উজনিত ইজনৰ পিছত সিজন বিজেপি নেতা-বিধায়ক ৰাইজৰ ৰাজহুৱা প্ৰশ্নৰ সন্মুখীন

দুদিনমান পূৰ্বে ডিগবৈৰ বিজেপি বিধায়ক সুৰেন ফুকনক এটা ৰাজহুৱা অনুষ্ঠানত এজন যুৱকে জবাবদিহি কৰাৰ পিছত ২৩ ফেব্ৰুৱাৰিত এখন ৰাজহুৱা সভাত বিভিন্ন প্ৰশ্নৰ সন্মুখীন হৈ বিব্ৰত হয় দলটোৰ সাংসদ ৰামেশ্বৰ তেলী।

ডিব্ৰুগড় সমষ্টিৰ সাংসদজনে ২৩ ফেব্ৰুৱাৰিত তিনিচুকীয়া জিলাৰ চাহ জনগোষ্ঠীৰ কৃতী ছাত্ৰীসকলৰ মাজত স্কুটী বিতৰণ কৰিছিল। অনুষ্ঠানটোত লগত উপস্থিত আছিল বিধায়ক সুৰেন ফুকন, তেৰছ গোৱালা, তিনিচুকীয়াৰ বিধায়ক সঞ্জয় কিষানকে ধৰি অন্যান্য নেতা-পালিনেতা।

কিন্তু অনুষ্ঠানটোৰ মাজতে এজন যুৱকে তেলীক কেইবাটাও প্ৰশ্ন কৰে। উ্ন্নয়নৰ কৈফিয়ৎ বিচৰা যুৱকজনক লগে লগে উভতি ধৰি উপস্থিত নেতা-পালিনেতাসকলে।

বিধায়ক সঞ্জয় কিষানে যুৱকজনক অশোভনীয়ভাৱে গালি-গালাজ কৰাৰ উপৰি মাৰিবলৈও খেদি যোৱা বুলি অভিযোগ উঠিছে।

যুৱকজনে কয়, “আপোনালোকে বেয়া কেলৈ পাইছে? সঁচা কথাটোহে কৈছো। বেয়া কথা কোৱা নাই নহয়।“

ইয়াৰ পিছতে এজন বিজেপি নেতাই যুৱকজনৰ ওচৰলৈ খেদি আহে আৰু “তোমাক কোনে মাতিছে ইয়ালৈ?“ বুলি প্ৰশ্ন কৰে।

ইপিনে একেটা অনুষ্ঠানতে সংবাদ মাধ্যমকো আক্ৰমণৰ লক্ষ্য কৰি লয় বিজেপিৰ সাংসদ-বিধায়কসকলে। উন্নয়ন সন্দৰ্ভত সাংবাদিকৰ প্রশ্নৰ উত্তৰ দিয়াৰ বিপৰীতে কংগ্ৰেছক আক্ৰমণ কৰাৰ লগতে সাংবাদিকে চাহ জনগোষ্ঠীৰ ছাত্ৰীৰ মাজত স্কুটী বিতৰণ কৰাটো সহ্য কৰিব পৰা নাই বুলি মন্তব্য কৰে।

উল্লেখযোগ্য যে কেইদিনমান পূৰ্বে এখন ৰাজহুৱা সভাত ডিগবৈৰ বিধায়ক সুৰেন ফুকনকো এজন যুৱকে ৰাজহুৱাকৈ প্ৰশ্ন কৰি বিধায়কজনৰ অভব্য আচৰণৰ সন্মুখীন হৈছিল।

নাগৰিকত্ব বিধেয়ক অধ্যায়ৰ পিছত বিজেপিৰ প্ৰতি উজনি অসমত ক্ৰমে মোহভংগ হোৱাই নহয়, বিজেপিৰ সৈতে দূৰত্ব ৰাখিবলৈ ধৰিছে জনসাধাৰণে। শেহতীয়া ঘটনাৱলীয়ে তাৰেই দৃষ্টান্ত দাঙি ধৰে।

ইপিনে চুলাই মদৰ বিষক্ৰিয়াৰ দুৰ্ঘটনাত শতাধিক লোকৰ মৃত্যু হোৱা আৰু ঘটনাটোত আক্ৰান্তসকলে এতিয়াও চিকিৎসালয়ৰ বিছনাত মৃত্যুৰ সৈতে যুঁজি থকাৰ সময়ত কালি ডিব্ৰুগড়ত মুখ্য মন্ত্ৰী সৰ্বানন্দ সোণোৱালে চাহ শ্ৰমিক জনগোষ্ঠীটোৰ নৃত্য-গীতৰ অনুষ্ঠান পতাক লৈও বিৰূপ প্ৰতিক্ৰিয়া হৈছে।