ৰাজ্যত ভয়াৱহ বান! এজনৰ মৃত্যু, ৫৭ হাজাৰৰো অধিক লোক ক্ষতিগ্ৰস্ত; উদ্ধাৰ অভিযানৰ বাবে সাজু সেনা

দেওবাৰে অসমৰ বান পৰিস্থিতি অধিক ভয়াৱহ ৰূপ ধাৰণ কৰিছে। বানৰ ফলত এজনৰ মৃত্যু ঘটাৰ লগতে সাতখন জিলাৰ ৫৭ হাজাৰৰো অধিক লোক ক্ষতিগ্ৰস্ত হৈছে। ৰাজ্য চৰকাৰে ভাৰতীয় সেনা আৰু ভাৰতীয় বায়ুসেনাক সম্ভাৱ্য স্থানান্তৰ তথা উদ্ধাৰ অভিযানৰ বাবে সাজু কৰি ৰাখিছে।

অসম ৰাজ্যিক দুৰ্যোগ ব্যৱস্থাপনা প্ৰাধিকৰণৰ তথ্য অনুসৰি শিৱসাগৰত বানৰ ফলত এজন লোকৰ মৃত্যু হোৱাৰ পিছত এইবাৰৰ বানত মুঠ মৃত্যুৰ সংখ্যা পাঁচজনলৈ বৃদ্ধি পাইছে।

শেহতীয়া এএছডিএমএৰ বান বুলেটিনত কোৱা হৈছে যে চৰাইদেউ, ধেমাজি, ডিব্ৰুগড়, যোৰহাট, শিৱসাগৰ, তিনিচুকীয়া আৰু ওদালগুৰি জিলাত ৫৭,১০০ৰো অধিক লোক ক্ষতিগ্ৰস্ত হৈছে। শনিবাৰে চাৰিখন জিলাত প্ৰায় ২৪ হাজাৰ লোক আক্ৰান্ত হোৱাৰ পিছত এই সংখ্যা দুগুণতকৈও অধিক বৃদ্ধি পাইছে।

চৰাইদেউ জিলা অধিক ক্ষতিগ্ৰস্ত জিলা য’ত প্ৰায় ২৪ হাজাৰ লোক ক্ষতিগ্ৰস্ত হৈছে। তাৰ পিছতে ধেমাজিত ২২ হাজাৰৰো অধিক আৰু ডিব্ৰুগড়ত ৪ হাজাৰৰো অধিক লোক বানৰ ফলত ক্ষতিগ্ৰস্ত হৈছে।

মুখ্যমন্ত্ৰী হিমন্ত বিশ্ব শৰ্মাই কয় যে শিৱসাগৰ, চৰাইদেউ আৰু যোৰহাটত বান পৰিস্থিতি অব্যাহত থকাৰ বাবে ৰাজ্য চৰকাৰে সেনা আৰু বায়ুসেনাক সাজু থাকিবলৈ অনুৰোধ জনাইছে।

মুখ্যমন্ত্ৰী শৰ্মাই এক্সত এক পোষ্টযোগে কয় যে শিৱসাগৰ, চৰাইদেউ আৰু যোৰহাটৰ বান পৰিস্থিতি অধিক ভয়াৱহ হৈ পৰাৰ লগে লগে অসম চৰকাৰে ভাৰতীয় সেনা আৰু ভাৰতীয় বায়ুসেনাক অনুৰোধ জনাইছে যে প্ৰয়োজন হ’লে স্থানান্তৰ তথা উদ্ধাৰ অভিযানত সহায় কৰিবলৈ সাজু থাকিব লাগে।

মুখ্যমন্ত্রীয়ে চাৰিগৰাকী কেবিনেট মন্ত্রী- অজন্তা নেওগ, বিমল বৰা, কেশৱ মহন্ত আৰু সুশান্ত বৰগোহাঁইক তৎকালীনভাৱে ক্ষতিগ্রস্ত জিলাসমূহ পৰিদর্শন কৰি উদ্ধাৰ আৰু সাহায্য অভিযানৰ তদাৰক কৰাৰ লগতে ক্ষতিগ্রস্ত প্রতিটো পৰিয়াললৈ সময়মতে সাহায্য পোৱাটো নিশ্চিত কৰিবলৈ নির্দেশ দিয়ে৷

এএছডিএমএয়ে কয় যে প্ৰশাসনে চাৰিখন জিলাত ১৪টা সাহায্য শিবিৰ আৰু সাহায্য বিতৰণ কেন্দ্ৰ চলাই আছে, য’ত বৰ্তমান ৪৪০ জন দুৰ্গত লোকে আশ্ৰয় লৈ আছে। দিনৰ ভাগত চৰাইদেউৰ বিভিন্ন প্ৰান্তৰ পৰা ১০ জন লোকক ৰাজ্যিক দুৰ্যোগ সঁহাৰি বাহিনীৰ লোকে উদ্ধাৰ কৰে।

যোৱা ২৪ ঘন্টাত বিতৰণ কৰা সাহায্য সামগ্ৰীৰ ভিতৰত আছে ৫৮.১৭ কুইণ্টল চাউল, ১০.৮৯ কুইণ্টল দালি, ৩.২৬ কুইণ্টল নিমখ আৰু ৩২৬.৮৮ লিটাৰ সৰিয়হৰ তেল।

এতিয়ালৈ সমগ্ৰ ৰাজ্যৰ ২৯৮খন গাঁও বানে প্লাৱিত কৰাৰ লগতে ৩,৮৭৪.৮৪ হেক্টৰ কৃষিভূমিৰ ক্ষতিসাধন হৈছে। বানৰ ফলত কেইবাখনো জিলাৰ মথাউৰি, পথ, দলং আৰু অন্যান্য আন্তঃগাঁথনিৰো ক্ষতিসাধন হৈছে।

ডিব্ৰুগড় জিলাৰ খোৱাং অঞ্চলৰ চেনিমাৰীত বুঢ়ীদিহিং নদী বিপদ সীমাৰ ওপৰেৰে বৈ আছে। ৩৭,৫০০ৰো অধিক পোহনীয়া জীৱ-জন্তু আৰু হাঁহ-কুকুৰাও বানত ক্ষতিগ্ৰস্ত হৈছে বুলি এ এছ ডি এম এয়ে জানিবলৈ দিয়ে।