মাটিত পুতি ৰখা মহিলাৰ মৃতদেহ উদ্ধাৰ; বিশ্বনাথত চাঞ্চল্য

বিশ্বনাথৰ বালিপুখুৰী গাঁৱত আজি মাটিত পুতি ৰখা অৱস্থাত এটা মৃতদেহ উদ্ধাৰ হোৱাক কেন্দ্ৰ কৰি অঞ্চলটোত তীব্ৰ চাঞ্চল্যৰ সৃষ্টি হৈছে।

প্ৰাপ্ত তথ্য মতে জিনজিয়া আৰক্ষী থানাৰ অন্তৰ্গত বালিপুখুৰী গাঁৱৰ পথৰ কাষতে মাটিত পুতি থোৱা অৱস্থাত প্ৰায় ৬০ বছৰ বয়সৰ এগৰাকী মহিলাৰ মৃতদেহ উদ্ধাৰ হয়। গাঁৱৰ এজন লোকে গৰু চৰাব গৈ ৰহস্যজনক ভাবে কম্বলেদি মেৰিয়াই মাটিত পুতি ৰখা মৃতদেহটো প্ৰত্যক্ষ কৰাত ঘটনাটো পোহৰলৈ আহে।

পিছত জিলা দণ্ডাধীশৰ উপস্থিতিত আৰক্ষীয়ে গাঁত খান্দি মৃতদেহটোক উদ্ধাৰ কৰে। আনহাতে বাতৰি লিখা পৰ্যন্ত মৃতদেহটোক চিনাক্ত কৰিব পৰা হোৱা নাই।

জিনজিয়া আৰক্ষীয়ে ঘটনা সন্দৰ্ভত তদন্ত অব্যাহত ৰাখিছে যদিও কি কাৰনে কোনে এই কাণ্ড সংঘটিত কৰিলে সেই কথা পোহৰলৈ অহা নাই। আৰক্ষীৰ অনুসন্ধানৰ অন্ততহে ঘটনাৰ প্ৰকৃত ৰহস্য জানিব পৰা যাব।