বিয়াৰ বাবে জমা কৰি ৰখা ২লাখ টকাৰে প্ৰব্ৰজিত শ্ৰমিকক খাদ্য খুৱাইছে এগৰাকী অটো চালকে

কৰ’না ভাইৰাছৰ এই সংকটকালত মানৱতাৰ এক উৎকৃষ্ট নিদৰ্শন দাঙি ধৰিছে মহাৰাষ্ট্ৰৰ পুনেৰ এগৰাকী ৩০ বছৰীয়া অটোচালকে।

নিজৰ বিয়াৰ বাবে অটোচালকগৰাকীয়ে ২ লাখ টকা জমা কৰি ৰাখিছিল।

কিন্তু মাৰাত্মক মহামাৰী কৰ’নাৰ বাবে তেওঁৰ বিয়া স্থগিত হ’ল। এতিয়া সেই ধনৰাশিৰে তেওঁ প্ৰব্ৰজিত শ্ৰমিক তথা অসহায় লোকক খাদ্য খুৱাই আছে।

‘হিন্দুস্তান’ত প্ৰকাশিত বাতৰি অনুসৰি অক্ষয় কোঠাৱালে নামৰ অটোচালকগৰাকীয়ে বৃদ্ধ আৰু গৰ্ভৱতী মহিলাক বিনামূলীয়াকৈ চিকিৎসকৰ ক্লিনিক তথা হাস্পাতললৈ নিয়ে।

তদুপৰি, তেওঁ কৰ’না ভাইৰাছৰ পৰা হাত সাৰি থাকিবলৈ চহৰখনৰ লোকসকলৰ মাজত সজাগতা সৃষ্টিৰ কামো কৰে।

বাতৰি অনুসৰি, ভালকৈ বিয়া পতাৰ বাবে সাচি ৰখা পইচাৰে অক্ষয়ে তেওঁৰ বন্ধুবৰ্গৰ সহায়ত দৈনিক ৪০০ লোকৰ বাবে খাদ্য তৈয়াৰ কৰি চহৰখনৰ গলিসমূহত গৈ প্ৰব্ৰজিত শ্ৰমিক তথা দৰিদ্ৰ লোকসকলক খাবলৈ দিয়ে।

সংকটৰ এনে সময়ত বিপৰ্যস্ত লোকক সহায় কৰি অত্যন্ত সুখী কোঠাৱালে।

তেওঁ কয়,’’অটো চলাই মই ২লাখ টকা জমা কৰিছিলো। ২৫মে’ত মোৰ বিয়াৰ তাৰিখ আছিল। কিন্তু লকডাউনৰ বাবে মই আৰু মোৰ বাকদত্তাই এতিয়া বিয়া স্থগিত ৰখাৰ সিদ্ধান্ত লওঁ।‘’

পুনেৰ টিম্বাৰ মাৰ্কেটত বাস কৰা অক্ষয়ে লকডাউনৰ সময়ত দৰিদ্ৰ আৰু প্ৰব্ৰজিত শ্ৰমিকৰ দুৰৱস্থা প্ৰত্যক্ষ কৰি মৰ্মাহত হৈ পৰে।

অক্ষয়ে কয়,’’ মই ৰাস্তাত এনে বহুলোকক দেখিছো যি এসাজ খাবলৈ পোৱা নাই আৰু জীয়াই থকাৰ বাবে সংগ্ৰাম কৰি আছে। মই বন্ধুবৰ্গৰ সৈতে অসহায় লোকসকলক সহায় কৰাৰ সংকল্প লওঁ। মই বিয়াৰ বাবে সাচি ৰখা পইচাখিনি এই লোকসকলক খাদ্য খুওৱাৰ বাবে খৰচ কৰাৰ সিদ্ধান্ত লওঁ।বন্ধুসকলেও মোক সহায় কৰিছে।‘’

অক্ষয় আৰু তেওঁৰ বন্ধুসকলে এটা পাকঘৰ বনাই লৈছে। ইয়াত ৰুটি-তৰকাৰী বনাই অটোৰে নি প্ৰব্ৰজিত শ্ৰমিক আৰু দৰিদ্ৰ লোকসকলৰ মাজত বিতৰণ কৰে।

অক্ষয়ে জানিবলৈ দিয়ে যে তেওঁৰ হাতত বৰ্তমান পইচা কমি আহিছে আৰু সেয়েহে ৰুটি-তৰকাৰীৰ ঠাইত পোলাও, মচলা ৰাইচ আৰু চম্ভৰ ৰাইচ বিলোৱাৰ কথা চিন্তা কৰিছে।

তেওঁ কমেও অহা ৩১ মে’লৈকে আৰ্তলোকসকলক খাদ্য খুৱাবলৈ বিচাৰে।

অক্ষয়ে তেওঁৰ অটোখনত এটা লাউডস্পীকাৰ লগাই লৈছে। ইয়াৰ দ্বাৰা তেওঁ লগতে লোকসকলৰ মাজত শাৰীৰিক দূৰত্ব বজাই ৰখা, মাস্ক পৰিধান কৰা আদি সম্পৰ্কত সচেতনতা বৃদ্ধিৰো প্ৰয়াস চলাই গৈছে।