চানমাৰি আৰক্ষীৰ জালত ৰেইলৱেত কৰ্মৰত মালিগাঁৱৰ প্ৰৱঞ্চক

মালিগাঁৱৰ উত্তৰ-পূব ৰেইলৱেত কৰ্মৰত এজন প্ৰৱঞ্চকক আজি আদালতে জেইললৈ প্ৰেৰণ কৰে। চানমাৰি আৰক্ষীয়ে এজন ভুক্তভোগীৰ গোচৰৰ ভিত্তিত পাৰ্থ সেন নামৰ প্ৰৱঞ্চকজনক কালি গ্ৰেপ্তাৰ কৰিছিল।

মন কৰিব লগীয়া যে সেনক ভুক্তভোগী অভিজিৎ সৰকাৰ নামৰ নামৰ মানুহজনে কালি নিশা নিজেই কৌশলেৰে ধৰি আৰক্ষীক গতাই দিছিল।

তেওঁৰ বিৰুদ্ধে আৰক্ষীয়ে ভাৰতীয় দণ্ডবিধিৰ ৪০৬/৪২০ ধাৰাত ১০৮৭/১৮ নম্বৰত এক গোচৰ ৰুজু কৰে।

মন কৰিবলগীয়া কথা যে ভুক্তভোগী চৰকাৰে নিজে ধৃত প্ৰবঞ্চকটোক চানমাৰি আৰক্ষীৰ হাতত কালি নিশা গতাই দিয়ে।

আৰক্ষী সূত্ৰই জনোৱা অনুসৰি প্ৰৱঞ্চক সেনে সৰকাৰৰ পৰা যোৱা ১৮ নৱেম্বৰৰ দিনা ২৫ হাজাৰ টকা ধাৰলৈ লৈছিল। এই ধনখিনি ২১ নৱেম্বৰৰ দিনা ঘূৰাই দিয়াৰ কথা আছিল। কিন্তু সময় উকলি যোৱাৰ পাছতো উক্ত ধনৰাশি ঘূৰাই নিদিয়াত সৰকাৰে পাৰ্থ সেনক কৌশলেৰে মাতি তাৰ পাছত ধৰি লৈ চানমাৰি আৰক্ষীক গতাই দিয়েহি।

উল্লেখযোগ্য যে পূৰ্বেও পাৰ্থই বেলতলাৰ সুৰেশ কুমাৰ নামৰ লোক এজনৰ পৰা মাকৰ অসুখৰ অজুহাত দেখুৱাই ৪ লাখ টকা নিছিল বুলি চানমাৰি আৰক্ষীয়ে আমাক জনায়। সুৰেশ কুমাৰৰ পৰা যোৱা বছৰ জুলাই মাহতে উক্ত ধনখিনি ধাৰলৈ নিছিল যদিও আজি পৰ্য্যন্ত ঘূৰাই দিয়া নাই।

ইয়াৰোপৰি, চলিত বৰ্ষৰে ২৪ অক্টোবৰৰ দিনা পাৰ্থই ৰেইল বিভাগত চাকৰি দিয়াৰ প্ৰলোভনেৰে বকোৰ প্ৰীতিপুৰ গাঁৱৰ দহজন লোকৰ পৰা ২০ হাজাৰ টকাকৈ উৎকোচ ল’বলৈ আহি ধৰা পৰিছিল তথা ৰাইজে তেওঁক উত্তম-মধ্যম শোধাই বকো আৰক্ষীক চমজাই দিছিল।

দীৰ্ঘদিন ধৰি এনে ধৰণে প্ৰৱঞ্চনা কৰি বিভিন্ন জনৰ পৰা ধন আত্মসাৎ কৰি অহা পাৰ্থক কালি চানমাৰি আৰক্ষীয়ে গ্ৰেপ্তাৰ কৰি আজি আদালতত হাজিৰ কৰায়। আদালতে তেওঁক ন্যায়িক জিম্মালৈ প্ৰেৰণ কৰে।