শিৱসাগৰ আৰক্ষীৰ কব্জাত উজনিৰ কুখ্যাত নাৰী সৰবৰাহকাৰী ‘বেবি’, উদ্ধাৰ অপহৃতা নাবালিকাক

সোপাধৰা অন্ধবিশ্বাস বুলি প্ৰচাৰ চলি থকাৰ মাজতে শিৱসাগৰ নগৰৰ সমীপৰ পৰাই বিদ্যালয়ৰ পৰা উভটি আহোঁতে অপহৰণ কৰা এগৰাকী নাবালিকাক সোমবাৰে নিশা সোঁ-শৰীৰে উদ্ধাৰ কৰাৰ লগতে নাৰী সৰবৰাহকাৰী দলটোৰ সদস্যকো আটক কৰিবলৈ সক্ষম হৈছে জয়সাগৰ আৰক্ষী।

অষ্টম শ্ৰেণীত পঢ়ি থকা শিৱসাগৰৰ কোঁৱৰপুৰ মঠাদাং অঞ্চলৰ অষ্টম শ্ৰেণীত অধ্যয়নৰত নাবালিকা গৰাকীক বিদ্যালয়ৰ পৰা ওভতাৰ পথৰ পৰাই অপহৰণ কৰি নিছিল বুলি ধৃত অপহৰণকাৰীয়ে আৰক্ষীৰ আগত স্বীকাৰ কৰিছে।

আৰক্ষী অধীক্ষক সুবোধ কুমাৰ সোণোৱালে নিজাববীয়াকৈ অনুসন্ধান চলাই পোৱা তথ্যৰ ভিত্তিত জয়সাগৰ থানাৰ ভাৰপ্ৰাপ্ত বিষয়া নৱ কুমাৰ দাসৰ নেতৃত্বত চলা অভিযানত বকতাৰ গোমোঠা গাঁৱৰপৰা সুস্থ অৱস্থাত নাবালিকাগৰাকীক উদ্ধাৰ কৰিবলৈ সক্ষম হয়।

নাবালিকাগৰাকীৰ লগতে শিল্পী শইকীয়া ওৰফে বেবী নামৰ কুখ্যাত নাৰী সৰবৰাহকাৰীগৰাকী আৰু তেওঁৰ সতীৰ্থ দীপ বৰাকো আটক কৰি আৰক্ষীয়ে বৰ্তমান জেৰা চলাই আছে।

উজনি অসমৰ তিনি জিলা শিৱসাগৰ, যোৰহাট আৰু ডিব্ৰুগড়ৰ বিভিন্ন প্ৰান্তৰ পৰা বছৰ বছৰ ধৰি নাৰী অপহৰণ কৰি পিছত এই চক্ৰটোৱে দিল্লী, হাৰিয়ানালৈ যোগান ধৰি আহিছিল।

নাৰী অপহৰণ আৰু হানি ত্ৰেপিঙৰ বহুকেইটা ঘটনাত অভিযুক্ত মৰিয়নিৰ নাগাজাংকাৰ নিবাসী বেবিৰ গ্ৰেপ্তাৰ আৰক্ষীৰ বাবে বৃহৎ সাফল্যৰূপে পৰিগণিত হৈছে।

নাবালিকাগৰাকীৰ নিৰুদ্দেশ সন্দৰ্ভত পৰিয়ালৰ লোকে যোৱা ১০ আগষ্টত শিৱসাগৰ সদৰ আৰক্ষী থানাত দাখিল কৰা এখন এজাহাৰৰ ভিত্তিত ৭৮৮/১৮ নম্বৰ এক গোচৰ ৰুজু কৰা হৈছিল।