বাংলাদেশ ‘মুক্ত’ বিধেয়কেও ‘সুৰক্ষিত’ নকৰে অসমক: কৃষক মুক্তি

যুটীয়া সংসদীয় সমিতিত বিজেপি সদস্যৰ বাহিৰে বাকী একাংশই নাগৰিকত্ব বিধেয়কৰ পৰা ‘বাংলাদেশ’ক বাদ দিয়াৰ ‘প্ৰস্তাৱ’ক লৈ চলা চৰ্চাৰ মাজতে এই পথেৰেও অসম ‘সুৰক্ষিত’ নহ’ব বুলি মত প্ৰকাশ কৰিছে কৃষক মুক্তি সংগ্ৰাম সমিতিয়ে।

বিধেয়কৰ পৰা বাংলাদেশৰ নাম বাদ দিলেও ২০১৫ চনত ভাৰত চৰকাৰে জাৰি কৰা পাৰপত্ৰ সংশোধনী বিধি আৰু বিদেশী সংশোধনী নিৰ্দেশনা বাতিল নকৰিলে ‘লাভ নহ’ব’ অসমৰ, এই মত কৃষক মুক্তিৰ নেতা অখিল গগৈৰ।

“কেৱল নাগৰিকত্ব বিধেয়কৰ পৰা বাংলাদেশৰ নাম বাদ দিলে অসম বাচি নাযায়। কাৰণ ভাৰত চৰকাৰে ইতিমধ্যে ২০১৫ চনৰ ৭ চেপ্তেম্বৰত জাৰি কৰা পাৰপত্ৰ সংশোধনী বিধি আৰু বিদেশী সংশোধনী নিৰ্দেশনাৰ জৰিয়তে পাকিস্তান, আফগানিস্তান আৰু বাংলাদেশৰ হিন্দু, বৌদ্ধ, জৈন, শিখ, পাৰ্চী আৰু খ্ৰীষ্টান এই ছটা ধৰ্মৰ লোকে ভিজা আৰু পাৰপত্ৰ নোহোৱাকৈ ভাৰতত প্ৰৱেশ কৰিলেও তেওঁলোকক অবৈধ অনুপ্ৰৱেশকাৰী হিচাপে গণ্য কৰা নহয়। গতিকে বিধেয়কখনৰ পৰা বাংলাদেশৰ নাম বাদ দিলেও যদি ভাৰত চৰকাৰে জাৰি কৰা এই বিধি আৰু নিৰ্দেশনাৰ পৰা বাংলাদেশৰ নাম বাদ দিয়া নহয় তেনেহ’লে অসমৰ একো লাভ নহ’ব,” গগৈৰ মন্তব্য।

তেওঁ লগতে কয় বিধেয়কৰ পৰা বাংলাদেশক বাদ দিলেও দেশখনৰ পৰা প্ৰৱেশ কৰা ৬টা ধৰ্মৰ লোকে ভাৰতত ১১ বছৰ থাকিলেই নাগৰিকত্ব লাভৰ বাবে যোগ্য হ’ব।

এই বিধি আৰু নিৰ্দেশনাৰ উপৰিও সেই তিনি ৰাষ্ট্ৰৰ অ-মুছলমান ৬টা ধৰ্মৰ লোকক দীৰ্ঘকালীন ভিজা প্ৰদানৰ বাবেও জাননি জাৰি কৰি থৈছে বিজেপি নেতৃত্বাধীন কেন্দ্ৰীয় চৰকাৰে।

বিধেয়কৰ লগতে বিধি আৰু নিৰ্দেশনা বাতিলৰ দাবীতো আন্দোলন অব্যাহত থাকিব বুলি ঘোষণা কৰি ‘সমস্যাৰ সমাধান’ হোৱা বুলি নাভাবিবলৈ অসমৰ ৰাইজক আহ্বান জনাইছে।