আন্তঃৰাষ্ট্ৰীয় পৰ্যায়ত জিলিকিল নগাঁৱৰ ক্ৰীড়াবিদ : সমৰকলাত ৮ জনে আঁজুৰিলে সাফল্যৰ মুকুট

বিশ্বৰ ক্ৰীড়া জগতখনত নগঞা দৌৰবিদ হিমা দাসে কঢ়িওৱা ঈৰ্ষণীয় সাফল্যৰ পাছত এইবাৰ অন্য ৮ গৰাকী নগঞা ক্ৰীড়াবিদে আন্তঃৰাষ্ট্ৰীয় পৰ্যায়ত সফলতা অৰ্জন কৰি দেশ, ৰাজ্যৰ লগতে গৃহ জিলা নগাঁৱলৈ গৌৰৱ কঢ়িয়াবলৈ সক্ষম হৈছে।

আন্তঃৰাষ্ট্ৰীয় সমৰকলাত ভাৰতৰ হৈ খেলি সাফল্য অৰ্জন কৰা খেলুৱৈ কেই গৰাকী হৈছে ক্ৰমে- মৃণাল কুমাৰ মহন্ত, ৰিপুঞ্জয় কলিতা, আদ্ৰিক শইকীয়া, হেপ্পী দাস, অনুৰাগ লস্কৰ, প্ৰাচুৰ্য বৰা, মন মাধুৰ্য গোস্বামী আৰু গৌৰৱ শৰ্মা।

হিমাচল প্ৰদেশৰ পালমপুৰত ২১-২২ জুলাইলৈ অনুষ্ঠিত আন্তঃৰাষ্ট্ৰীয় ইউনিফাইড সমৰকলা চেম্পিয়ন শ্বিপ ২০১৮’ ত ভাৰতীয় দলৰ হৈ প্ৰতিনিধিত্ব কৰি ৭০-৭৪ কেজি (পুৰুষ) শাখাত মৃণাল কুমাৰ মহন্তই স্বৰ্ণ, ৭৫-৭৯ কেজি( পুৰুষ) শাখাত ৰিপুঞ্জয় কলিতাই স্বৰ্ণ, ৪০-৪৪ কেজি শাখাত আদ্ৰিক শইকীয়াই স্বৰ্ণ, ৩০-৩৪ কেজি শাখাত হেপ্পী দাসে স্বৰ্ণপদক লাভ কৰিবলৈ সক্ষম হয়।

আনহাতে, ৩০-৩৪ কেজি শাখাত অনুৰাগ লস্কৰ আৰু ৫০-৫৫ কেজি শাখাত প্ৰাচুৰ্য বৰাই ৰূপৰ পদক অৰ্জন কৰাৰ লগতে ৫৫-৫৯ কেজি শাখাত মন মাধুৰ্য গোস্বামী, ৪৫-৪৯ কেজি শাখাত গৌৰৱ শৰ্মাই ব্ৰঞ্জৰ পদক আঁজুৰি আনিবলৈ সক্ষম হৈছে।

উল্লেখ্য যে, এই খেলুৱৈগৰাকীয়ে বৰ্তমান নগাঁৱৰ ‘নাইটছ সমৰকলা প্ৰশিক্ষণ কেন্দ্ৰ’ৰ মুখ্য প্ৰশিক্ষক মিন্টু গোস্বামীৰ তত্ত্বাৱধানত প্ৰশিক্ষণ গ্ৰহণ কৰি আছে। ইপিনে, ক্ৰীড়াৰ আন্তঃৰাষ্ট্ৰীয় প্ৰেক্ষাপটত এজনৰ পাছত আন এজন নগঞা সু-সন্তানে কঢ়িয়াই অনা সফলতাই নগাঁওবাসীক উৎফুল্লিত কৰি তুলিছে।