বোকাখাত মহকুমাত শান্তিপূৰ্ণভাৱে চলি আছে ভোটগ্ৰহণ; ১০৪ নম্বৰ বিহৰা এল পি স্কুলৰ পুলিং বিষয়া চিকিৎসাধীন

ৰাজ্যৰ ১৬খন জিলাৰ সমান্তৰালকৈ বোকাখাত মহকুমাতো পুৱা ৭ বজাৰ পৰাই আৰম্ভ হয় প্ৰথম পৰ্যায়ৰ পঞ্চায়ত নিৰ্বাচনৰ ভোটগ্ৰহণ প্ৰক্ৰিয়া। এই পৰ্যন্ত মহকুমাটোৰ গোটেই কেইটা ভোট কেন্দ্ৰতে শান্তিপূৰ্ণ ভাৱে ভোটদান প্ৰক্ৰিয়া চলি আছে বুলি আমালৈ শেহতীয়াকৈ অহা খবৰৰ পৰা জানিব পৰা গৈছে।

উল্লেখ্য যে মহকুমাটোৰ ১০৪ নম্বৰ বিহৰা এল পি স্কুলৰ ভোটগ্ৰহণ কেন্দ্ৰত নিয়োজিত এজন বিষয়া কালি নিশা হঠ্যৎ অসুস্থ হৈ পৰাত তেওঁৰ স্থানত অন্য এজন বিষয়াক নিয়োজিত কৰি বেমেজালিৰ সৃষ্টি নোহোৱাকৈয়ে কেন্দ্ৰটোত সঠিক সময়ৰ পৰাই ভোটগ্ৰহণ প্ৰক্ৰিয়া আৰম্ভ হয়।

জানিব পৰা মতে কেন্দ্ৰটোৰ চন্দ্ৰ কামান নামৰ তৃতীয় পুলিং বিষয়াজন নিশা অসুস্থ হৈ পৰাত অন্য বিষয়া কেইজনে স্থানীয় লোকৰ সহযোগত বিষয়াজনক লগে লগে চিকিৎসালয়লৈ প্ৰেৰণ কৰে। 

উল্লেখ্য যে বোকাখাত মহকুমাত আজি মুঠ  ১,২৯,২৫৭ গৰাকী ভোটাৰে মুঠ ২০৩ টা ভোটগ্ৰহণ কেন্দ্ৰত নিজৰ নিজৰ ভোটাধিকাৰ সাব্যস্ত কৰিব পাৰিব। ইয়াৰে ৬৬,০০৯ গৰাকী পুৰুষ আৰু ৬৩,২৪৮ গৰাকী মহিলা ভোটাৰ।

মন কৰিবলগীয়া যে নিৰ্বাচনৰ বাবে মহকুমাটোত ২টা আদৰ্শ কেন্দ্ৰও স্থাপন কৰা হৈছে। এই কেন্দ্ৰত প্ৰিজাইডিং বিষয়াৰ পৰা পুলিং আৰু নিৰাপত্তাৰক্ষীলৈকে সকলোতে মহিলা বিষয়াক নিয়োগ কৰা হৈছে।