পথ মেৰামতিৰ দাবীত জাঁজী হাঁহচৰাত ৩৭ নং ৰাষ্ট্ৰীয় ঘাইপথ অবৰোধ

যোৰহাট জিলাৰ টীয়ক ৰাজহ চক্ৰৰ অন্তৰ্গত ললিত চন্দ্ৰ ৰাজখোৱা পথ আৰু জগদুৱাৰ-বনাই-চিন্তামণিগড় সংযোগী পথ দুটা তৎকালে মেৰামতিৰ দাবীত আজি বিয়লি ৩:০০ বজাত শিমলুগুৰি মৌজা আঞ্চলিক ছাত্ৰ সন্থাই জাঁ‌জী হাঁহচৰাত ৩৭ নং ৰাষ্ট্ৰীয় ঘাইপথ অবৰোধ কৰে।

টীয়ক আঞ্চলিক ছাত্ৰ সন্থা আৰু অসম জাতীয়তাবাদী যুৱ ছাত্র পৰিষদৰ জাঁ‌জী আঞ্চলিক সমিতিৰ সহযোগত প্ৰায় আধাঘন্টা ধৰি পালন কৰা অবৰোধ কাৰ্যসূচীৰ ফলত ৰাষ্ট্ৰীয় ঘাইপথত যান বাহনৰ চলাচল ব্যাহত হৈ পৰে।

উল্লেখযোগ্য যে পথ দুটা মেৰামতিৰ বাবে দুবছৰৰ পূৰ্বেই আবন্টন লাভ কৰিও সংশ্লিষ্ট ঠিকাদাৰে আজিকোপতি পথ দুটাৰ মেৰামতিৰ কাম সম্পূৰ্ণ নকৰাত ক্ষুদ্ধ হৈ আছুৱে আজি পথ অবৰোধ কাৰ্যসূচী ৰূপায়ন কৰে।

অৱশ্যে টীয়ক ৰাজহ চক্ৰৰ চক্ৰ বিষয়া (সংযুক্ত) মৌচুমী বৰ্মনৰ উপস্থিতিত গড়কাপ্তানি বিভাগৰ এগৰাকী কণিষ্ঠ অভিযন্তাই কাইলৈৰ পৰা পথ মেৰামতিৰ কাম আৰম্ভ হ’ব বুলি দিয়া মৌখিক প্ৰতিশ্ৰুতিত প্ৰতিবাদকাৰীসকলে সাময়িক ভাবে অৱৰোধ কাৰ্যসূচী প্ৰত্যাহাৰ কৰে।