ৰাজনৈতিক কাৰ্যসূচী লৈ ২৬ ফেব্ৰুৱাৰিত অসমত উপস্থিত হ’ব ৰাহুল গান্ধী

অহা ২৬ ফেব্ৰুৱাৰিত মহানগৰৰ খানাপাৰাস্থিত অসম পশু চিকিৎসা বিজ্ঞান মহাবিদ্যালয় খেলপথাৰত অনুষ্ঠিত হ’ব লগীয়া কংগ্ৰেছৰ বুথ কৰ্মীসকলৰ সমাৱেশত অংশ গ্ৰহণ কৰিব নিখিল ভাৰত কংগ্ৰেছ কমিটীৰ সভাপতি ৰাহুল গান্ধীয়ে। আৰু এই সমাৱেশৰ পৰাই ৰাহুল গান্ধীয়ে আগন্তুক লোকসভা নিৰ্বাচনৰ ৰণডংকা বজাব। এই কথা জানিবলৈ দিয়ে কংগ্ৰেছৰ সভাপতি ৰিপুন বৰাই।

উল্লেখযোগ্য যে ২৬ ফেব্ৰুৱাৰিৰ দিনা গুৱাহাটী বিমান বন্দৰৰ পৰা ৰাহুল গান্ধী পোনে পোনে খানাপাৰাত গৈ উপস্থিত হ’ব আৰু দিনৰ ১ বজাত বুথ কৰ্মীসকলৰ সমাৱেশত ভাষণ দিব।

আনহাতে একেদিনাই বিয়লি ৩.৩০ বজাত শংকৰদেৱ কলাক্ষেত্ৰত উত্তৰ-পূব কংগ্ৰেছ সমন্বয়ৰক্ষী কমিটীৰ কাৰ্যনিৰ্বাহক কমিটীৰ বৈঠক আৰু একে স্থানতে বিয়লি পাঁচ বজাত অনুষ্ঠিত হ’বলগীয়া উত্তৰ পূৰ্বাঞ্চলৰ ৰাজ্যকেইখনৰ জিলা কংগ্ৰেছৰ সভাপতি আৰু ব্লক কংগ্ৰেছৰ সভাপতিসকলৰ বৈঠকত মত বিনিময় কৰিব।

প্ৰদেশ কংগ্ৰেছৰ সভাপতি ৰিপুন বৰাই জনোৱা মতে প্ৰায় এক লাখ লোক সমৱেত হ’বলগীয়া খানাপাৰাৰ সমাৱেশখনত উত্তৰ পূৰ্বাঞ্চলৰ প্ৰাক্তন কংগ্ৰেছী মুখ্য মন্ত্ৰীসকলেও অংশ গ্ৰহণ কৰিব।