ওদালগুৰিত এছএছবিৰ ৭ম বেটেলিয়নৰ দ্বাৰা পশু চিকিৎসা চিভিক একশ্যন কাৰ্যসূচীৰ আয়োজন

ওদালগুৰি জিলাৰ টেংকিবস্তি সীমান্ত আৰক্ষী চকীৰ অন্তৰ্গত ১ নং টেংকিবস্তি গাঁৱত যোৱাকালি মঙলবাৰে এটা পশু চিকিৎসা কাৰ্যসূচীৰ আয়োজন কৰা হৈছে।

এই পশু চিকিৎসা শিবিৰটোৰ আয়োজন কৰিছে ওদালগুৰিত মোতায়েন এছএছবিৰ ৭ম বেটেলিয়নে। উক্ত শিবিৰটোত স্থানীয় বাসিন্দাসকলৰ পশুধনসমূহক চবকা আৰু এবিধ বেক্টেৰিয়াৰ সংক্ৰমণত হোৱা ‘হেম’ৰেজিক ছেপ্টিচেমিয়া’ আদি সাধাৰণতে হোৱা ৰোগৰ প্ৰতিষেধক ছিটা দিয়া হয়।

এই পশু চিকিৎসা শিবিৰটো এছএছবিৰ ৩৭ বেটেলিয়নৰ ডা০ সুধীৰ ছাংমাৰ তত্বাৱধানত পৰিচালনা কৰা হৈছিল। ১ নং টেংকিবস্তি গাঁৱৰ লগতে ওচৰ চুবুৰীয়া গাঁৱৰ প্ৰায় ২০৫ টা পশুধনক পশু চিকিৎসা বিষয়াসকলৰ দ্বাৰা এই চিকিৎসা শিবিৰত চিকিৎসা কৰা হয়। লগতে পশুধনসমূহৰ বাবে বিনামূলীয়া ঔষধো যোগান ধৰা হয়।

এই পশু চিকিৎসা শিবিৰত পশু চিকিৎসকলে গাঁওবাসীসকলক পশুধনসমূহ প্ৰতিপালন কৰাৰ সন্দৰ্ভত বিভিন্ন পৰামৰ্শ আগবঢ়ায়।