আলফাৰ চহিদ দিৱস: নাগৰিকত্ব বিধেয়ক বিৰোধিতা কৰি যোৱাৰ সংকল্প

‘জাতীয় সংগ্ৰামত প্ৰাণ আহুতি দিয়া বীৰ চহিদসকললৈ’ শ্ৰদ্ধাঞ্জলিৰে ‘নাগৰিকত্ব বিধেয়কৰ বিৰোধিতা কৰি যোৱাৰ সংকল্পৰে’ আজি ২৭ জুলাইত তিনিচুকীয়াৰ কাকপথাৰস্থিত ডেজিগনে’টেদ শিবিৰত আলফাৰ ২৭ সংখ্যক চহিদ দিৱস পালন কৰে আলোচনাপন্থী আলফা গোটে।

‘নাগৰিকত্ব সংশোধনী বিধেয়ক বাতিল নোহোৱালৈকে বিৰোধিতা কৰি যাম আমি,’ চহিদ দিৱসত ঘোষণা আলফা নেতা প্ৰবাল নেওগৰ।

আনহাতে নাগৰিকত্ব বিধেয়ক গৃহীত হ’লে ভাৰত চৰকাৰৰ লগত হৈ থকা আলফাৰ আলোচনাৰ কোনো মূল্য নাথাকিব বুলি মত প্ৰকাশ কৰে আলফা নেতা জিতেন দত্তই। এই বিধেয়ক গৃ্হীত হ’লে পুনৰ অস্ত্ৰ তুলি লোৱাৰো বিকল্প নাথাকিব বুলিও পূৰ্বৰ দৰেই দত্তই মন্তব্য কৰে।

‘প্ৰয়োজন হ’লে পুনৰ অস্ত্ৰ তুলি ল’ম। স্ব-জাতিৰ বাবে প্ৰয়োজনত আলোচনা ত্যাগ কৰিম,’ কেডাৰ্সকলক সম্বুধি দিয়া ভাষণত দত্তৰ হুংকাৰ।

প্ৰবাল নেওগ, জিতেন দত্তৰ লগতে আজিৰ চহিদ দিৱসৰ কাৰ্য্যসূচীত অন্টু চাউদাং, জোন ভূঞা আদি নেতাৰ লগতে আন সদস্যসকলেও অংশ গ্ৰহণ কৰে।

আনহাতে নলবাৰীৰ টিহুত থকা আলফাৰ নৱনিৰ্মাণ কেন্দ্ৰত আয়োজিত চহিদ দিৱসত আলফাৰ সভাপতি অৰবিন্দ ৰাজখোৱা, প্ৰতিষ্ঠাপক সাধাৰণ সম্পাদক অনুপ চেতিয়া, উপ সভাপতি প্ৰদীপ গগৈ, বৈদেশিক সচিব শশ চৌধুৰী, উপ মুখ্য সেনাধ্যক্ষ ৰাজু বৰুৱা, বিজু ডেকা আদি নেতাৰ লগতে কেডাৰসকলে ভাগ লয়।

বিজেপি চৰকাৰে হিন্দু বাংলাদেশীক সংস্থাপন কৰিব খুজিলে আকৌ যুঁজিম বুলি চহিদ দিৱসত মন্তব্য কৰে আলফাৰ সভাপতি অৰবিন্দ ৰাজখোৱাই।

১৯৯১ চনৰ ২৭ জুলাইৰ দিনটোতে দৰঙ জিলাৰ দিপীলাত ভাৰতীয় সীমান্ত সুৰক্ষা বাহিনীয়ে পথাৰত দৌৰিবলৈ দি পিছফালৰ পৰা গুলীয়াই ৫ জনকৈ নিৰীহ গঞাক হত্যা কৰিছিল।

মৃত্যুক সাৱটি লৈছিল গণেশ ডেকা, চন্দ্ৰ বৰুৱা, কৰুণা কলিতা, কেশৱ ডেকা আৰু প্ৰমোদ কলিতাই।

তেতিয়াৰে পৰা আলফাই প্ৰতিবছৰে এই দিনটো চহিদ দিৱস হিচাপে পালন কৰি আহিছে।