ৰূপহীহাট কাণ্ড : শক্তি বিভাগৰ বিৰুদ্ধে গোচৰ তৰিব বদৰুদ্দিন আজমলে

নগাঁও ৰূপহীহাটৰ খাটোৱালত ২১ ছেপ্তেম্বৰত সংঘটিত মৰ্মান্তিক ঘটনাৰ বাবে শক্তি বিভাগৰ বিৰুদ্ধে জমিয়তৰ হৈ গোচৰ তৰিব এ আই ইউ ডি এফৰ সভাপতি তথা সাংসদ বদৰুদ্দিন আজমলে।

উল্লেখযোগ্য যে  ৰূপহীহাটৰ খাটোৱালত বিদ্যুতস্পৃষ্ট হৈ ছয়জনকৈ লোকৰ মৃত্যু হোৱাক কেন্দ্ৰ কৰি সমগ্ৰ ৰাজ্যতে প্ৰতিক্ৰিয়া অব্যাহত থকাৰ মাজতে আজি ঘটনাস্থলীত উপস্থিত হৈ আজমলে এই কথা সদৰী কৰে।

বিদ্যুৎ বিভাগৰ অৱহেলা আৰু অকৰ্মণ্যতাৰ বাবই উক্ত দুৰ্ভাগ্যজনক ঘটনাটো সংঘটিত হয় বুলি মন্তব্য কৰা আজমলে নিহত লোকসকলৰ প্ৰতি সমবেদনা জ্ঞাপন কৰাৰ লগতে নিহতৰ পৰিয়াললৈ দহ হাজাৰ আৰু আহতসকলক পাঁচ হাজাৰ টকাকৈ প্ৰদান কৰে। ইয়াৰ উপৰি তেওঁ নিহত ব্যক্তিৰ পৰিয়ালক চৰকাৰৰ তৰফৰ পৰা ১০ লাখ টকাকৈ ক্ষতিপূৰণৰ দাবী তোলে।

আজমলৰ লগতে ঘটনাস্থলীত উপস্থিত হৈ এ আই ইউ ডি এফৰ বিধায়ক আমিনুল ইছলামে বিদ্যুৎ বিভাগৰ লগতে বিজেপি চৰকাৰক ক্ষুৰধাৰ সমালোচনা কৰে। আনহাতে, ৰূপহীহাট বিধান সভা সমষ্টিৰ বিধায়ক নুৰুল হুদাই নিহতসকলৰ পৰিয়ালৰ সদস্যক চক্ৰ বিষয়াৰ উপস্থিতিত ২.৫০ লাখ টকাকৈ আৰ্থিক অনুদান প্ৰদান কৰে।

কালি উক্ত ঘটনাৰ পিছতে প্ৰাক্তন কংগ্ৰেছী মন্ত্ৰী ৰকিবুল হুছেইনৰ উপৰি বিভিন্ন ৰাজনৈতিক দল-সংগঠনৰ নেতা-কৰ্মী ঘটনাস্থলীত উপস্থিত হৈ ঘটনাৰ বুজ লোৱাৰ লগতে বিদ্যুৎ বিভাগক তীব্ৰ ভাষাৰে সমালোচনা কৰে।