শিৱসাগৰত দুদিনীয়াকৈ অনুষ্ঠিত সদৌ অসম শিশু নাট সমাৰোহৰ সফল সামৰণি

শিৱসাগৰ নাট্য বিদ্যালয়ৰ উদ্যোগত খোজ, ৰংমন, যুনান্তৰ আৰু ৰংপুৰ বাৰ্তাৰ সহযোগত ছাত্ৰ-ছাত্ৰী সকলৰ মানসিক উৎকৰ্ষ সাধনৰ প্ৰতি লক্ষ্য ৰাখি যোৱা ২৯ আৰু ৩০  জুলাইত   শিৱসাগৰৰ  নাট্যমন্দিৰত অনুষ্ঠিত  হোৱা সদৌ অসম শিশু নাট সমাৰোহৰ সফল সমাপ্তি ঘটে।

সপ্তম বাৰ্ষিক সদৌ অসম শিশু নাট সমাৰোহখন বন্তি প্ৰজ্বলনেৰে উদ্ধোধন কৰে বিশিষ্ট গীতাৰ বাদক পাৰ্থ বৰগোহাঁইয়ে। নাট সমাৰোহৰ লগত সংগতি ৰাখি প্ৰশান্ত বৰগোহাঁই আৰু সন্তোষ দত্তৰ সম্পাদনাত প্ৰকাশ কৰি উলিওৱা ‘অংকুৰণ’ নামৰ এখন স্মৃতিগ্ৰন্থ উন্মোচন কৰে বিশিষ্ট নিবন্ধকাৰ তথা শিক্ষাবিদ চামচুল বাৰিকে।

আনহাতে স্মতিগ্ৰন্থ উন্মোচন কৰি শিক্ষাবিদ চামচুল বাৰিকে এনে ধৰণৰ নাট সমাৰোহে উদীয়মান নাট্যকৰ্মী সকলৰ বাবে নতুন চিন্তা-চৰ্চাৰ বাট মুকলি কৰিছে বুলি উল্লেখ কৰি লগতে নৱপ্ৰজন্মক সংস্কৃতি চৰ্চাৰ লগত এই নাট সমাৰোহে পৰিচয় কৰাই দিছে বুলিও মন্তব্য কৰে। নাট সমাৰোহৰ পূৰ্বে নাজিৰাৰ দেওধানী শিল্পী সমাজে সুৰ সমলয় আৰু জয়া মহিলা সমিতিয়ে এক কোৰাচ পৰিবেশন কৰে।

প্ৰাপ্ত তথ্য মতে শিশু নাট সমাৰোহত দুয়োটা দিনতে অসমৰ বিভিন্নস্থানৰ পৰা প্ৰায় ৩৩ টা শিশু নাট্যৰ দলে অংশ গ্ৰহণ কৰে। সমাৰোহত বিচাৰকৰ ফলাফল অনুসৰি শ্ৰেষ্ঠ নাট্য দলৰ সন্মান লাভ কৰে ( যুটীয়াভাৱে ) ‘দ্বীপ আৰু ৰূপাৰ নতুন নতুন বন্ধু’, আৰু ‘ঘোৰা কংস বধ’, দ্বিতীয় শ্ৰেষ্ঠ নাট্য দলৰ সন্মান লাভ কৰে ‘নিমখৰ সমান বৰ নাই নাই নাই’, আৰু তৃতীয় শ্ৰেষ্ঠ নাট্য দলৰ সন্মান লাভ কৰে ‘গড়াল’।

আনহাতে শ্ৰেষ্ঠ শৃংখলাবদ্ধ দলৰ বঁটা লাভ কৰে ‘মানুহ মানুহৰ বাবে’। শ্ৰেষ্ঠ অভিনেতা আৰু অভিনেত্ৰীৰ বঁটা লাভ কৰে ক্ৰমে হৰ্ষদ কাশ্যপ  আৰু গৰিমা বৰুৱাই। শ্ৰেষ্ঠ পৰিচালকৰ বঁটা লাভ কৰে উৎপলা দাসে (দ্বীপ আৰু ৰূপাৰ নতুন নতুন বন্ধু)। শ্ৰেষ্ঠ সংগীত পৰিচালনাৰ বঁটা লাভ কৰে জয়ন্ত মেচে (গড়াল)।

ইফালে সমাৰোহৰ অন্তিম দিনা বিশিষ্ট নাট্যকৰ্মী, সমাজ কৰ্মী কৃষ্ণকান্ত  কলিতাক ‘সৌৰভপ্ৰাণ শিৱসাগৰ’ বঁটা প্ৰদান কৰাৰ লগতে শিৱসাগৰৰ প্ৰায় কুৰিজন নাট্যকৰ্মীক সম্বৰ্ধনা জনোৱা হয়।