মিন্টু আৰু জয়াৰ বিবাহ সম্পন্ন : ঘোঁৰাথালৰ হত্যাকাণ্ডৰ ৬ অভিযুক্তক হাজিৰ কৰোৱা হ’ব আদালতত

নলবাৰীৰ ঘোঁৰাথালত যোৱা মঙলবাৰে বিবাহ অনুষ্ঠানত ফটকা ফুটোৱাক লৈ সংঘটিত হোৱা হত্যাকাণ্ডৰ পিছত গাঁৱখনত বিৰাজ কৰা কৰুণ পৰিস্থিতিৰ এতিয়া অৱসান ঘটোৱা নাই। চকুৰ পচাৰতে অসহিষ্ণু এদল লোকৰ জিঘাংসা বলি হ’ল এগৰাকী ব্যক্তি। মুহৰ্তৰ ভিতৰতে এটি শুভ অনুষ্ঠানৰ ঠাইত মানৱতাক চৰম উপহাস কৰি সৃষ্টি হৈ পৰে এক হত্যাৰ দৰে দানৱীয় ঘটনা।

ইপিনে পৱিত্ৰ বিবাহ বান্ধোনত সোমোৱাৰ মুহূৰ্ততে বাধাৰ সন্মুখীন হৈ পৰে দৰা মিণ্টু আৰু কইনা জয়া। ঘটনাৰ পিছতে মুহূৰ্ততে মূৰত সৰগ ভাগি পৰিছিল দৰা–কইনাৰ লগতে দুই পৰিয়ালৰ। কইনাঘৰত অনাকাংক্ষিত ঘটনা সংঘটিত হোৱাৰ বাবে স্থগিত হৈ পৰে দুয়োৰে বিবাহ।

কিন্তু মহানুভৱতাৰ পৰিচয় দি দৰা  মিণ্টুৰ পিতৃয়ে এক প্ৰশংসনীয় সিদ্ধান্ত গ্ৰহণ কৰে। মিণ্টুৰ পিতৃৰ সিদ্ধান্ত অনুসৰি মুকালমুৱাৰ দৰাঘৰৰ চোতালতে সম্পন্ন হ’ল দুয়োৰে বিবাহ।

উল্লেখযোগ্য যে কইনাঘৰত কেইজনমান উন্মত্ত যুৱকৰ প্ৰহাৰত যতীন দাস নামৰ লোকজনৰ মৃত্যু হৈছিল। যতীন দাসৰ হত্যাৰ সৈতে ৬ জন লোকক আৰক্ষীয়ে ইতিমধ্যে গ্ৰেপ্তাৰ কৰিছে। জানিব পৰা মতে হত্যাকাণ্ডত জড়িত ৬ অভিযুক্তক আজি আদালতত হাজিৰ কৰোৱাৰ সম্ভাৱনা আছে।

ইপিনে সম্প্ৰতি ঘোঁৰাথালত উত্তেজনা কিছু শাম কাটিছে যদিও নিশাৰ ভাগত আৰক্ষী আৰু চি আৰ পি এফৰ কটকটীয়া নিৰাপত্তা ব্যৱস্থা বাহাল ৰখা হৈছে।