বিদেশত পঢ়াৰ খৰচ ক’ৰ পৰা আহিল? চিজেপিৰ প্ৰতিষ্ঠাপক অভিজিৎ দীপকেৰ পিতৃৰ সম্পত্তিৰ তদন্তৰ দাবী আৰটিআই কৰ্মীৰ

ককৰোচ জনতা পাৰ্টীৰ প্ৰতিষ্ঠাপক অভিজিৎ দীপকেৰ পিতৃৰ সা-সম্পত্তি আৰু আয়ক লৈ এতিয়া তীব্ৰ প্ৰশ্নৰ সৃষ্টি হৈছে। এগৰাকী অৱসৰপ্ৰাপ্ত চৰকাৰী কৰ্মচাৰীয়ে কেনেকৈ নিজৰ পুত্ৰৰ বিদেশত শিক্ষা গ্ৰহণৰ বিশাল খৰচ বহন কৰিলে, সেয়া জানিবলৈ তথ্য জনাৰ অধিকাৰ আইনৰ অধীনত আবেদন দাখিল কৰিছে চুৰাটৰ এগৰাকী আৰটিআই কৰ্মীয়ে। তেওঁ দীপকেৰ পিতৃ ভগৱানৰাও দীপকেৰ সম্পত্তিৰ তদন্ত বিচৰাৰ লগতে নিৰ্বাচন আয়োগ আৰু কেন্দ্ৰীয় জিএছটি কৰ্তৃপক্ষৰ ওচৰত চিজেপিৰ পঞ্জীয়ন আৰু পুঁজিৰ উৎসৰো অনুসন্ধানৰ দাবী জনাইছে।

জানিব পৰা মতে, দীপকেৰ পিতৃ ভগৱানৰাও মহাৰাষ্ট্ৰ চৰকাৰৰ এগৰাকী কৰ্মচাৰী আছিল। আৰটিআই কৰ্মী অমিত তিৱাৰীয়ে সংশ্লিষ্ট কৰ্তৃপক্ষলৈ পত্ৰ প্ৰেৰণ কৰি প্ৰশ্ন কৰিছে যে চাকৰিৰ পৰা অৱসৰ গ্ৰহণ কৰাৰ পিছতো তেওঁ কেনেকৈ আমেৰিকাৰ বষ্টনত অধ্যয়নৰত পুত্ৰৰ শিক্ষাৰ খৰচ যোগাৰ কৰিলে? উল্লেখ্য যে, অভিজিৎ দীপকে যোৱা জুন মাহৰ আৰম্ভণিতে দেশলৈ উভতি আহিছিল।

শেহতীয়াকৈ নিট (NEET) কেলেংকাৰীৰ প্ৰতিবাদত দিল্লীৰ যন্তৰ-মন্তৰকে ধৰি দেশৰ বিভিন্ন প্ৰান্তত আন্দোলন কৰা চিজেপিৰ একাংশ সদস্যৰ বিৰুদ্ধে এফআইআৰ ৰুজু হোৱাৰ লগতে কেইবাজনো আটক হৈছে। তেওঁলোকক দিয়া আইনী সাহায্যৰ অনুদানৰ পুঁজি ক’ৰ পৰা আহিছে, তাক লৈয়ো আৰটিআই কৰ্মীগৰাকীয়ে প্ৰশ্ন তুলিছে। ১৯৫১ চনৰ জনপ্ৰতিনিধিত্ব আইনৰ ২৯(এ) ধাৰাৰ অধীনত চিজেপি পঞ্জীয়নভুক্ত হয় নে নহয়, সেয়াও নিৰ্বাচন আয়োগৰ পৰা জানিব বিচাৰিছে তিৱাৰীয়ে। তেওঁৰ মতে, “পঞ্জীয়নভুক্ত নোহোৱাকৈয়ে চিজেপিয়ে এটা ৰাজনৈতিক দলৰ দৰে কাম কৰি আছে আৰু আইনী সাহায্যৰ বাবে এক কোটি টকাৰ অনুদান লাভ কৰিছে। সেয়েহে আইন অনুসৰি ইয়াৰ পঞ্জীয়ন হৈছিল নে নাই সেয়া নিৰ্বাচন আয়োগে পৰীক্ষা কৰা উচিত।” যদি পঞ্জীয়ন হোৱা নাই, তেন্তে চিজেপিৰ অনুদানৰ ৰচিদ পৰীক্ষা কৰিব লাগে বুলিও তেওঁ দাবী জনায়।

যোৱা সোমবাৰে কংগ্ৰেছ সাংসদ তথা জ্যেষ্ঠ অধিবক্তা কপিল চিবলে প্ৰতিবাদকাৰীসকলৰ গোচৰ চলাবলৈ চিজেপিক আইনী সাহায্য হিচাপে ১ কোটি টকা প্ৰদান কৰাৰ কথা ঘোষণা কৰিছিল। এই অনুদানক লৈ কেন্দ্ৰীয় জিএছটি কৰ্তৃপক্ষৰ ওচৰত আবেদন দাখিল কৰা তিৱাৰীয়ে প্ৰশ্ন কৰিছে যে চিবলৰ এই অনুদানৰ ওপৰত ১৮ শতাংশ জিএছটি আৰোপ কৰা উচিত নেকি? বিষয়টো বিবেচনা কৰি চাবলৈ তেওঁ জিএছটি কৰ্তৃপক্ষক অনুৰোধ জনাইছে।

ইফালে, গোচৰ প্ৰত্যাহাৰ সন্দৰ্ভত উচ্চতম ন্যায়ালয়ৰ নিৰ্দেশৰ পিছতে কেন্দ্ৰীয় চৰকাৰ আৰু চিজেপিৰ মাজত সংঘাত আৰম্ভ হৈছে। কেন্দ্ৰই স্পষ্ট কৰি দিছে যে যাৰ বিৰুদ্ধে পূৰ্বৰ অপৰাধমূলক গোচৰ আছে, তেওঁলোকক ৰেহাই দিয়া নহ’ব। কিন্তু চিজেপিয়ে এই সিদ্ধান্ত মানি ল’বলৈ অস্বীকাৰ কৰি প্ৰয়োজনত পুনৰ আন্দোলন আৰম্ভ কৰাৰ হুংকাৰ দিছে।