আজি মেঘালয়ৰ দক্ষিণ তুৰা-ৰাণীকৰ সমষ্টিত উপ-নিৰ্বাচন; ভাগ্য নিৰ্ণয় হ’ব মুখ্য মন্ত্ৰী কনৰাড চাংমাৰ

আজি মেঘালয়ৰ দক্ষিণ তুৰা আৰু ৰাণীকৰ বিধানসভা সমষ্টিত চলি আছে উপ-নিৰ্বাচনৰ ভোট গ্ৰহণ। আজি মেঘালয়ৰ মুখ্য মন্ত্ৰী কনৰাড চাংমাৰ নিৰ্ণয় হ’ব ভাগ্য। কিয়নো দক্ষিণ তুৰা সমষ্টিটোৰ পৰাই প্ৰতিদ্বণ্ডিতা আগবঢ়াইছে মুখ্য মন্ত্ৰীগৰাকীয়ে।

কনৰেড কে চাংমাৰ বিৰুদ্ধে প্ৰতিদ্বন্দিতাত নামিছে কংগ্ৰেছৰ ছাৰলট মমিন, নিৰ্দলীয় প্ৰাৰ্থী জন লেছলী কে চাংমা আৰু খ্ৰীছ কাবুল কে চাংমাই ।

আনহাতে ৰাণীকৰ সমষ্টিৰ পৰা প্ৰাৰ্থীত্ব আগবঢ়াইছে পাঁচবাৰৰ বাবে বিধানসভালৈ নিৰ্বাচিত হোৱা তথা কংগ্ৰেছ দল ত্যাগ কৰি এন পি পি দলৰ ন সদস্য হোৱা মাৰ্টিন এম ডেংগ’, ইউ ডি পিৰ পিয়াছ মাৰৱেইন, পি ডি এফ দলৰ পি এন চিয়েম আৰু কংগ্ৰেছৰ জেকিউছ চাংমা।

জানিব পৰা মতে দুয়োটা সমষ্টিতে আজি ৰাতিপুৱাৰে পৰা ভোট কেন্দ্ৰ সমূহত ৰাইজৰ দীঘলীয়া শাৰী পৰিলক্ষিত হৈছে। দুয়োটা সমষ্টিৰ পৰা কোন প্ৰাৰ্থীয়ে শেষ হাঁহি মাৰে তাৰ বাবে ২৭ আগষ্টলৈ অপেক্ষা কৰিব লাগিব জনসাধাৰণ।

উল্লেখ্য যে জুলাই মাহৰ আৰম্ভণিতে তুৰা লোকসভা সমষ্টিৰ প্ৰাক্তন সাংসদ তথা দক্ষিণ তুৰা সমষ্টিৰ এন পি পিৰ বিধায়িকা আগাথা চাংমাই মেঘালয় বিধানসভা সদস্য পদৰ পৰা পদত্যাগ কৰিছিল। আগাথাই তেওঁৰ ভাতৃ তথা মুখ্য মন্ত্ৰী কনৰাড চাংমাক মুখ্য মন্ত্ৰীৰ দায়িত্ব নিয়াৰিকৈ চলাই যোৱাৰ উদ্দেশ্যে বিধানসভাৰ সদস্যৰ পদ এৰি দিয়া বুলি ৰাজনীতি মহলত চৰ্চিত হৈছিল।