ৰিয়েল ইষ্টেট ৰেগুলেচন এণ্ড ডেভলপমেণ্ট এক্টৰ অধীনত অসমত প্ৰথমটো প্ৰকল্পৰ পঞ্জীয়ন

এতিয়াৰে পৰা গুৱাহাটীৰ ৰিয়েল ইষ্টেট ব্যৱসায়ী সকলে ৰিয়েল ইষ্টেট ৰেগুলেচন এণ্ড ডেভলপমেণ্ট এক্ট ২০১৬ (RERA) ৰ অধীনত তেওঁলোকৰ প্ৰকল্প সমূহক পঞ্জীয়নভুক্ত কৰাটো বাধ্যতামূলক কৰা হৈছে। লক্ষণীয় যে ৰাজ্য চৰকাৰে উক্ত আইনখনক এই বছৰৰ মে’ মাহৰ পৰা আসাম ৰিয়েল ইষ্টেট (ৰেগুলচন এণ্ড ডেভলপমেণ্ট) ৰোলচ ২০১৭ হিচাপে ঘোষণা কৰিছে। যদিহে এজন বিল্ডাৰৰ ১০ টা প্ৰকল্প থাকে তেন্তে তেওঁ প্ৰত্যেকটো প্ৰকল্পকে উক্ত আইনৰ অধীনত পঞ্জীয়ন কৰিব লাগিব।  ৰিয়েল ইষ্টেট ৰেগুলচন এণ্ড ডেভলপমেণ্ট এক্টত থকা ৪ টা বিভাগ হৈছে  RERA কৰ্তৃপক্ষ, ৰিয়েল ইষ্টেট প্ৰকল্প উদ্যোক্তা, ৰিয়েল্টৰ আৰু গ্ৰাহক। এটা RERA কৰ্তৃপক্ষত দুজনকৈ সদস্য থাকিব, তাৰে এজন হ’ব অৱসৰপ্ৰাপ্ত ন্যায়াধীশ আৰু আনজন ৰিয়েল ইষ্টেট বিশেষজ্ঞ। অধিগ্ৰহণ প্ৰমাণপত্ৰ নথকা যিকোনো চলিত প্ৰকল্পই RERA ৰ অধীনলৈ আহিব। তেওঁলোকৰ গ্ৰাহক সকলক মিছা প্ৰতিশ্ৰুতি দিয়া ৰিয়েল্টৰ/উদ্যোক্তা সকলক শাস্তি বিহাৰো অধিকাৰ আছে। গুৱাহাটী মহানগৰ উন্নয়ন কৰ্তৃপক্ষ (GMDA)ৰ টাউন প্লেনাৰ তথা RERA ৰ প্ৰভাৰী জে এছ কাকতিয়ে কয় – ‘RERA হৈছে এক অৰ্ধ ন্যায়িক কৰ্তৃপক্ষ, আৰু সকলো বিলাক চলিত তথা ভৱিষ্যতৰ ৰিয়েল ইষ্টেট প্ৰকল্পক ইয়াৰ অধীনত পঞ্জীয়ন কৰিব লাগিব।’ উল্লেখযোগ্য যে যদিও  ৰিয়েল ইষ্টেট ৰেগুলচন এণ্ড ডেভলপমেণ্ট এক্ট (RERA) খনক এতিয়াও প্ৰস্তুত কৰা হোৱা নাই, তথাপি ইয়াৰ অধীনত ইতিমধ্যে এটা ৰিয়েল ইষ্টেট প্ৰকল্প পঞ্জীয়ন কৰা হৈছে।