ছাত্ৰ-ছাত্ৰী আৰু শিক্ষকসকলক যন্তৰ মন্তৰত চলি থকা প্ৰতিবাদৰ পৰা আঁতৰি থাকিবলৈ পৰামৰ্শ দিল্লী বিশ্ববিদ্যালয়ৰ

দিল্লী বিশ্ববিদ্যালয়ে বৃহস্পতিবাৰে নিজৰ ছাত্ৰ-ছাত্ৰী আৰু শিক্ষকসকলক যন্তৰ মন্তৰত চলি থকা প্ৰতিবাদৰ পৰা আঁতৰি থাকিবলৈ পৰামৰ্শ দিছে। বিশ্ববিদ্যালয়ে সকিয়নি দিছে যে বেআইনী সমাবেশ বা প্ৰতিবাদত অংশগ্ৰহণ কৰিলে আইনী ব্যৱস্থা গ্ৰহণ কৰা হ‘ব পাৰে। ইয়াৰ লগতে কোৱা হৈছে যে এনে কাৰ্যই ছাত্ৰ-ছাত্ৰীসকলৰ ব্যক্তিগত নিৰাপত্তাত ভাবুকি কঢ়িয়াই অনাৰ উপৰিও তেওঁলোকৰ শৈক্ষিক আৰু পেছাদাৰী ভৱিষ্যতৰ ওপৰত বিৰূপ প্ৰভাৱ পেলাব পাৰে। ছাত্ৰ-ছাত্ৰীসকলক ছচিয়েল মিডিয়াত বিয়পি পৰা ভুৱা আৰু বিভ্ৰান্তিকৰ খবৰৰ পৰা সাৱধান হ‘বলৈও অনুৰোধ জনোৱা হৈছে।

এই পৰিস্থিতিৰ মাজতে বিৰোধী নেতা ৰাহুল গান্ধীয়ে বিশ্ববিদ্যালয়ৰ এই সকিয়নিৰ তীব্ৰ বিৰোধিতা কৰিছে আৰু ছাত্ৰ-ছাত্ৰীসকলক ভাবুকি দিয়াৰ সাহস কেনেকৈ হ‘ল বুলি প্ৰশ্ন তুলিছে। আনহাতে, ককৰোচ জনতা পাৰ্টী চমুকৈ চিজেপিয়ে আৰক্ষীৰ বৰ্বৰতাৰ অভিযোগ তুলি শুকুৰবাৰে সমগ্ৰ দেশজুৰি শান্তিপূৰ্ণ প্ৰতিবাদৰ আহ্বান জনাইছে। যোৱা ২০ জুনৰ পৰা আৰম্ভ হোৱা এই প্ৰতিবাদ এতিয়া এক ডাঙৰ ৰাজনৈতিক বিবাদলৈ ৰূপান্তৰিত হৈছে। প্ৰতিবাদকাৰীসকলে শিক্ষামন্ত্ৰী ধৰ্মেন্দ্ৰ প্ৰধানৰ পদত্যাগৰ দাবীত অটল হৈ আছে আৰু এই দাবী কোনো কাৰণতে আপোচ কৰা নহ‘ব বুলি স্পষ্ট কৰি দিছে।

এই অচলাৱস্থা আঁতৰাবলৈ কেন্দ্ৰীয় চৰকাৰে প্ৰচেষ্টা অব্যাহত ৰাখিছে। কেন্দ্ৰীয় স্বাস্থ্যমন্ত্ৰী জে পি নড্ডাই চৰকাৰ যে আলোচনালৈ সদায় প্ৰস্তুত সেই কথা দোহাৰিছে। একেদৰে কেন্দ্ৰীয় মন্ত্ৰী জিতেন্দ্ৰ সিঙে জানিবলৈ দিছে যে চিজেপি নেতৃত্বলৈ আলোচনাৰ বাবে ইতিমধ্যে চাৰিখন আনুষ্ঠানিক প্ৰস্তাৱ প্ৰেৰণ কৰা হৈছে। ইয়াৰ উপৰিও প্ৰধানমন্ত্ৰী নৰেন্দ্ৰ মোদীয়ে বুধবাৰে এই বিবাদ সন্দৰ্ভত প্ৰতিক্ৰিয়া প্ৰকাশ কৰি কয় যে প্ৰশ্নকাকত ফাদিল চক্ৰৰ সৈতে জড়িত লোকসকলক কঠোৰ শাস্তি প্ৰদানৰ আৰু বিচাৰ প্ৰক্ৰিয়া খৰতকীয়া কৰাৰ বাবে চৰকাৰে ফাষ্ট ট্ৰেক আদালত স্থাপন কৰিব।