যুৱ প্ৰজন্মৰ প্ৰতিনিধি হৈয়েই ক্ষমতাত, সেই জেন-জিৰ প্ৰতিবাদতে কঁপি উঠিল বলেন শ্বাহৰ চকী; পুনৰ উত্তাল নেপাল

জেন-জিৰ আন্দোলনৰ ফলতে নেপালত অলি চৰকাৰৰ পতন ঘটিছিল। বলেন শ্বাহ ক্ষমতালৈ আহিছিল। কিন্তু এবছৰৰ ভিতৰতে চুবুৰীয়া দেশখনত পুনৰ বিদ্ৰোহৰ জুই জ্বলি উঠিল। ইয়াৰ আঁৰত আছে সেই যুৱ প্ৰজন্ম। পুনৰ সংস্থাপন অবিহনে বস্তি উচ্ছেদৰ প্ৰতিবাদত পুনৰ তেওঁলোক ৰাজপথলৈ ওলাই আহিছে। বলেনৰ পদত্যাগৰ দাবী উত্থাপিত হৈছে।

বলেন শ্বাহৰ চৰকাৰে যোৱা এপ্ৰিল মাহৰ পৰা কাঠমাণ্ডুকে ধৰি নেপালৰ বিভিন্ন অঞ্চলত উচ্ছেদ অভিযান আৰম্ভ কৰিছে। প্ৰায় ২৬০০ বস্তি ভাঙি পেলোৱা হৈছে বুলি প্ৰশাসনৰ দাবী। প্ৰায় ১৫ হাজাৰ লোক গৃহহীন হৈ পৰিছে। তেওঁলোকক হোল্ডিং চেণ্টাৰত ৰখা হৈছে। ইয়াৰ মাজতে ২ জুলাইত নেপাল চৰকাৰে ৬ জুলাইৰ ভিতৰত সকলো হোল্ডিং চেণ্টাৰ খালী কৰিবলৈ নিৰ্দেশ দিছিল।কিন্তু কমেও ৬০টা পৰিয়ালে এই নিৰ্দেশ মানিবলৈ অস্বীকাৰ কৰিছিল। তেওঁলোকে কয় যে তেওঁলোকৰ যাবলৈ আন ঠাই নাই।

বিগত কিছুদিন ধৰি ক্ৰমাগতভাৱে উমি উমি জ্বলিছিল জুই। পথত আৰক্ষীৰ বিৰুদ্ধে প্ৰতিবাদ সাব্যস্ত কৰে যুৱকসমাজে। শুকুৰবাৰে পৰিস্থিতি উত্তপ্ত হৈ পৰে। কাঠমাণ্ডুৰ এটা হোল্ডিং চেণ্টাৰত ১৫০ জন লোকক ৰখা হৈছিল। বানৰ পানী তাত প্ৰৱেশ কৰাৰ বাবে নিৰাপত্তাৰক্ষীয়ে আন ঠাইলৈ স্থানান্তৰিত কৰে।

শনিবাৰে জেন-জিৰ এটা অংশই পৰিস্থিতিৰ মূল্যায়ন কৰিবলৈ সেই স্থানলৈ যায়। অভিযোগ অনুসৰি আৰক্ষীয়ে তেওঁলোকক লাঠীচালনা কৰিছিল। গুৰুতৰভাৱে আহত হয় এজন প্ৰতিবাদকাৰী। অলপ পিছতে এই আন্দোলন সমগ্ৰ নেপালত বিয়পি পৰিল।

স্থানীয় সংবাদ মাধ্যমে দাবী কৰিছে যে বলেন শ্বাহৰ চৰকাৰে এই বিষয়ত সৰৱ হোৱাৰ বাবে ইতিমধ্যে কেইবাজনো সামাজিক কৰ্মী, ছাত্ৰ-ছাত্ৰী আৰু সাংবাদিকক গ্ৰেপ্তাৰ কৰিছে। ইয়াৰ পিছতে দেওবাৰে যৌথ ৰাষ্ট্ৰীয় বস্তি মৰ্চাৰ আহ্বানত ৰাজধানীৰ এটা চৰকাৰী কাৰ্যালয়ৰ সন্মুখত বৃহৎ সংখ্যক যুৱক-যুৱতীয়ে প্ৰতিবাদ সাব্যস্ত কৰে। তেওঁলোকৰ হাতত থকা পোষ্টাৰত লিখা আছিল – ‘দুখীয়াৰ ওপৰত অত্যাচাৰ বন্ধ কৰক’, ‘মানৱ অধিকাৰ ৰক্ষা কৰক’, ‘অবৈধ গ্ৰেপ্তাৰ বন্ধ কৰক’, ‘ভূমিহীনক আশ্ৰয় ল’বলৈ ঠাই দিয়ক’।

যোৱা বছৰ যুৱ আন্দোলনৰ ঢৌত ক্ষমতালৈ অহা বলেন শ্বাহৰ এবছৰ নৌহওঁতেই তেওঁৰ বিৰুদ্ধে জনৰোষৰ সৃষ্টি হৈছে। কেপি শৰ্মা অলি চৰকাৰৰ পতনৰ অন্যতম স্থপতি আছিল ৩৫ বছৰীয়া নেতাগৰাকী।

তেওঁ ছ’চিয়েল মিডিয়া নিষেধাজ্ঞা, নিবনুৱা সমস্যা, দুৰ্নীতি আৰু অৰ্থনৈতিক সংকটৰ বিৰুদ্ধে যুৱক-যুৱতীসকলক সংগঠিত কৰিছিল। নিৰ্বাচনত অলিক পৰাস্ত কৰি নেপালৰ প্ৰধানমন্ত্ৰীও হ’ল। কিন্তু এতিয়া সেই জনসমৰ্থন কমি আহিবলৈ আৰম্ভ কৰিছে। জেন-জিসকলে তেওঁৰ আটাইতকৈ ডাঙৰ প্ৰত্যাহ্বান হৈ পৰিছে।