কোচ সাংস্কৃতিক কেন্দ্ৰ ও যাদুঘৰ উদ্বোধন কৰিলে মেঘালয়ৰ মুখ্যমন্ত্ৰী ড০ মুকুল চাংমাই

মেঘালয়ৰ মুখ্যমন্ত্ৰী ড০ মুকুল চাংমাই মঙলবাৰে তেওঁৰ নিজা সমষ্টি আমপতিৰ ঘাহছাৰাত কোচ সাংস্কৃতিক কেন্দ্ৰ ও যাদুঘৰটো উদ্বোধন কৰি জনজাতি সম্প্ৰদায়ৰ হেৰাই যাব ধৰা সংস্কৃতি আৰু পৰম্পৰাগত মূল্যবোধ ৰক্ষাৰ ওপৰত গুৰুত্ব আৰোপ কৰে।

এই কেন্দ্ৰটো চোৱা চিতা তথা পৰিচালনাৰ দায়িত্বত আছে আমপতিত মুখ্য কাৰ্যালয় থকা মেঘালয় কোচ এচোছিয়েচনে।

কোচ সাংস্কৃতিক কেন্দ্ৰ ও যাদুঘৰটো ৰাজ্যখনৰ কোচ সম্প্ৰদায়ৰ পৰম্পৰাগত কাৰ্য কলাপৰ এক কেন্দ্ৰ হিচাপে মুখ্যমন্ত্ৰীৰ চিন্তাৰ ফচল আৰু এইটো ভাৰত চৰকাৰৰ জনজাতি পৰিক্ৰমা মন্ত্ৰালয়ৰ পৰা পোৱা ৫০ লাখ টকা ব্যয়ৰে নিৰ্মাণ কৰি উলিওৱা হৈছে।

উদ্বোধনী অনুষ্ঠানৰ কাৰ্যসূচীত দক্ষিণ গাৰো পাহাৰ জিলাৰ উপায়ুক্ত চাইৰিল ডাৰলং ডেইংডো, জিএইছএডিচিৰ কাৰ্যবাহী সদস্য নৃপেন কোচ আৰু মেঘালয় কোচ এচোছিয়েচনৰ সদস্যসকল, ৰাজ্যখনৰ বিভিন্ন প্ৰান্তৰ পৰা অহা কোচ সম্প্ৰদায়ৰ লোকসকলৰ লগতে স্থানীয় লোক উপস্থিত থাকে।

উদ্বোধনী ভাষণত মুখ্যমন্ত্ৰীয়ে চিন্তা ব্যক্ত কৰে যে বহু সম্প্ৰদায়ে তেওঁলোকৰ প্ৰাচীন পৰম্পৰা সংৰক্ষণ কৰাত ব্যৰ্থ হৈছে যাৰ ফলত তেওঁলোকৰ সংস্কৃতিৰ সম্পূৰ্ণ অৱক্ষয় আৰু বিলুপ্তি ঘটিছে।

‘’ এটা সম্প্ৰদায়ৰ সংস্কৃতি বা জীৱন প্ৰণালী তেওঁলোকৰ সাজ পোছাক বা তেওঁলোকৰ ভাষাটোতে সীমাবদ্ধ নহয়। আটাইতকৈ গুৰুত্বপূৰ্ণ দিশটো হ’ল বয়োজ্যেষ্ঠজনক সন্মান কৰা আৰু ৰীতি নীতি মানি চলাৰ দৰে পৰম্পৰাবোৰক হেৰাই যোৱাৰ পৰা ৰক্ষা কৰা,’’-ছাংমাই কয়।

তেওঁ কোচ ৰাজবংশী এচোছিয়েচনৰ সদস্যসকলক যুব প্ৰজন্মক পৰম্পৰাগত বাদ্যযন্ত্ৰ বজোৱা, নৃত্য আৰু নাটকৰ দৰে তেওঁলোকৰ সংস্কৃতিৰ লগত জড়িত হেৰাই যাব ধৰা কলাসমূহৰ প্ৰতি অনুপ্ৰাণিত কৰা আৰু প্ৰশিক্ষণ আগবঢ়োৱাৰ ওপৰত গুৰুত্ব আৰোপ কৰে। তেওঁ লগতে কয় যে পৰম্পৰাগত কলাৰ বিভিন্ন আংগিকৰ জৰিয়তে সংস্কৃতিৰ প্ৰদৰ্শন প্ৰাচীন ৰীতিক সংৰক্ষণ কৰাৰ এটা দিশ যিয়ে যুৱ প্ৰজন্মক ইয়াৰ পৰিচয় সংৰক্ষণ তথা আকোঁৱালি লোৱাৰ ক্ষেত্ৰত অনুপ্ৰাণিত কৰিব।