আজি শতিকাৰ আটাইতকৈ দীঘল চন্দ্ৰগ্ৰহণ; মাজনিশা ঘটিব এই বিৰল মহাজাগতিক ঘটনা

২৭ জুলাই, অৰ্থাৎ আজি মাজৰাতি পৃথিৱীবাসীয়ে দেখা পাব এই শতিকাৰ আটাইতকৈ দীঘল চন্দ্ৰগ্ৰহণটো । ২৭ জুলাইৰ অন্তিম সময় আৰু ২৮ জুলাইৰ আৰম্ভণিৰ সময়খিনিত, অৰ্থাৎ আজি মাজনিশা এই বিৰল মহাজাগতিক ঘটনাটো ঘটিব।

এই মহাজাগতিক পৰিঘটনাৰ সময়ত চন্দ্ৰটো পৃথিৱীৰ ছায়াৰ কেন্দ্ৰৰ মাজেৰে পাৰ হৈ যাব আৰু ডেৰ ঘণ্টাৰো অধিক সময় চন্দ্ৰটো ঢাক খাই থাকিব। গতিকে এই সময়ত চন্দ্ৰটো সম্পূৰ্ণকৈ ঢাক খাই পৰিব।

যদিহে আকাশ সেই সময়ত পৰিষ্কাৰ থাকে তেন্তে অসম তথা উত্তৰ-পূবৰ মানুহেও এই বিৰল পৰিঘটনাৰ সাক্ষী হোৱাৰ সুযোগ পাব।

গ্ৰহণ লগাৰ সঠিক সময় হ’ল নিশা ১১.৫৪ বজা। আৰু চন্দ্ৰটো সম্পূৰ্ণকৈ ঢাক খাই পৰিব প্ৰায় ১ বজাত৷ এঘণ্টাৰো বেছি সময় ঢাক খাই থাকিব চন্দ্ৰটো। সেই সময়ত চন্দ্ৰটো পাতল ৰঙচুৱা দেখা যাব৷
খণ্ডগ্ৰাস আৰম্ভ- ২৩ বাজি ৫৩মিনিট ৫২ ছেকেণ্ড।

পূৰ্ণগ্ৰাস আৰম্ভ- ০০ বাজি ৫৯ মিনিট ৩৯ ছেকেণ্ড।
সৰ্বোচ্চ গ্ৰহণ- ০১ বাজি ৫১ মিনিট ২৭ ছেকেণ্ড
পূৰ্ণগ্ৰাস শেষ- ০২বাজি ৪৩মিনিট ১৪ ছেকেণ্ড
খণ্ডগ্ৰাস শেষ- ০৩বাজি ৪৯মিনিট ০২ ছেকেণ্ড

বিজ্ঞানীসকলৰ মতে এই গ্ৰহণ ৰাইজে খালী চকুৰে চাব পাৰিব৷ ইয়াৰ বাবে চকুত ফিল্টাৰ নালাগে। অৱশ্যে অসমৰ আকাশ ডাৱৰ আবৃত হৈ থাকিব বুলি আঞ্চলিক বতৰ বিজ্ঞান কেন্দ্ৰই জনাইছে আৰু এইটোৱে হতাশ কৰিছে বহুতো উৎসুক লোকক।