শ্বীনা বৰা হত্যাকাণ্ড : মিখাইলক তেওঁৰ ‘বিলাসী নিচা’ সম্পৰ্কত প্ৰশ্ন কৰিলে ইন্দ্ৰানীৰ অধিবক্তাই

২০১৫ চনত সংঘটিত শ্বীনা বৰা হত্যাকাণ্ডই সমগ্ৰ দেশতে চাঞ্চল্য সৃষ্টি কৰাৰ লগতে প্ৰতিদিনেই চৰ্চাৰ বিষয় হৈ ধৰা দিছিল। এখন ধাৰাবাহিকৰ কাহিনীৰ দৰে বাস্তৱ জীৱনৰ এই ঘটনালানিয়ে সকলোৰে দৃষ্টি আকৰ্ষণ কৰিছিল।

শ্বীনা বৰা হত্যাকাণ্ডৰ শেহতীয়া ঘটনাক্ৰমত ইন্দ্ৰানী মুখাৰ্জীৰ অধিবক্তাই সোমবাৰে  গোচৰটোৰ এগৰাকী সাক্ষী হিচাপে থকা ইন্দ্ৰানীৰ পুত্ৰ মিখাইলক তেওঁৰ গাড়ী, কুকুৰকে ধৰি তেওঁৰ খৰচী জীৱনৰ ওপৰত প্ৰশ্ন কৰে।

ইণ্ডিয়ান এক্সপ্ৰেছত প্ৰকাশিত বাতৰি অনুসৰি মিখাইলক প্ৰথমতে তেওঁৰ কিমানখন গাড়ী আছে সেই বিষয়ে কৰা প্ৰশ্নৰ উত্তৰত তেওঁ ২০১১ চনৰ পৰা ২০১৫ চনলৈ তেওঁ ক্ৰয় কৰা গাড়ী সম্পৰ্কে সদৰী কৰে।

বাতৰিটোত কোৱা অনুসৰি মিখাইলক চিবিআইৰ বিশেষ আদালতত অধিবক্তা সুদীপ পাছবলাই লগতে মিখাইলক তেওঁৰ কুকুৰৰ প্ৰতি থকা দুৰ্বলতাৰ বিষয়েও প্ৰশ্ন কৰে। ইয়াৰ উত্তৰত মিখাইলে আদালতত কয় যে ২০১২ চনত তেওঁ ২০,০০০-২৫০০০ টকাত এটা ব্ৰিটিছ মাছটিফ ক্ৰয় কৰিছিল। তেওঁ কয় যে তেওঁৰ এখন ‘কাৰ’ বিক্ৰী কৰি সেই টকাৰে কুকুৰটো ক্ৰয় কিনিছিল।

‘’ এইটো কোৱা সঠিক নহ’ব যে চাৰিটা কুকুৰ থকা সত্বেও মই এটা ব্ৰিটিছ মাছটিফ কিনিছিলো। এইটো কোৱা সঠিক নহ’ব যে এই পাঁচটা কুকুৰ কিনিবলৈ মই ইন্দ্ৰানীৰ পৰা টকা বিচাৰিছিলো আৰু ইন্দ্ৰানীয়ে মোক সেই টকা দিছিল। এইটো কোৱা সঠিক নহ’ব যে এইবোৰ বিলাসী গাড়ী আৰু কুকুৰ আছিল আৰু মই সেইবোৰৰ দাম ইচ্ছাকৃতভাৱে বুজিব পাৰিছিলো। এইটো কোৱা সঠিক নহ’ব যে মই দামী বস্তুৰ প্ৰতি আসক্ত আৰু সেইবাবেই সদায় টকাৰ প্ৰয়োজন হয় আৰু মোৰ খৰচী নিচা পূৰণৰ বাবে ইন্দ্ৰানীৰ পৰা টকা দাবী কৰি আহিছো,’’-আদালতত সোধা প্ৰশ্নৰ উত্তৰত মিখাইলে এইদৰে কয়।

এইখিনিতে উল্লেখ কৰিব পাৰি যে শ্বীনা বৰা মাতৃ ইন্দ্ৰানী মুখাৰ্জী গুৱাহাটীৰ এটা মধ্যবিত্ত পৰিয়ালত ইন্দ্ৰানী বৰা নামৰে ডাঙৰ-দীঘল হৈছিল। অতি উচ্চাকাংখী ইন্দ্ৰানীয়ে সৰু চহৰখনৰ পৰা কলকাতালৈ ইন্দ্ৰানী খান্না হৈ মুম্বাইত ইন্দ্ৰানী মুখাৰ্জী হোৱালৈকে এই ‘গ্লেমাৰ পূৰ্ণ’ পৰিক্ৰমাৰ শেষত এতিয়া নিজ কন্যা শ্বীনা বৰাৰ হত্যাৰ মূল অভিযুক্ত হিচাপে কাৰাগাৰৰ বাসিন্দা।