নগাঁৱৰ ৰাইদঙীয়াত দুৰ্বৃত্তৰ গুলীচালনা; দুই যুৱকৰ পৰা লুটি নিলে ১,৮০,০০০ টকা

নগাঁৱৰ ৰাইদংগীয়াত আজি বিয়লি সংঘটিত এক চাঞ্চল্যকৰ ডকাইতি কাণ্ডই অঞ্চলটোত তীব্ৰ প্ৰতিক্ৰিয়াৰ সৃষ্টি কৰিছে। উক্ত ঘটনাত দুজন লোক দুৰ্বৃত্তৰ আক্ৰমণৰ বলি হ’বলগীয়া হয়।

প্ৰাপ্ত তথ্য মতে, ৰাইদংগীয়াত আজি আবেলি অস্ত্ৰৰে সু-সজ্জিত এটা তিনিজনীয়া দুৰ্বৃত্তৰ অচিনাক্ত দলে অঞ্চলটোৰ দুজনকৈ লোকক আক্ৰমণ কৰাৰ লগতে শূন্যলৈ গুলী ফুটাই তেওঁলোকৰ পৰা নগদ ১,৮০,০০০ টকা লুটি লৈ যায়।

ডকাইতৰ দলে বলপূৰ্বকভাৱে টকা কাঢ়ি নিয়া যুৱক দুজন হৈছে গোবিন্দ শৰ্মা আৰু সুব্ৰত দে। তেওঁলোক হিন্দুস্থান লিভাৰৰ কৰ্মচাৰী বুলি জানিব পৰা গৈছে।

এই ঘটনাৰ খবৰ পোৱাৰ পিছত জাজৰি আৰক্ষী ঘটনাস্থলীত উপস্থিত হৈ তদন্ত অব্যাহত ৰাখিছে যদিও বাতৰি লিখা পৰলৈকে দোষীক কৰায়ত্ত কৰিবলৈ সক্ষম হোৱা নায়।