অপৰাধীক কাৰাবাসৰ পৰা বচাবলৈ ভুৱাকৈ মৃত্যুৰ প্ৰমাণপত্ৰ উলিয়াই গ্ৰেপ্তাৰ হ’ল অধ্যক্ষ

শিক্ষানুষ্ঠানৰ গধুৰ দায়িত্বত থকা এজন লোকে এজন অপৰাধীক আইনৰ ৰোষৰ পৰা বচাবলৈ স্বাস্থ্য বিভাগৰ পৰা মৃত্যুৰ ভুৱা প্ৰমাণপত্ৰ উলিয়াই নিজেই গ্ৰেপ্তাৰ হোৱা ঘটনাই আমোদৰ সৃষ্টি কৰিছে নগাঁৱত।

গ্ৰেপ্তাৰ হোৱা লোকজনৰ নাম তপন কুমাৰ বৈদ্য। তেওঁ নগাঁও চহৰৰ ঐতিহ্যমণ্ডিত ডচন উচ্চতৰ মাধ্যমিক আৰু বহুমুখী বিদ্যালয়ৰ অধ্যক্ষ।

অভিযোগ অনুসৰি তেওঁ বৰা উপাধিৰ এজন ঘনিষ্ঠ লোকৰ মৃত্যু ঘটা বুলি স্বাস্থ্য বিভাগৰ পৰা ভুৱা প্ৰমাণ পত্ৰ উলিয়াছিল৷ উক্ত লোকজন এটা গুৰুতৰ অপৰাধত দোষী সাব্যস্ত হৈ কাৰাবাস খটাৰ বাবে আগ বাঢ়িছিল৷ কিন্তু আদালতত মৃত্যুৰ প্ৰমাণ পত্ৰ জমা দিয়াৰ ফলত দণ্ড লাভৰ পৰা বাচি যায়৷

কিন্তু লাহে লাহে বৰা উপাধিৰ উক্ত অপৰাধীজন জীয়াই থকাৰ কথা পোহৰলৈ আহে। ফলত ঘটনা সম্পৰ্কত নগাঁও সদৰ থানাত ৩৯৭৪/১৮ নম্বৰত এটা গোচৰ পঞ্জীয়ন হয়৷

আৰক্ষীয়ে উক্ত গোচৰৰ তদন্ত কৰি মৃত্যুৰ প্ৰমাণ পত্ৰখন ভুৱা বুলি গম পায়। তদন্তত উৰহী গছৰ ওৰ উলিওৱাত সফল হয় আৰক্ষী আৰু এই দুই নম্বৰী কাৰ্যত অধ্যক্ষজন জড়িত থকাৰ তথ্য লাভ কৰে৷

সেই তথ্যৰ ভিত্তিতে ননৈ আৰক্ষী চকীৰ আৰক্ষীয়ে ২৮ ডিচেম্বৰৰ নিশা ননৈ ঘূৰীয়া গাঁৱৰ নিজা বাসভৱনৰ পৰা অধ্যক্ষজনক আটক কৰে৷ সোধা-পোছাৰ অন্তত অধ্যক্ষজনক গ্ৰেপ্তাৰ কৰা বুলি আৰক্ষীয়ে জানিবলৈ দিছে৷