। শিৱসাগৰৰ বিধায়কগৰাকীৰ এই অভিযোগৰ সন্দৰ্ভত ৰাজ্য চৰকাৰে এতিয়ালৈকে কোনো আনুষ্ঠানিক প্ৰতিক্ৰিয়া প্ৰকাশ কৰা নাই।