নাগৰিকত্ব বিধেয়ক : সংসদ ভৱনৰ জেপিচিৰ সভাকক্ষৰ সন্মুখত অগপৰ প্ৰতিবাদ

অবৈধ হিন্দু বাংলাদেশীক নাগৰিকত্ব প্ৰদানৰ অভিপ্ৰায়েৰে কেন্দ্ৰীয় চৰকাৰে নাগৰিকত্ব সংশোধনী বিধেয়ক সংসদত গৃহীত কৰিবলৈ কৰা ষড়যন্ত্ৰৰ বিৰুদ্ধে অগপৰ সভাপতি অতুল বৰাৰ নেতৃত্বত এটি প্ৰতিনিধি দলে আজি যুটীয়া সংসদীয় সমিতিৰ প্ৰতিগৰাকী সদস্যক সাক্ষাৎ কৰাৰ লগতে সংসদ ভৱনৰ যুটীয়া সংসদীয় সমিতিৰ বৈঠক অনুষ্ঠিত হোৱা সভাকক্ষৰ সন্মুখত বিধেয়কখনৰ বিৰুদ্ধে প্ৰতিবাদমুখৰ পৰে।

অগপৰ প্ৰতিনিধি দলটোৱে লগতে বৈঠকত অংশগ্ৰহণ কৰিবলৈ অহা প্ৰতিগৰাকী সদস্যক বিধেয়কখন বাতিল কৰি অসমৰ স্বাৰ্থত মাত মাতিবলৈ আহ্বান জনায়। তেওঁলোকে নাগৰিকত্ব সংশোধনী বিধেয়কে অসমৰ খিলঞ্জীয়া জনসাধাৰণৰ অস্তিত্ব বিপদাপন্ন কৰি তুলিব বুলি উল্লেখ কৰে।

অগপৰ সঁজাতী দলটোত আছিল সভাপতি অতুল বৰা, কাৰ্যকৰী সভাপতি কেশৱ মহন্ত, বিধায়ক ৰমেন্দ্ৰ নাৰায়ণ কলিতা, প্ৰাক্তন সাংসদ বীৰেন্দ্ৰ প্ৰসাদ বৈশ্য আৰু মন্ত্ৰী ফণীভূষণ চৌধুৰী।

আনহাতে, আজি অনুষ্ঠিত হোৱা যুটীয়া সংসদীয় সমিতিৰ বৈঠক সিদ্ধান্তবিহীনভাৱে সমাপ্ত হয়। ইপিনে, ২৭ নৱেম্বৰ আৰু ৬ ডিচেম্বৰত বিধেয়কখনক লৈ সমিতিৰ বৈঠকত পুনৰ হ’ব আলোচনা।

অহা ২৭ নৱেম্বৰত বিধেয়কখনৰ সংশোধনী সন্দৰ্ভত আলোচনা হোৱাৰ কথা। তদুপৰি, বিধেয়কখন সন্দৰ্ভত প্ৰতিবেদনত কি কি উল্লেখ থাকিব সেই সম্পৰ্কে অহা  ৬ ডিচেম্বৰত আলোচনা কৰা হ’ব।

আনহাতে, বিজেপিৰ বাদে আন সকলো সদস্যই বিধেয়কখনৰ বিৰোধিতা কৰিছে। যুটীয়া সংসদীয় সমিতিৰ এজন সদস্যই অগপ প্ৰতিনিধি দলক এই কথা জানিবলৈ দিয়ে।