মুখ্যমন্ত্ৰীৰ টেবুলত ‘তাণ্ডৱ নৃত্য’ৰ হুংকাৰ অখিল গগৈৰ! মন্ত্ৰী-বিধায়কৰ চিণ্ডিকেটেই শিৱসাগৰলৈ আনিলে প্ৰলয়ংকৰী বান

উজনি অসমৰ শিৱসাগৰ, চৰাইদেউ আৰু যোৰহাটত সৃষ্টি হোৱা প্ৰলয়ংকৰী বান পৰিস্থিতিৰ পৰিপ্ৰেক্ষিতত ৰাজ্য চৰকাৰৰ ভূমিকা আৰু সাহায্য প্ৰদান প্ৰক্ৰিয়াক লৈ তীব্ৰ ক্ষোভ উজাৰিছে শিৱসাগৰৰ বিধায়ক অখিল গগৈয়ে। বানত সৰ্বস্বান্ত হৈ পৰা পৰিয়ালসমূহক মুখ্যমন্ত্ৰী ড° হিমন্ত বিশ্ব শৰ্মাই ঘোষণা কৰা ১৫ হাজাৰ টকাৰ এককালীন সাহায্যক বানপীড়িতৰ প্ৰতি ‘চৰম অপমান’ আৰু ‘ভিক্ষা’ বুলি আখ্যা দিছে বিধায়কগৰাকীয়ে। তেওঁৰ স্পষ্ট দাবী, চৰকাৰে মাত্ৰ ১৫ হাজাৰ টকাৰে মানুহৰ জীৱন আৰু সপোনৰ মূল্য জুখিব নোৱাৰে; সেয়েহে প্ৰতিটো ক্ষতিগ্ৰস্ত পৰিয়ালক অতি কমেও ১০ লাখ টকাকৈ এককালীন ক্ষতিপূৰণ প্ৰদান কৰিব লাগিব। দাবী মানি নোলোৱালৈকে মুখ্যমন্ত্ৰীক শান্তিত থাকিবলৈ নিদিয়ে বুলি সকিয়নী দি গগৈয়ে হুংকাৰ দিয়ে যে প্ৰয়োজনত তেওঁ নিজৰ জীৱনকো তুচ্ছ কৰি বিধানসভাৰ দৰেই মুখ্যমন্ত্ৰীৰ কাৰ্যালয়ৰ টেবুলৰ ওপৰতো উঠি ‘শিৱৰ তাণ্ডৱ’ কৰিব আৰু শিৱসাগৰৰ ৰাইজক লগত লৈ মুখ্যমন্ত্ৰীৰ বাসভৱন ঘেৰাও কৰিব।

কেৱল প্ৰাকৃতিক কাৰণেই নহয়, বৰঞ্চ শাসকীয় দলৰ মন্ত্ৰী-বিধায়কৰ লুণ্ঠন আৰু চিণ্ডিকেট ৰাজেই এই মহাপ্ৰলয়ৰ মূল কাৰণ বুলি এক ভয়ংকৰ অভিযোগ উত্থাপন কৰিছে গগৈয়ে। তেওঁ পোনপটীয়াভাৱে প্ৰভাৱশালী মন্ত্ৰী পীযুষ হাজৰীকা, জয়ন্ত মল্লবৰুৱা, বিধায়ক সুশান্ত বৰগোহাঁই, বলীন চেতিয়া আৰু স্বয়ং মুখ্যমন্ত্ৰীলৈ আঙুলি টোঁৱাই অভিযোগ কৰে যে এওঁলোকৰ ছত্ৰছায়াতেই নাগালেণ্ডৰ পাহাৰত কয়লা আৰু শিলৰ অবাধ চিণ্ডিকেট চলিছে। শিল-কয়লা খানি খানি পাহাৰত বিশাল কৃত্ৰিম হ্ৰদ সৃষ্টি কৰা আৰু ফ’ৰলেন পথ নিৰ্মাণৰ নামত এন.এইচ.আই.ডি.চি.এল (NHIDCL) তথা ঠিকাদাৰ সংস্থাই অবৈজ্ঞানিকভাৱে পাহাৰ কটাৰ ফলতেই পানী ওলাই যোৱাৰ পথ বন্ধ হৈ শিৱসাগৰ-চৰাইদেউত এই জলপ্ৰলয়ৰ সৃষ্টি হ’ল বুলি তেওঁ ক্ষোভ প্ৰকাশ কৰে।

ৰাজ্যৰ এনে চৰম দুৰ্যোগৰ সময়তো কেন্দ্ৰীয় চৰকাৰৰ বঞ্চনা আৰু মুখ্যমন্ত্ৰীৰ স্থিতিক তীব্ৰ সমালোচনা কৰে অখিল গগৈয়ে। মুখ্যমন্ত্ৰীৰ শেহতীয়া দিল্লী ভ্ৰমণক কটাক্ষ কৰি তেওঁ কয় যে বানপীড়িতৰ কাষত থকাৰ পৰিৱৰ্তে মুখ্যমন্ত্ৰীয়ে দিল্লীত গৈ আশ্ৰয় লৈছিল যদিও প্ৰধানমন্ত্ৰীয়ে তেওঁক সাক্ষাৎ পৰ্যন্ত দিয়াৰ প্ৰয়োজনবোধ নকৰিলে। ভাৰতৰ আন ৰাজ্যত দুৰ্যোগ হ’লে তৎকালীনভাৱে কেন্দ্ৰই কোটি কোটি টকা মুকলি কৰি দিয়ে, কিন্তু অসমৰ সম্পদ প্ৰতিদিনে লুটি নিয়া দিল্লীয়ে অসমৰ এই ভয়ংকৰ বানক আজিলৈকে ‘ৰাষ্ট্ৰীয় দুৰ্যোগ’ হিচাপে ঘোষণা নকৰিলে বুলি তেওঁ আক্ষেপ প্ৰকাশ কৰে। আনকি প্ৰধানমন্ত্ৰী বা গৃহমন্ত্ৰীয়ে এবাৰলৈ আকাশমাৰ্গেৰেও বান পৰিস্থিতি পৰ্যবেক্ষণ নকৰিলে বুলি উল্লেখ কৰি তেওঁ কয় যে ইয়াৰ পিছতো মুখ্যমন্ত্ৰী বা বিজেপিৰ সাংসদসকলে দিল্লীৰ পৰা একো এটা আদায় কৰিব নোৱাৰি কেৱল গামোচা পিন্ধাই ভাওনাহে কৰিছে।

চৰকাৰী সাহায্যৰ ফোপোলা স্বৰূপ উদঙাই দি গগৈয়ে কয় যে চৰকাৰে বানপীড়িতক বচোৱা নাই, বৰঞ্চ অসমৰ ৰাইজেহে নিজৰ গাঁঠিৰ ধন ভাঙি কুইণ্টলে কুইণ্টলে সাহায্য দি মানুহক বচাইছে। চৰকাৰে বানপীড়িত জীৱ-জন্তুৰ বাবে সামান্য গো-গ্ৰাস পৰ্যন্ত যোগান ধৰিব পৰা নাই বুলি তেওঁ অভিযোগ কৰে। লগতে, অৰুণোদয় আঁচনিৰ ধন আগষ্ট মাহৰ বাবে চাৰিখন জিলাত ২৫০০ টকালৈ বৃদ্ধি কৰি মুখ্যমন্ত্ৰীয়ে নিজৰ ব্যৰ্থতা ঢাকিবলৈ চেষ্টা কৰা বুলি উল্লেখ কৰি গগৈয়ে কয় যে এই ধন সকলো মহিলাই পাব লাগিব। মুখ্যমন্ত্ৰীয়ে যদি অসমৰ মানুহৰ দুৰ্দশাৰ সময়ত দিল্লীৰ পৰা প্ৰাপ্য আদায় কৰিব নোৱাৰে, তেন্তে তেওঁৰ পদত্যাগ কৰা উচিত বুলিও অখিল গগৈয়ে স্পষ্ট কৰি দিয়ে।