আন এক সফলতা ৰীমা দাসৰ; এইবাৰ ‘বুলবুল কেন ছিং’এ আজুৰিলে বঁটা

অস্কাৰৰ বিদেশী ভাষা চলচ্চিত্ৰৰ শিতানত প্ৰতিদ্বন্দিতাৰ বাবে নিৰ্বাচিত বহু প্ৰশংসিত তথা ৰাষ্ট্ৰীয় চলচ্চিত্ৰ বঁটাত স্বৰ্ণ কমল প্ৰাপ্ত অসমীয়া ছবি ‘ভিলেজ ৰকষ্টাৰ্ছ’ৰ পৰিচালিকা ৰীমা দাসে তেওঁৰ নতুন ছবি ‘বুলবুল কেন ছিং’ ৰ বাবে লাভ কৰিলে সফলতা।

মুম্বাইত অনুষ্ঠিত হৈ থকা ২০সংখ্যক জিঅ’ মামি মুম্বাই ফিল্ম ফেষ্টিভেলত ইণ্ডিয়া গ’ল্ড শাখাত ৰীমা দাসৰ নতুন ছবি ‘বুলবুল কেন ছিং’এ ‘গ’ল্ডেন গেটৱে বঁটা’ লাভ কৰিবলৈ সক্ষম হয়। উল্লেখ্য যে মুম্বাই ফিল্ম ফেষ্টিভেলত ৰীমা দাসৰ এয়া ক্ৰমাগত দ্বিতীয় সফলতা। যোৱা বছৰ ভিলেজ ৰকষ্টাৰ্ছে এই ফিল্ম ফেষ্টিভেলত তিনিটাকৈ বঁটা লাভ কৰিবলৈ সক্ষম হৈছিল।

ইণ্ডিয়ান এক্সপ্ৰেছত প্ৰকাশ পোৱা অনুসৰি ৰীমা দাসে লাভ কৰা বঁটাটি তেওঁৰ মালৈ উৎসৰ্গা কৰিছে। ‘মোৰ মালৈ এই বঁটাটি আগবঢ়াইছো। যোৱা বছৰ ভিলেজ ৰকষ্টাৰ্ছে মুম্বাই ফিল্ম ফেষ্টিভেলত তিনিটাকৈ বঁটা লাভ কৰিছিল। কিন্তু বুলবুল কেন ছিংৰ বাবে এয়া প্ৰথমটো বঁটা। মোক এনেদৰে উৎসাহ তথা শক্তি প্ৰদান কৰাৰ বাবে মই ভগৱানক ধন্যবাদ জনাইছো। বঁটা লাভ কৰি উৎফুল্লিত হৈ পৰিচালিকা ৰীমা দাসে এইদৰে কয়।

উল্লেখ্য যে বুলবুল কেন ছিংত ৰীমা দাসে ভাৰতৰ গাঁৱৰ এগৰাকীৰ কিশোৰীৰ আৱেগময় এক কাহিনী, প্ৰেম আৰু হেৰুওৱাৰ মাজেদি যুঁজি য’ত শেষত তাই আৱিষ্কাৰ কৰে আচলতে তাইনো কোন সেইটো চিনেমাখনৰ জৰিয়তে দেখুৱাবলৈ চেষ্টা কৰিছে।

ইয়াৰ উপৰি পৰিচালিকাগৰাকীয়ে নিজৰ মাতৃ সন্দৰ্ভতো গুৰুত্বপূৰ্ণ মন্তব্য কৰা দেখা যায়। তেওঁ কয়, ‘সততে এখন নেদেখা পৃথিৱীলৈ খোজ দিয়াৰ বাবে সাহস আৰু প্ৰেৰণা যোগোৱা বাবে মাক ধন্যবাদ জনাইছো। মই অত্যন্ত সুখী কিয়নো মই ভালপোৱা সকলোবোৰ কামে এতিয়া কৰি আছো। চিনেমাৰ জৰিয়তে নিজকে স্বাধীনভাৱে সজাই তুলিব পাৰি মই নিজেই বহুত সুখী’।