অৰুণাচলৰ বুলুং গাঁৱৰ বুকুত আজি উন্মোচিত হ’ল সুধাকণ্ঠৰ প্ৰতিমূৰ্তি

অৰুণাচল প্ৰদেশৰ লৱাৰ ডিবাং ভেলী জিলাৰ বুলুং গাঁও আজি পাহাৰ-ভৈয়ামৰ সংস্কৃতিৰ মিলন ভূমিলৈ পৰিণত হ’ল।অৰুণাচলৰ মুখ্য মন্ত্ৰী প্ৰেমা খাণ্ডু, উপ মুখ্য মন্ত্ৰী ছ’না মেন আৰু অসমৰ শক্তি মন্ত্ৰী তপন কুমাৰ গগৈয়ে  লৱাৰ ডিবাং ভেলীৰ বুলুং গাঁৱত সুধাকণ্ঠৰ ১০ ফুট উচ্চতাৰ প্ৰতিমূৰ্তিটো উন্মোচন কৰে।

উল্লেখযোগ্য যে ডিবাং ভেলী জিলাৰ  ভূপেন হাজৰিকাৰ বন্ধু গ’ৰা পাৰ্টিনৰ বুলুং গাঁওস্থিত ৬২ ভিল্লা নামৰ গৃহৰ চোতালত অৰুণাচলৰ চৰকাৰ আৰু অৰুণাচল লিটাৰেৰী ছ’চাইটিৰ পৃষ্ঠপোষকতাত উক্ত প্ৰতিমূৰ্তিটো নিৰ্মাণ কৰি তুলিছে অসমৰ বিশিষ্ট ভাস্কৰ্যবিদ বীৰেন সিংহই।

এই অনুষ্ঠানত উপস্থিত থাকে অসম সাহিত্য সভাৰ সভাপতি পৰমানন্দ ৰাজবংশী, সাহিত্যিক য়েছে দৰজে ঠংচিৰ লগতে অসম সাহিত্য সভা তথা অৰুণাচল সাহিত্য সভাৰ বহুকেইগৰাকী বিষয়ববীয়া, ভূপেন হাজৰিকা সাংস্কৃতিক ন্যাসৰ মনীষা হাজৰিকা, বিদ্যুৎ ভূঞাঁ, মঞ্জুলা হাজৰিকাৰ লগতে সুধাকণ্ঠৰ পৰিয়ালৰ সুদক্ষিণা শৰ্মা, সমৰ হাজৰিকা, ভাস্কৰ্যবিদ বীৰেন সিংহৰ লগতে মূৰ্তিটো নিৰ্মাণৰ বাবে মাটি আৱণ্টন দিয়া বুলুঙৰ পাৰ্টিন পৰিয়াল তথা আছু আৰু অৰুণাচল ছাত্ৰ সন্থাৰ প্ৰতিনিধিৰ লগতে শতসহস্ৰ জনতা।

এই উপলক্ষে অনুষ্ঠিত সাংস্কৃতিক অনুষ্ঠানত অৰুণাচলত বাস কৰা আদি, আৱৰ, মিছিমি, খামটি ইত্যাদিৰ লগতে অন্যান্য জনগোষ্ঠী আৰু অসমৰ বিহু, নেপালী, মিচিং আদি জনগোষ্ঠীৰ শিল্পীয়ে অংশ লৈ সাংস্কৃতিক একতা, এনাজৰী আৰু ভাতৃত্ববোধৰ অনন্য নিদৰ্শন দাঙি ধৰে৷

উল্লেখযোগ্য যে বৰ্তমান সময়তো পাৰ্টিন পৰিয়ালে ভূপেন হাজৰিকাদেৱে তেওঁলোকৰ ঘৰলৈ আহিলে ব্যৱহাৰ কৰা বস্তুসমূহ যেনে জনগোষ্ঠীয় পানীয় গ্ৰহণ কৰা আপং বাটিকেইটা, তেওঁ ব্যৱহাৰ কৰা বিছনাখন, ৰেডিও আৰু গা’ত লোৱা এৰি কাপোৰ আদি আজিও সযতনে ৰাখিছে।

আজিৰ উক্ত সভাতেই সাহিত্যিক য়েছে দৰজে ঠংচিৰ সম্পাদনাত ‘সেতুবন্ধন’ নামেৰে এখন স্মৃতিগ্ৰন্থও উন্মোচন কৰা হয়।