কাজিৰঙাৰ কাষৰীয়া গাঁৱত নেমু পুলি বিতৰণ গোলাঘাট আৰক্ষীৰ, সহযোগ নুমলীগড় শোধনাগাৰৰ

বনৰীয়া হাতী আৰু মানুহৰ সংঘাত নিৰাময় কৰা আৰু কৃষকক আৰ্থিকভাৱে সবল কৰাত সহায় কৰাৰ অৰ্থে কাজিৰঙাৰ সমীপৰ পাণবাৰী আদৰ্শ গাঁৱত আজি ১০ আগষ্টত গোলাঘাট আৰক্ষীয়ে নুমলীগড় শোধনাগাৰৰ সহযোগত কৃষকৰ মাজত উন্নতজাতৰ নেমু টেঙাৰ পুলি বিতৰণ কৰে৷

অনুষ্ঠানটোত প্ৰতিজন লোকক ১০টাকৈ নেমুটেঙাৰ পুলি প্ৰদান কৰা হয়৷ আগন্তুক দিনত কাজিৰঙাৰ কাষৰীয়া অঞ্চলত ১০ হেজাৰ নেমু টেঙাৰ পুলি বিতৰণ কৰা হ’ব জনাই আৰক্ষী অধীক্ষকে।

পাণবাৰীৰ সামূহিক গৃহত আয়োজিত নেমু টেঙাৰ পুলি বিতৰণ অনুষ্ঠানত গোলাঘাট জিলাৰ আৰক্ষী অধীক্ষক মানবেন্দ্ৰ দেব ৰয়, নুমলীগড় শোধনাগাৰৰ জ্যেষ্ঠ প্ৰৱন্ধক মিন্টু সন্দিকৈ,  বোকাখাতৰ মহকুমা আৰক্ষী বিষয়া বিতুল চেতিয়া, অসম গণ পৰিষদৰ জিলা সভাপতি জগত কলিতা, বোকাখাত আৰক্ষী থানাৰ ভাৰপ্ৰাপ্ত আৰক্ষী বিষয়া ৰূপজ্যোতি দত্ত আৰু স্থানীয় ব্যক্তিৰ লগতে গাওঁৰক্ষী বাহিনীৰ কৰ্মকৰ্তাও উপস্থিত থাকে৷

স্থানীয় গাওঁৰক্ষী বাহিনীৰ হৈ প্ৰহ্লাদ দাসে অনুষ্ঠানটোৰ আঁত ধৰে।