বান্দৰডুবিৰ ঘটনাৰ গোচৰৰ পৰা কৃষক নেতা অখিল গগৈক ৰেহাই আদালতৰ

পৰ্যাপ্ত তথ্য প্ৰমাণৰ অভাৱত আজি আন এক গোচৰৰ পৰা ৰেহাই দিয়া হয় কৃষক নেতা অখিল গগৈক। নগাঁও অতিৰিক্ত সত্ৰ ন্যায়াধীশৰ আদালতে ২০১৬ চনৰ বান্দৰডুবি ঘটনা সন্দৰ্ভত নগাঁও থানাত ৰুজু হৈ থকা গোচৰৰ পৰা নিৰ্দোষী ঘোষণা কৰে।

উল্লেখযোগ্য যে ২০১৬ চনত কাজিৰঙাৰ বান্দৰডুবিত চৰকাৰে চলোৱা উচ্ছেদ অভিযানৰ বিৰুদ্ধে প্ৰতিবাদ সাব্যস্ত কৰাৰ সময়ত হিংসাৰ আশ্ৰয় লোৱাৰ অভিযোগত কৃষক নেতা অখিল গগৈৰ বিৰুদ্ধে নগাঁও থানাত গোচৰ ৰুজু কৰা হৈছিল।

কৃষক মুক্তি সংগ্ৰাম সমিতিৰ নেতৃত্বত উচ্ছেদৰ বিৰুদ্ধে চলা উক্ত প্ৰতিবাদী কাৰ্যসূচীত প্ৰশাসনৰ গুলীত ২জন লোকে প্ৰাণ হেৰুৱাইছিল।

আজিৰ শুনানিত অখিল গগৈৰ বিৰুদ্ধে কোনো তথ্য-প্ৰমাণ নথকাত অনিল কুমাৰ শৰ্মাৰ আদালতে গোচৰটো নগাঁৱৰ জিলা আদালতৰ পৰা কলিয়াবৰৰ মহকুমা আদালতলৈ হস্তান্তৰ কৰে।

ভাৰতীয় দণ্ডবিধিৰ ৩০৭ আৰু ৩৩৩কে ধৰি কেবাটাও ধাৰাত ৰুজু হৈ থকা গোচৰটোৰ পৰা আদালতে তেওঁক নিৰ্দোষী ঘোষণা কৰাৰ পিছতে সংগঠনটোৰ কৰ্মী তথা তেওঁৰ সমৰ্থকসকল উৎফুল্লিত হৈ পৰে।